jmjnewso
ଭୁବନେଶ୍ୱର: ଜେଏମଜେ ନ୍ୟୁଜ : ଭରତପୁର ଥାନାରେ ସେନାଧିକାରୀ ଓ ତାଙ୍କ ବାନ୍ଧବୀଙ୍କ ହଙ୍ଗାମା ଘଟଣାରେ ପୁଲିସ ସାରା ଦେଶରେ ବଦନାମ ମୁଣ୍ଡାଇଥିଲା । ସେତେବେଳେ ଥାନାରେ ସିସିକ୍ୟାମେରା ନଥିବାରୁ ପୁଲିସ ବେଶ୍ ଅକଳରେ ପଡି଼ଥିଲା । ଓଡ଼ିଶାରେ ଏବେ ବି ଅନେକ ଥାନା ଓ ଫାଣ୍ଡି ଅଛି, ଯେଉଁଠିକି ୮୨୮ଟି ସିସିଟିଭି କ୍ୟାମେରା ଅଚଳ । ଅଭିଯୁକ୍ତଙ୍କ ଉପରେ ନଜର ରଖିବା ସହ ପୁଲିସର କାର୍ଯ୍ୟକଳାପ ନିରୀକ୍ଷଣରେ ବାଧା ଉପୁଜୁଛି । ଏସବୁ ଅଚଳ ସିସିଟିଭିକୁ ସଜାଡି଼ବା ପାଇଁ ପାଖପାଖି ୭୬ କୋଟିର ଅତିରିକ୍ତ ବଜେଟ୍ର ପ୍ରସ୍ତାବ ଦେଇଛି ଓଡ଼ିଶା ପୁଲିସ ।
ରାଜ୍ୟ ଗୃହ ସଚିବଙ୍କୁ ପୁଲିସ ଏଡିଜି (ଆଇନ୍ ଶୃଙ୍ଖଳା) ସଞ୍ଜୟ କୁମାର ଏକ ଚିଠି ଲେଖିଛନ୍ତି । ସେଥିରେ ଉଲ୍ଲେଖ ଅଛି, କ୍ରିଷ୍ଟାଲ ଇଣ୍ଟିଗ୍ରେଟେଡ୍ ସର୍ଭିସେସ୍ ପ୍ରାଇଭେଟ୍ ଲିମିଟେଡ୍ର ରିପୋର୍ଟ ଅନୁଯାୟୀ, ସେପ୍ଟେମ୍ବର ୧୭ ତାରିଖ ସୁଦ୍ଧା ରାଜ୍ୟର ବିଭିନ୍ନ ଥାନାରେ ମୋଟ ୭୯୫ଟି ଏବଂ ଫାଣ୍ଡିଗୁଡ଼ିକରେ ୩୩ଟି ସିସିଟିଭି କ୍ୟାମେରା ଖରାପ ହୋଇଯାଇଛି । ଅଚଳ ସିସିଟିଭିକୁ ତୁରନ୍ତ ସଜାଡ଼ିବାକୁ ଓଡ଼ିଶା କମ୍ପ୍ୟୁଟର ଆପ୍ଲିକେସନ୍ ସେଣ୍ଟର (ଓକାକ୍)କୁ ଆବଶ୍ୟକ ନିର୍ଦ୍ଦେଶ ଦେବାକୁ ସରକାରଙ୍କୁ ଅନୁରୋଧ କରିଛନ୍ତି ।
ଚିଠିରେ ଏହା ମଧ୍ୟ ଉଲ୍ଲେଖ କରାଯାଇଛି ଯେ ରାଜ୍ୟରେ ୬୪୫ଟି ଥାନା ଏବଂ ୨୬୩ଟି ଫାଣ୍ଡିରେ ମୋଟ ୧୬,୬୭୨ଟି ସିସିଟିଭି କ୍ୟାମେରା ଖଞ୍ଜାଯାଇଛି । ୨୦୨୫-୨୬ ଆର୍ଥିକ ବର୍ଷରେ ଥାନା ଓ ଫାଣ୍ଡିରେ ସିସିଟିଭି ସର୍ଭେଲାନ୍ସ ବ୍ୟବସ୍ଥାକୁ ସୁଦୃଢ଼ ପାଇଁ ୭୬ କୋଟି ଟଙ୍କାର ବଜେଟ୍ ଅର୍ଥରାଶି ରଖାଯାଇଛି । ଏକ ଅତିରିକ୍ତ ବଜେଟ୍ ମାଧ୍ୟମରେ ଏହି ୭୬ କୋଟି ଟଙ୍କା ଓକାକ୍କୁ ମଞ୍ଜୁର କରିବାକୁ ସରକାରଙ୍କ ପାଖରେ ପ୍ରସ୍ତାବ ଦେଇଛି ପୁଲିସ ବିଭାଗ ।
