jmjnewso
ବ୍ରହ୍ମପୁର : (ଜେଏମଜେ ନ୍ୟୁଜ ): କଡ଼ ଲେଉଟାଉଛି ଗଞ୍ଜାମ ଜିଲ୍ଲା ରାଜନୀତି । ନିଜ ଜିଲ୍ଲାକୁ ଯାଉନାହାନ୍ତି ନବୀନ ପଟ୍ଟନାୟକ । ବିଜେଡି ଜିଲ୍ଲା ସଭାପତିଙ୍କୁ ହତ୍ୟା ମାମଲାରେ ଜାମିନ ମିଳୁନି । ସେପଟେ ବାରମ୍ବାର ଗଞ୍ଜାମ ଗସ୍ତରେ ଆସୁଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ତେଣୁ ଆଲୋଚନା ଚାଲିଛି ଏକପାଖିଆ ରାଜନୀତି ଆଡକୁ ମୁହାଁଉଛି କି ଗଞ୍ଜାମ ?
ଗଞ୍ଜାମ ରାଜନୀତିରେ ଘଡିକେ ଘୋଡ଼ା ଛୁଟୁଛି । ବଢୁଛି ବିଜେପି, ଦ୍ୱନ୍ଦ୍ୱରେ ଶଙ୍ଖ ଶିବିର। ହିଞ୍ଜିଳିରୁ ବିଜୟ ପରେ ଗଞ୍ଜାମରେ ରାଜନୈତିକ ମଞ୍ଚ ବାନ୍ଧିନାହାନ୍ତି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦଳ ସଭାପତି ଥାଇ ବି ଜିଲ୍ଲା ରାଜନୀତିର ଗୋଟି ଯେମିତି ନବୀନଙ୍କ ହାତରେ ନାହିଁ। ସେପଟେ ଗଞ୍ଜାମରେ ବିଜେଡି ରାଜନୀତି ବୁଝିବାକୁ ଯେମିତି ନେତାଙ୍କ ବି ଆଗ୍ରହ ନାହିଁ । ପୀତବାସ ପଣ୍ଡା ହତ୍ୟା ମାମଲାରେ ବିଜେଡି ଜିଲ୍ଲା ସଭାପତି ତଥା ପୂର୍ବତନ ବିଧାୟକ ବିକ୍ରମ ପଣ୍ଡା ଜେଲରେ ଅଛନ୍ତି । ଫଳରେ ଦଳ କାହା ନେତୃତ୍ୱରେ ଆଗକୁ ବଢିବ ତାକୁ ନେଇ ଦ୍ୱନ୍ଦ୍ୱ ଦେଖାଦେଇଛି ।
