admin
ଜେଏମଜେ ବ୍ୟୁରୋ : ସ୍କୁଲ ଆସୁ ନଥିବା ଶିକ୍ଷାର୍ଥୀଙ୍କ ଘରେ ପହଞ୍ଚିବ ରାସନ୍ ସାମଗ୍ରୀ, ଅକ୍ଟୋବର ୯ ସୁଦ୍ଧା ଚିହ୍ନଟ କରି ବଣ୍ଟନ କରିବାକୁ ଗଣଶିକ୍ଷା ବିଭାଗ ର ନିର୍ଦେଶ…ଶାରୀରିକ ଅକ୍ଷମ କିମ୍ବା ସ୍ୱାସ୍ଥ୍ୟଗତ ସମସ୍ୟା ପାଇଁ ସ୍କୁଲକୁ ଆସିପାରୁ ନଥିବା ବିଦ୍ୟାର୍ଥୀଙ୍କୁ ଚିହ୍ନଟ କରି ସେମାନଙ୍କ ଘରେ ସବୁପ୍ରକାର ସୁବିଧା ଯୋଗାଇ ଦିଆଯିବ । ତାଙ୍କର ପାଠପଢ଼ା ଓ ପୋଷଣରେ ଯେପରି କୌଣସି ଅସୁବିଧା ନହୁଏ ସେଥିଲାଗି ଧ୍ୟାନ ଦିଆଯିବ । ସେମାନଙ୍କ ଘରେ ସ୍କୁଲ ପକ୍ଷରୁ ଶୁଖିଲା ରାସନ ସମାଗ୍ରୀ ଏବଂ ପାଠ୍ୟ ଉପକରଣ ପହଞ୍ଚାଇ ଦିଆଯିବ ।
ଏନେଇ ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ସମସ୍ତ ଜିଲ୍ଲା ଶିକ୍ଷା ଅଧିକାରୀଙ୍କୁ ଚିଠି କରାଯାଇଛି ।
ସୂଚନାଯୋଗ୍ୟ, ସ୍ୱାସ୍ଥ୍ୟଗତ ସମସ୍ୟା ପାଇଁ ଯେଉଁ ଛାତ୍ରଛାତ୍ରୀ ସ୍କୁଲ ଆସିପାରୁ ନାହାନ୍ତି ସେମାନଙ୍କୁ ରାସନ ସାମଗ୍ରୀ ଯୋଗାଇ ଦେବାକୁ ନେଇ ହାଇକୋର୍ଟରେ ଏକ ଜନସ୍ୱାର୍ଥ ମାମଲା ରୁଜୁ ହୋଇଥିଲା । ଏହାକୁ ଆଧାର କରି କୋର୍ଟ ନିର୍ଦ୍ଦେଶ ଦେଇଥିଲେ ଯେ ଏହି ବର୍ଗର ପିଲାଙ୍କୁ ରାସନ ସାମଗ୍ରୀ ଏବଂ ପାଠ୍ୟ ଉପକରଣ ଘରେ ନେଇ ଯୋଗାଇ ଦିଆଯିବ । ଏହାକୁ ଆଧାର କରି ପିଏମ୍ ପୋଷଣର ରାଜ୍ୟ ପ୍ରକଳ୍ପ ପରିଚାଳନା ୟୁନିଟ୍ ପକ୍ଷରୁ ସମସ୍ତ ଜିଲ୍ଲା ଶିକ୍ଷା ଅଧିକାରୀଙ୍କୁ ଏହି ବର୍ଗର ଶିକ୍ଷାର୍ଥୀଙ୍କୁ ଚିହ୍ନଟ କରିବାକୁ ନିର୍ଦ୍ଦେଶ ଦିଆଯାଇଛି । ବିଶେଷ କରି ୬ ବର୍ଷରୁ ୧୪ ବର୍ଷର ପିଲାଙ୍କୁ ଚିହ୍ନଟ କରାଯିବ । ସେମାନଙ୍କ ଘରେ ଶୁଖିଲା ରାସନ୍ ସାମଗ୍ରୀ, ରୋଷେଇ ଖର୍ଚ୍ଚ ଏବଂ ପାଠ୍ୟ ସାମଗ୍ରୀ ଯୋଗାଇ ଦିଆଯିବ । ଆସନ୍ତା ୩୦ରୁ ଅକ୍ଟୋବର ୯ ତାରିଖ ମଧ୍ୟରେ ଏହି ବର୍ଗର ଶିକ୍ଷାର୍ଥୀଙ୍କୁ ଚିହ୍ନଟ କରିବାକୁ ନିର୍ଦ୍ଦେଶ ଦିଆଯାଇଛି । ଜିଲ୍ଲା ଶିକ୍ଷା ଅଧିକାରୀମାନେ ବ୍ଲକ ଶିକ୍ଷା ଅଧିକାରୀଙ୍କଠୁ ଏହି ତାଲିକା ସଂଗ୍ରହ କରିବେ । ଚିହ୍ନଟ ହୋଇଥିବା ପିଲାଙ୍କୁ ସମସ୍ତ ସୁବିଧା ଯୋଗାଇ ଦେବେ । ଅକ୍ଟୋବର ୧୯ ସୁଦ୍ଧା ଏହାର ରିପୋର୍ଟ ବିଭାଗ ପାଖରେ ଦାଖଲ କରିବାକୁ କୁହାଯାଇଛି।
jmjnewso
