jmjnewso
ଜେଏମଜେ ବ୍ୟୁରୋ : ମୁଖ୍ୟମନ୍ତ୍ରୀ ଙ୍କ ବସଭାବନ ରେ ଚାଲିଛି ବିଜେପି ର ଗୁରୁତ୍ୱପୂର୍ଣ ବୈଠକ.. ବିଜେପିର ନୂଆ ରାଜ୍ୟ ସଭାପତି ନିର୍ବାଚିତ ହେବା ପରେ ଏବେ ନୂଆ ଟିମ୍ ଗଠନ ପାଇଁ ଆରମ୍ଭ ହୋଇଛି କସରତ । ଏଥିଲାଗି ଚାଲିଛି ମାରାଥନ ବୈଠକ । ଯାହା ଜଣାପଡ଼ିଛି ଖୁବଶୀଘ୍ର ମନମୋହନ ସାମଲଙ୍କ ନୂଆ ଟିମ୍ ହେବ ଘୋଷଣା।
ତେବେ ମନମୋହନ ଏହି ଟିମରେ କିଏ ସ୍ଥାନ ପାଇବେ? ନୂଆ ଟିମ୍ର ରୂପରେଖ କିଭଳି ରହିବ? କେଉଁ ଆଧାରରେ ଏହି ଟିମ୍ ଗଠନ କରିବେ ବିଜେପି ରାଜ୍ୟ ସଭାପତି?
ଏହାକୁ ନେଇ ଆରମ୍ଭ ହୋଇଛି ଅଙ୍କକଷା । ଏଥିଲାଗି ଦୁଇ ଦିନ ଧରି ରାଜ୍ୟ କାର୍ଯ୍ୟାଳୟରେ ମାନସମନ୍ଥନ ପରେ ଆଜି ମୁଖ୍ୟମନ୍ତ୍ରୀଙ୍କ ସରକାରୀ ବାସଭବନରେ ଅନୁଷ୍ଠିତ ହୋଇଛି ଗୁରୁତ୍ବପୂର୍ଣ୍ଣ ବୈଠକ।
ବୈଠକରେ ମୁଖ୍ୟମନ୍ତ୍ରୀ ମୋହନ ମାଝୀ, ରାଜ୍ୟ ସଭାପତି ମନମୋହନ ସାମଲ, ରାଜ୍ୟ ପ୍ରଭାରୀ ବିଜୟ ପାଲ ସିଂ ତୋମାର, ସହ ପ୍ରଭାରୀ ଲତା ଉଷେଣ୍ଡି ଉପସ୍ଥିତ ରହି ଆଲୋଚନା କରିଛନ୍ତି ।ସରକାର ଆଉ ସଂଗଠନ କିଭଳି କାନ୍ଧକୁ କାନ୍ଧ ମିଳାଇ ଚାଲିବେ ତାକୁ ନେଇ ବୈଠକରେ ଗୁରୁତ୍ଵ ଦିଆଯାଇଛି। ରାଜ୍ୟ ବିଜେପିର ନୂଆ ଟିମ ସହ ବୋର୍ଡ ନିଗମ, କମିଶନ ପଦପଦବୀ ପୂରଣ ନେଇ ବୈଠକରେ ଚର୍ଚ୍ଚା ହୋଇଛି।ଏପରି ସମୟରେ ମୁଖ୍ୟମନ୍ତ୍ରୀଙ୍କ ସହ ମନମୋହନ ସାମଲ, ବିଜୟ ପାଲ ଏବଂ ଲତାଙ୍କ ଆଲୋଚନା ବେଶ୍ ଗୁରୁତ୍ବ ବହନ କରୁଛି। ସେପଟେ ଦଳୀୟ ସୁତ୍ରରୁ ମିଳିଥିବା ସୂଚନା ଅନୁସାରେ, ପ୍ରଥମେ ଘୋଷଣା ହୋଇପାରେ ମନମୋହନଙ୍କ ଟିମ୍।
ତାପରେ ନିଗମ ବୋର୍ଡ ଦାୟିତ୍ବରେ କିଏ ରହିବେ ତାହା ସ୍ଥିର ହେବ । ଅନ୍ୟପଟେ ବିଜେପିର ନୂଆ ଟିମରେ ୧୦ ଜଣ ଉପସଭାପତି, ଚାରି ଜଣ ସାଧାରଣ ସଂପାଦକ, ଜଣେ ସାଧାରଣ ସମ୍ପାଦକ(ସଙ୍ଗଠନ), ୧୦ ଜଣ ସମ୍ପାଦକ ଏବଂ ଜଣେ କୋଷାଧ୍ୟକ୍ଷ ରହିବେ ନେଇ ଚର୍ଚ୍ଚା ହେଉଛି ।
