jmjnewso
ଲଘୁଚାପର ପ୍ରଭାବରେ ଶ୍ରୀକ୍ଷେତ୍ର ପୁରୀରେ ଲଗାତାର ବର୍ଷା ଜାରି ରହିଛି । ଅବିରତ ବର୍ଷା ଫଳରେ ସହରର ବଡ଼ଦାଣ୍ଡ ଏବଂ ଜଗନ୍ନାଥ କଲୋନୀ ସମେତ ଅନେକ ଅଞ୍ଚଳ ଜଳବନ୍ଦୀ ହୋଇପଡ଼ିଛି । ରାସ୍ତା ଉପରେ ପାଣି ଜମି ରହିଥିବାରୁ ସାଧାରଣ ଲୋକଙ୍କ ଯାତାୟାତରେ ଗୁରୁତର ବାଧା ସୃଷ୍ଟି ହୋଇଛି । ସ୍ଥାନୀୟ ଲୋକଙ୍କ ଅଭିଯୋଗ ଅନୁସାରେ, ସହରର ଡ୍ରେନ୍ଗୁଡ଼ିକର ସଫେଇ ସଠିକ୍ ଭାବେ କରାଯାଇନଥିବାରୁ ବର୍ଷା ଜଳ ସ୍ୱାଭାବିକ ଭାବେ ନିଷ୍କାସନ ହୋଇପାରୁନାହିଁ ।ଫଳରେ ବର୍ଷା ପାଣି ରାସ୍ତା ଓ ବସତି ଅଞ୍ଚଳରେ ଜମି ରହି ଜଳବନ୍ଦୀ ପରିସ୍ଥିତି ସୃଷ୍ଟି କରିଛି । ଜଳବନ୍ଦୀ ଯୋଗୁଁ ବିଭିନ୍ନ ଅଞ୍ଚଳରେ ଘରୁ ବାହାରିବା ମଧ୍ୟ ଲୋକଙ୍କ ପାଇଁ କଷ୍ଟକର ହୋଇପଡ଼ିଛି ।
ଦୁଇଚକିଆ ଓ ଚାରିଚକିଆ ଯାନବାହନ ପାଣିରେ ଧୀର ଗତିରେ ଚଳାଚଳ କରୁଥିବା ବେଳେ ଅନେକ ସ୍ଥାନରେ ଟ୍ରାଫିକ୍ ସମସ୍ୟା ମଧ୍ୟ ଦେଖାଦେଇଛି । ବ୍ୟବସାୟ, ଦୈନନ୍ଦିନ କାର୍ଯ୍ୟକଳାପ ଏବଂ ଲୋକଙ୍କ ସାଧାରଣ ଜୀବନ ଉପରେ ଏହାର ସିଧାସଳଖ ପ୍ରଭାବ ପଡ଼ିଛି । ସହରର ଡ୍ରେନେଜ୍ ବ୍ୟବସ୍ଥାକୁ ନେଇ ମଧ୍ୟ ସ୍ଥାନୀୟ ବାସିନ୍ଦା ପ୍ରଶ୍ନ ଉଠାଇଛନ୍ତି । ବର୍ଷା ପୂର୍ବରୁ ଡ୍ରେନ୍ ସଫେଇ ଓ ଜଳନିଷ୍କାସନ ବ୍ୟବସ୍ଥାର ସୁଧାର ପାଇଁ ଦାବି କରିଛନ୍ତି ସ୍ଥାନୀୟ ଲୋକ । ଅନ୍ୟପଟେ, ପାଣିପାଗ ବିଭାଗ ଆହୁରି ବର୍ଷାର ସମ୍ଭାବନା ପ୍ରକାଶ କରିଥିବାରୁ ପ୍ରଶାସନ ସତର୍କ ରହିଛି । ଜଳବନ୍ଦୀ ଅଞ୍ଚଳରେ ନଜରଦାରି ବଢ଼ାଇବା ସହ ଲୋକମାନଙ୍କୁ ଅନାବଶ୍ୟକ ଭାବେ ଘରୁ ବାହାରକୁ ନଯିବା ଏବଂ ସତର୍କତା ଅବଲମ୍ବନ କରିବାକୁ ପରାମର୍ଶ ଦିଆଯାଇଛି ।
