ନବୀନଙ୍କ ପାଣ୍ଡିଆନ ପ୍ରୀତି!

ଜେଏମଜେ ବ୍ୟୁରୋ : ଏବେବି ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକଙ୍କର ପାଣ୍ଡିଆନ ପ୍ରୀତି ଯାଇନାହିଁ । ପାଣ୍ଡିଆନଙ୍କ ପାଇଁ ଦଳ ହାରିଲା ବୋଲି ସମସ୍ତେ କହୁଥିଲେବି ନବୀନଙ୍କ ମନ କିନ୍ତୁ ମାନୁନାହିଁ । ସକ୍ରିୟ ରାଜନୀତିରୁ ଅବସର ନେଇଛି ବୋଲି ଘୋଷଣା କରିଥିବା ଭିକେ ପାଣ୍ଡିଆନ ଏବେବି ଦଳ ଚଳାଉଛନ୍ତି । ତାଙ୍କ ରଣନୀତିରେ ହିଁ ଦଳ ଚାଲିଛି ବୋଲି ବିଜେଡ଼ି ଅଳିନ୍ଦରେ ଚର୍ଚ୍ଚା ହେଉଛି ।
ତେବେ ନବୀନଙ୍କ ଏହି ପାଣ୍ଡିଆନ ପ୍ରୀତି ଦଳକୁ ଆଗକୁ ନେବ ନା ବୁଡେ଼ଇବ ତାହାକୁ ନେଇ ଚର୍ଚ୍ଚା ଜୋରଧରିଛି ।ଦଳର ସଂଗଠନ ଥିଲା । ନବୀନଙ୍କ ଲୋକପ୍ରିୟତା ବି ଥିଲା । ନୂଆ ପ୍ରକଳ୍ପ, ନୂଆ ଯୋଜନାରେ ବି ବିଜେଡ଼ି ସରକାର ହେଳା କରିନଥିଲେ । ତଥାପିବି ଦଳ ଚବିଶ ନିର୍ବାଚନରେ ଚିଟପଟାଙ୍ଗ ମାରିଲା । ୧୧୫ର ଟାର୍ଗେଟ୍‌ ୫୧ ଭିତରେ ସୀମିତ ରହିଗଲା । ସେପଟେ ୨୭ ବର୍ଷ ପରେ ଦଳ ପ୍ରଥମ ଥର ପାଇଁ ଲୋକସଭାକୁ ଯିବାରେ ସକ୍ଷମ ହୋଇନାହିଁ । ୨୦୧୯ରେ ମୋଦି ଲହରକୁ ନବୀନ ସୁନାମୀ ଉଡେ଼ଇ ଦେଇଥିଲା । କିନ୍ତୁ ଚବିଶରେ ଓଡ଼ିଆ ଅସ୍ମିତାର ବତାସ ଓ ମୋଦି ଲହର ନବୀନଙ୍କୁ ଗାଦିଚ୍ୟୁତ କରିବାରେ ସକ୍ଷମ ହୋଇଛି । ତଥାପିବି ବିଜେଡ଼ି ଚେତିନଥିବା ପ୍ରତୀୟମାନ ହେଉଛି ।

ପରାଜୟର ସମୀକ୍ଷା ପାଇଁ ଏକ ଉଚ୍ଚସ୍ତରୀୟ କମିଟି ଗଢ଼ିବ ବୋଲି ନବୀନ କହିଥିଲେ । କିନ୍ତୁ ଏଯାଏଁ କମିଟି ଗଢ଼ା ହେଲାନାହିଁ କିମ୍ବା ସେ ବିଷୟରେ ଚର୍ଚ୍ଚା ବି ହେଉନାହିଁ । ଅତଏବ ବିଜେଡ଼ି କାହିଁକି ହାରିଛି ସବୁ କାରଣ ବିଷୟରେ ମାମଲତିକାରମାନେ ଜାଣିସାରିଛନ୍ତି । ଦୀର୍ଘଦିନ ଧରି କେନ୍ଦ୍ର ବିରୋଧରେ ନୀରବ ଥିବା ବିଜେଡ଼ି ଏବେ ବିଜେପି ବିରୋଧରେ ଯୁଦ୍ଧଂଦେହୀ ଡାକରା ଦେଇଛି । ବିଜେପି ବିରୋଧରେ ଦଳ ରାଜରାସ୍ତାକୁ ଯିବା ପାଇଁ ବି ସଜବାଜ ହେଉଛି । ଅପରପକ୍ଷରେ ବିଜେପି ମଧ୍ୟ ବିଜେଡ଼ିରୁ ନେତାଙ୍କୁ ଆଣି ଭାଡ଼ି ଖାଲି କରିବାକୁ ଯୋଜନା କରିଛି । ଆଗାମୀ ଦିନରେ ବିଜେଡ଼ି-ବିଜେପି ଲଢେ଼ଇ ଜୋରଦାର ହେବାର ଥିବାବେଳେ କାହାର ପଲା ଭାରିରହିବ ତାହାର ଉତ୍ତର ସମୟ ହିଁ ଦେବ ।