jmjnewso
ଜେଏମଜେ ବ୍ୟୁରୋ : ଅକ୍ଟୋବର ୧ ବେଳକୁ ଆଉ ଏକ ଲଘୁଚାପ ସମ୍ଭାବନା; ରେଡ୍ ଆଲର୍ଟ ପରେ ବ୍ରହ୍ମପୁରରେ ୩ ମନ୍ତ୍ରୀଙ୍କ ଡେରା ଶୁକ୍ରବାର ଭୀଷଣ ବର୍ଷା ନେଇ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ୩ ଜିଲ୍ଲାକୁ ରେଡ୍ ଆଲର୍ଟ ଜାରି କରିଛି । ବର୍ଷା ପାଇଁ ମୁଖ୍ୟମନ୍ତ୍ରୀଙ୍କ ପରାମର୍ଶ କ୍ରମେ ୩ ଜଣ ମନ୍ତ୍ରୀ ବ୍ରହ୍ମପୁରରେ ଅଛନ୍ତି । ରେଡ୍ ଆଲର୍ଟ ଦିଆଯାଇଥିବା ଜିଲ୍ଲାମାନଙ୍କରେ ରାଜସ୍ଵ ବିଭାଗର ବରିଷ୍ଠ ଅଧିକାରୀ ଅଛନ୍ତି ।
ଉତ୍ତରପଶ୍ଚିମ ଏବଂ ସଂଲଗ୍ନ ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ କ୍ଷେତ୍ର ସ୍ପଷ୍ଟଚିହ୍ନିତ ହୋଇଛି । ଏହା କ୍ରମଶଃ ପଶ୍ଚିମଦିଗରେ ଗତି କରି ଉତ୍ତରପଶ୍ଚିମ ଏବଂ ସଂଲଗ୍ନ ପଶ୍ଚିମକେନ୍ଦ୍ରୀୟ ବଙ୍ଗୋପସାଗରରେ ଆଗାମୀ ୨୪ ଘଣ୍ଟାରେ ଅବପାତର ରୂପ ନେବ ।
୨୭ ତାରିଖ ସକାଳେ ଏହା ଦକ୍ଷିଣ ଓଡ଼ିଶା ଏବଂ ଉତ୍ତର ଆନ୍ଧ୍ରପ୍ରଦେଶ ଉପକୂଳ ଦେଇ ଅତିକ୍ରମ କରିବ । ଏହାର ପ୍ରଭାବରେ ଆଜି ଶୁକ୍ରବାର ଓ ଆସନ୍ତାକାଲି ରାଜ୍ୟରେ ବର୍ଷା ଲାଗି ରହିବ । ଶୁକ୍ରବାର ଭୀଷଣ ବର୍ଷା ନେଇ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ୩ ଜିଲ୍ଲାକୁ ରେଡ୍ ଆଲର୍ଟ ଜାରି କରିଛି ।
ଭୀଷଣ ବର୍ଷା ସହ ଏସବୁ ଜିଲ୍ଲାରେ ବଜ୍ରପାତ ଘଡ଼ଘଡ଼ି ହୋଇପାରେ । ପବନର ବେଗ ଘଣ୍ଟାପ୍ରତି ୪୦ରୁ ୫୦ କିଲୋମିଟର ରହିବା ଆଶଙ୍କା କରାଯାଇଛି । ଦକ୍ଷିଣ ଓଡ଼ିଶାର ୩ ଜିଲ୍ଲା କୋରାପୁଟ, ମାଲକାନଗିରି ଓ କଳାହାଣ୍ଡିକୁ ଜାରି ହୋଇଛି ରେଡ୍ ଆଲର୍ଟ ।
ଦକ୍ଷିଣ ଓଡ଼ିଶାରେ ବର୍ଷା ଛେଚୁଥିବା ବେଳେ ପାଣିପାଗ ରେଡ୍ ଆଲର୍ଟ ଦେଇଛି । ବର୍ଷା ଓ ପରବର୍ତ୍ତୀ ସ୍ଥିତି ପାଇଁ ପ୍ରସ୍ତୁତ ରହିଛି ରାଜସ୍ଵ ବିଭାଗ । ରାଜସ୍ଵ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ କହିଛନ୍ତି, “ବର୍ଷା ପାଇଁ ମୁଖ୍ୟମନ୍ତ୍ରୀଙ୍କ ପରାମର୍ଶ କ୍ରମେ ୩ ଜଣ ମନ୍ତ୍ରୀ ବ୍ରହ୍ମପୁରରେ ଅଛନ୍ତି । ରେଡ୍ ଆଲର୍ଟ ଦିଆଯାଇଥିବା ଜିଲ୍ଲାମାନଙ୍କରେ ରାଜସ୍ଵ ବିଭାଗର ବରିଷ୍ଠ ଅଧିକାରୀ ଅଛନ୍ତି । ” ବର୍ଷାକୁ ଦୃଷ୍ଟିରେ ରଖି ଅଗ୍ନିଶମ ବାହିନୀ, NDRF, ODRF ଟିମ୍କୁ ନିୟୋଜିତ କରାଯାଇଛି । ଆବଶ୍ୟକୀୟ ଔଷଧ ମହଜୁଦ ରହିଛି । ସ୍ଵତନ୍ତ୍ର ରିଲିଫ୍ କମିଶନରଙ୍କ ସହ ରାଜସ୍ଵ ମନ୍ତ୍ରୀ ସ୍ଥିତି ଉପରେ ନିଜେ ନଜର ରଖିଥିବା ସୂଚନା ଦେଇଛନ୍ତି ।
ସେପଟେ ବର୍ତ୍ତମାନର ଲଘୁଚାପ ପ୍ରଭାବରେ ରାଜ୍ୟରେ ୨୮ ତାରିଖ ପର୍ଯ୍ୟନ୍ତ ବର୍ଷା ଲାଗି ରହିବ । ସମୁଦ୍ର ଅଶାନ୍ତ ରହୁଥିବାରୁ ୨୮ ତାରିଖ ପର୍ଯ୍ୟନ୍ତ ମତ୍ସ୍ୟଜୀବୀଙ୍କୁ ଓଡ଼ିଶା ଉକୂଳ ସହ ଉତ୍ତରପଶ୍ଚିମ ଏବଂ ସଂଲଗ୍ନ କେନ୍ଦ୍ରୀୟ ବଙ୍ଗୋପସାଗରକୁ ବାରଣ କରାଯାଇଛି ।
ଅକ୍ଟୋବର ୧ ତାରିଖ ବେଳକୁ ଆଉ ଏକ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ଥିବା ଆକଳନ କରିଛନ୍ତି ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶିକା । ଭୁବନେଶ୍ଵର ପାଣିପାଗ କେନ୍ଦ୍ରର ନିର୍ଦ୍ଦେଶିକା ମନୋରମା ମହାନ୍ତିଙ୍କ ଅନୁସାରେ, ୧ ବେଳକୁ ଆଉ ଏକ ଲଘୁଚାପ କ୍ଷେତ୍ର ସୃଷ୍ଟି ହୋଇପାରେ । ଏହା ଫଳରେ ରାଜ୍ୟରେ ବର୍ଷାର ପରିମାଣ ବଢ଼ିବ । ଏଭଳି ହେଲେ ଦଶହରାକୁ ବର୍ଷା ଫିକା ପକାଇପାରେ ।
