jmjnewso
ନୂଆଦିଲ୍ଲୀ : ଜେଏମଜେ ନ୍ୟୁଜ : ଭାରତୀୟ ଚିନି ଶିଳ୍ପ ଏବେ ଅସାଧାରଣ ସଙ୍କଟ ଦେଇ ଗତି କରୁଛି। ପର୍ଯ୍ୟାପ୍ତ ଆଖୁ ଚାଷ ହେଉଥିଲେ ବି ଚିନି ମୂଲ୍ୟ ହୁ ହୁ ହୋଇ ବଢ଼ି ଚାଲିଛିି। ଦୁଇ ମାସ ମଧ୍ୟରେ ମୂଲ୍ୟ ୪୦ ପ୍ରତିଶତ ବୃଦ୍ଧି ପାଇ ରେକର୍ଡସ୍ତରରେ ପହଞ୍ଚି ଯାଇଛି। ଇରାନ-ଆମେରିକା ଯୁଦ୍ଧ ପ୍ରଭାବ ସହିତ ସରକାରଙ୍କ ଇଥାନଲ ମିଶ୍ରଣ ଯୋଜନା ଖାଉଟିଙ୍କ ପାଇଁ ବଡ଼ ସମସ୍ୟା ସୃଷ୍ଟି କରିଛି।ଆଖୁକୁ ଇଥାନଲ କମ୍ପାନୀକୁ ପଠାଇ ଦିଆଯାଉଥିବାରୁ ବଜାରରେ ଚିନି ଅଭାବ ଦେଖାଦେଇଛି। ଏଭଳି ସ୍ଥିତିରେ ସରକାର ଚିନି ଆମଦାନୀ ଉପରୁ ଗୁରୁବାର କଟକଣା ହଟାଇ ଦେଇଛନ୍ତି। ମୂଲ୍ୟ ବୃଦ୍ଧିକୁ ଦୃଷ୍ଟିରେ ରଖି ଚିନି ଆମଦାନୀକୁ ଟିକସ ମୁକ୍ତ କରିଛନ୍ତି। ଏହି ନିଷ୍ପତ୍ତି ଯୋଗୁଁ ଆଗାମୀ ଦିନରେ ଚିନି ଶସ୍ତା ହୋଇପାରେ। ଏବେ ବଜାରରେ ଚିନି କେଜି ପ୍ରାୟ ୫୫ ଟଙ୍କା ରହିଛି। ଆଗରୁ ଚିନି ଆମଦାନୀ ଉପରେ ଶହେ ପ୍ରତିଶତ ଶୁଳ୍କ ଲଗା ଯାଇଥିଲା। ଘରୋଇ ଉତ୍ପାଦନକୁ ପ୍ରୋତ୍ସାହନ ପାଇଁ ଏପରି କରାଯାଇଥିଲା। ତେବେ ଇ-୨୦ ମିଶ୍ରଣ ଲକ୍ଷ୍ୟ ହାସଲ ପାଇଁ ଆଖୁକୁ ଇଥାନଲ ପ୍ରସ୍ତୁତ ପାଇଁ ପଠାଯାଉଥିବାରୁ ଦେଶରେ ଚିନି ଉତ୍ପାଦନ ଅହେତୁକ ହ୍ରାସ ପାଇଥିଲା। ଏହାର ବୋଝ ଜନତାଙ୍କ ସଞ୍ଚୟ ଉପରେ ପଡ଼ିଥିଲା। ଆଗକୁ ପାର୍ବଣ ଋତୁ ଆସୁଥିବାରୁ ଚିନି ମୂଲ୍ୟ ଆହୁରି ବୃଦ୍ଧି ପାଇବ ବୋଲି ଆଶଙ୍କା କରାଯାଉଥିଲା। ସେଥିପାଇଁ ୮ ବର୍ଷ ପରେ ସରକାର ଚିନି ଆମଦାନୀ କରିବାକୁ ନିଷ୍ପତ୍ତି ନେଇଛନ୍ତି। ସରକାରୀ ନିର୍ଦେଶ ଅନୁଯାୟୀ, ଅକ୍ଟୋବର ୩୧ ପର୍ଯ୍ୟନ୍ତ ଚିନି ଆମଦାନୀ ଟିକସ ମୁକ୍ତ ରହିବ। କଳା ବଜାରୀ ରୋକିବା ପାଇଁ ମଧ୍ୟ ସରକାର ନୂଆ ନିୟମ ଜାରି କରିଛନ୍ତି। ଏବେ ଚିନିକୁ କେବଳ ୧୫ ଦିନ ପାଇଁ ମହଜୁଦ ରଖାଯାଇପାରିବ। ଏହା କେବଳ ମାସକୁ ୧୦ ମେଟ୍ରିକ ଟନ୍ ଚିନି କ୍ରୟ କରୁଥିବା ବେପାରୀଙ୍କ ପାଇଁ ଉଦ୍ଦିଷ୍ଟ। ଏହି ନିୟମ ସେପ୍ଟେମ୍ବର ୧ରୁ ନଭେମ୍ବର ୩୦ ପର୍ଯ୍ୟନ୍ତ ବଳବତ୍ତର ରହିବ। ଅନ୍ୟପଟେ ଦେଶରେ ଚିନି ଅଭାବ ହେବାକୁ ନ ଦେବା ପାଇଁ ରପ୍ତାନି ଉପରେ କଟକଣା ଲଗାଇ ଦିଆଯାଇଛି। ସେପ୍ଟେମ୍ବର ୩୦ ପର୍ଯ୍ୟନ୍ତ ଏହି କଟକଣା ଲଗାଯାଇଛି। ସରକାର ଚିନିକୁ ପ୍ରତିବନ୍ଧିତ ଦ୍ରବ୍ୟ ଶ୍ରେଣୀରେ ସାମିଲ କରିଛନ୍ତି। ଏବେ ସରକାରୀ ଅନୁମତି ବିନା କୌଣସି ବେପାରୀ ଚିନି ରପ୍ତାନି କରିପାରିବେ ନାହିଁ।
