jmjnewso
ଜେଏମଜେ ବ୍ୟୁରୋ : ଓଡ଼ିଶା ଡ୍ରାଇଭର ମହାସଂଘର ଷ୍ଟିଅରିଂ ଛାଡ଼ ଆନ୍ଦୋଳନ ରାଜ୍ୟରେ ଜାରି ରହିଛି। ମହାସଂଘର ସଭାପତି ପ୍ରଶାନ୍ତ ମେଣ୍ଡୁଲି କହିଛନ୍ତି ଯେ, ସରକାର ଲିଖିତ ପ୍ରତିଶ୍ରୁତି ନ ଦେବା ପର୍ଯ୍ୟନ୍ତ ଆନ୍ଦୋଳନ ଚାଲୁ ରହିବ। ତେବେ, କଂଗ୍ରେସ ଦଳର ଅନୁରୋଧକୁ ମାନି ଶୁକ୍ରବାର ଅନୁଷ୍ଠିତ ହେବାକୁ ଥିବା କଂଗ୍ରେସର ସମ୍ବିଧାନ ବଞ୍ଚାଅ ରାଲି ପାଇଁ ଗାଡ଼ି ଅଟକାଇବା ନାହିଁ ବୋଲି ମହାସଂଘ ନିଷ୍ପତ୍ତି ନେଇଛି।
ପିସିସି ସଭାପତିଙ୍କ ଅନୁରୋଧକୁ ଗ୍ରହଣ କରି ଏହି ନିଷ୍ପତ୍ତି ନିଆଯାଇଛି।
ମହାସଂଘର ୭ ଦଫା ଦାବି ନେଇ ଏହି ଆନ୍ଦୋଳନ ଜୁଲାଇ ୮ ତାରିଖରୁ ଆରମ୍ଭ ହୋଇଛି। ଡ୍ରାଇଭରମାନେ ଶାନ୍ତିପୂର୍ଣ୍ଣ ଧାରଣାରେ ବସିଥିବା ବେଳେ, ଏହା ଯାତାୟାତ ବ୍ୟବସ୍ଥାକୁ ପ୍ରଭାବିତ କରି ଜନସାଧାରଣଙ୍କୁ ହନ୍ତସନ୍ତ କରୁଛି।
ଅନ୍ୟପକ୍ଷରେ, ରାଜ୍ୟ ପରିବହନ ମନ୍ତ୍ରୀ ବିଭୁତି ଭୂଷଣ ଜେନା କହିଛନ୍ତି ଯେ, ଡ୍ରାଇଭର ମହାସଂଘର ସମସ୍ତ ଦାବି ସରକାର ଶୁଣିସାରିଛି ଏବଂ ତାହା କାର୍ଯ୍ୟକାରୀ କରିବା ପାଇଁ ଆଲୋଚନା ଶେଷ ହୋଇଛି। ତେଣୁ, ଆନ୍ଦୋଳନର ଆଉ ଆବଶ୍ୟକତା ନାହିଁ। ସେ ଆହୁରି କହିଛନ୍ତି ଯେ, କଂଗ୍ରେସ ରାଲିକୁ ସମର୍ଥନ ଦେଇ ଏକ ଦିନ ପାଇଁ ଆନ୍ଦୋଳନ ସ୍ଥଗିତ ରଖିବାର ନିଷ୍ପତ୍ତି ରାଜନୀତିକ ଚକ୍ରାନ୍ତର ଅଂଶ। ମନ୍ତ୍ରୀ ଜେନା ଡ୍ରାଇଭର ନେତାମାନଙ୍କୁ ନିରୀହ ଡ୍ରାଇଭରଙ୍କୁ ଭ୍ରମିତ ନ କରିବାକୁ ଏବଂ ଆନ୍ଦୋଳନରୁ ଓହରିବାକୁ ନିବେଦନ କରିଛନ୍ତି।
କଂଗ୍ରେସ ଦଳ ଅଭିଯୋଗ କରିଛି ଯେ, ରାହୁଲ ଗାନ୍ଧୀଙ୍କ ଓଡ଼ିଶା ଗସ୍ତ ଓ ସମ୍ବିଧାନ ବଞ୍ଚାଅ ସମାବେଶକୁ ବିଫଳ କରିବା ପାଇଁ ଏହି ଆନ୍ଦୋଳନ ଏକ ଚକ୍ରାନ୍ତ। ଅନ୍ୟପକ୍ଷରେ, ଭାଜପା ଏହାକୁ ବିରୋଧୀଙ୍କ ରାଜନୀତି ବୋଲି କହିଛି।
ଏହି ଆନ୍ଦୋଳନ ଯୋଗୁ ରାଜ୍ୟରେ ଯାତାୟାତ ବ୍ୟବସ୍ଥା ଉପରେ ପ୍ରଭାବ ପଡ଼ୁଥିବା ବେଳେ, ସରକାର ଓ ଡ୍ରାଇଭର ମହାସଂଘ ମଧ୍ୟରେ ଆଲୋଚନା ଜାରି ରହିଛି। ସରକାର ଲିଖିତ ପ୍ରତିଶ୍ରୁତି ଦେଲେ ଆନ୍ଦୋଳନ ପ୍ରତ୍ୟାହାର କରାଯିବ ବୋଲି ମହାସଂଘ ସ୍ପଷ୍ଟ କରିଛି।
