ଭିଜିଲାନ୍ସ ଜାଲରେ ଜୟପୁର ଫରେଷ୍ଟ ରେଞ୍ଜର: ଘରୁ ମିଳିଲା ଟ୍ରେଜେରି ଭର୍ତ୍ତି ଟଙ୍କା, ଦେଢ କେଜି ସୁନା

ଭିଜିଲାନ୍ସରେ ପୁଣି ଜଣେ ସରକାରୀ ବାବୁ । ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଜୟପୁର ଫରେଷ୍ଟ ରେଞ୍ଜର ରାମଚନ୍ଦ୍ର ନେପକ ଘରେ ଭିଜିଲାନ୍ସ ରେଡ କରିଛି । ଚଢାଉ ବେଳେ ଫରେଷ୍ଟ ରେଞ୍ଜରଙ୍କ ଘରୁ ମିଳିଛି ଅମାପ ସମ୍ପତ୍ତି । ଟଙ୍କାର ଥାକ କରି ଭର୍ତ୍ତି ହୋଇଥିବା ଟ୍ରେଜେରି ସହିତ ସୁନାର ବିସ୍କୁଟ ସହ ଗୋଲ୍ଡ କଏନ ମଧ୍ୟ ଠାବ ହୋଇଛି । ଏନେଇ ଭିଜିଲାନ୍ସ ବିଭାଗ ପକ୍ଷରୁ ସୂଚନା ଦିଆଯାଇଛି ।

ଓଡ଼ିଶା ଭିଜିଲାନ୍ସ ନିର୍ଦ୍ଦେଶାଳୟ ପକ୍ଷରୁ ଦିଆଯାଇଥିବା ସୂଚନା ଅନୁସାରେ, ‘ଆୟବର୍ହିଭୂତ ସମ୍ପତ୍ତି ଠୁଳ ଅଭାଯୋଗରେ ଭିଜିଲାନ୍ସ ଟିମ୍ ରାମଚନ୍ଦ୍ର ନେପକଙ୍କ କୋରାପୁଟର ଘର ସମେତ ଜୟପୁର ଓ ଭୁବନେଶ୍ୱରରେ ଏକାଳୀନ ରେଡ କରାଯାଇଥିଲା । ରେଡରେ 6 ଜଣ ଡିଏସପି ଓ 5 ଇନିସପେକ୍ଟର ସହ 9 ଜଣ ଏଏସଆଇ ସାମିଲ ଥିଲେ । ବିଭିନ୍ନ ସ୍ଥାନକୁ ଯାଇ ଛାନଭିନ କରିଥିଲା ଟିମ୍‌ । 6ଟି ସ୍ଥାନରେ ରେଡ ଜାରି ରହିଛି ।

କୋରାପୁଟ ପିଆର ପେଟାର ପୈତୃକ ଘର ସମେତ ଗୋଲ୍ଡେନ ହାଇଟ୍ସ ରେସିଡେନ୍ସିଆଲ ଆପାର୍ଟମେଣ୍ଟରେ 510 ଓ 511 ମଧ୍ୟ ଚଢ଼ାଉ ହୋଇଥିଲା।ସେହିପରି ତାଙ୍କର ଭାଇଙ୍କ ଘର ରଘୁନାଥପୁର ଭୁବନେଶ୍ୱରରେ ମଧ୍ୟ ରେଡ କରିଥିଲା ଭିଜିଲାନ୍ସ ଟିମ୍ । ଏହା ସହିତ ଜୟପୁରରେ ଥିବା ଶ୍ବଶୁର ଘର ଓ ଜୟପୁର ଫରେଷ୍ଟ ଡିଭିଜନର ଅଫିସରେ ମଧ୍ୟ ଚଢ଼ାଉ କରାଯାଇଥିଲା ।