jmjnewso
ଭୁବନେଶ୍ୱର: ପାର୍ଲିଆମେଣ୍ଟରେ ଆରମ୍ଭ ହୋଇଯାଇଛି ମୌସୁମୀ ଅଧିବେଶନ । ସମୟ ଗଡି ଚାଲିଥିଲେ ମଧ୍ୟ ଓଡିଶା ବିଧାନସଭାର ମୌସୁମୀ ଅଧିବେଶନ ନେଇ ବିଜ୍ଞପ୍ତି ପ୍ରକାଶ ପାଇନାହିଁ । ଯାହାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ବିରୋଧୀ ବିଜେଡି ଓ କଂଗ୍ରେସ । ସରକାର ଠିକ ସମୟରେ ଠିକ ନିଷ୍ପତ୍ତି ନେବେ ବୋଲି କହିଛି ଶାସକ ଦଳ । ସେପଟେ ଅଧିବେଶନ ବସିବା ନେଇ ବିଳମ୍ବ ହୋଇନଥିବାବେଳେ ବିରୋଧୀଙ୍କ ହାତରେ ଅନେକ ପ୍ରସଙ୍ଗ ଥିବାରୁ ସରକାର ସତର୍କତା ଅବଲମ୍ବନ କରୁଥିବା ବିଶେଷଜ୍ଞ କହିଛନ୍ତି ।
ବିଧି ବ୍ୟବସ୍ଥା ଅନୁଯାୟୀ ପ୍ରତିବର୍ଷ ବାଚସ୍ପତି ସମ୍ମିଳନୀ ହୁଏ । ଏହି ସମ୍ମିଳନୀରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଏ । ଏଥିରେ କେଉଁ ବିଧାନସଭା କେତେ ଦିନ ବସିବ ବୋଲି ନିଷ୍ପତ୍ତି ହୋଇଥାଏ । ବଡ଼ ବିଧାନସଭା ଅନ୍ତତଃ 60 ଦିନ ବସିବ । ଓଡିଶା ବିଧାନସଭା ବଡ଼ ବିଧାନସଭା ଶ୍ରେଣୀରେ ଅନ୍ତର୍ଭୁକ୍ତ ଅଟେ । କାରଣ 100ରୁ ଉର୍ଦ୍ଧ୍ଵ ଆସନ ବିଶିଷ୍ଟ ବିଧାନସଭା ବଡ଼ ବିଧାନସଭା ପର୍ଯ୍ୟାୟ ଭୁକ୍ତ । ବିଧାନସଭା ନିୟମାବଳୀ ଅନୁସାରେ ବର୍ଷକୁ 3 ଟି ଅଧିବେଶନ ବସିବ । ବଜେଟ, ମୌସୁମୀ ଓ ଶୀତକାଳୀନ ଅଧିବେଶନ ବସିବ । ଏହା ଛଡା ଜରୁରୀକାଳୀନ ପରିସ୍ଥିତିରେ ସରକାର ଯେକୌଣସି ସମୟରେ ସ୍ଵତନ୍ତ୍ର ଅଧିବେଶନ ଡାକି ପାରିବେ । ପ୍ରତି ଅଧିବେଶନ ମଧ୍ୟରେ ବ୍ୟବଧାନ 6 ମାସରୁ ଅଧିକ ହୋଇପାରିବ ନାହିଁ ।
ଭୟରେ ମୌସୁମୀ ଅଧିବେଶନ ଡାକୁ ନାହାଁନ୍ତି ସରକାର-
କେବେ ବସିବ ଓଡିଶା ବିଧାନସଭାର ମୌସୁମୀ ଅଧିବେଶନ ? ଜୁଲାଇ ମାସ ସରି ଅଗଷ୍ଟ ଅରମ୍ଭ ହେବାକୁ ଯାଉଥିବା ବେଳେ ଅଧିବେଶନ ବସିବା ନେଇ ସୂଚନା ମିଳିନାହିଁ । ଏମିତିକି ଅଧିବେଶନ ବସିବା ନେଇ ବିଜ୍ଞପ୍ତି ପ୍ରକାଶ ପାଇନାହିଁ । ଏହାକୁ ନେଇ ବିରୋଧୀ ଅସନ୍ତୋଷ ବ୍ୟକ୍ତ କରିଛନ୍ତି । କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି, “ଭୟରେ ମୌସୁମୀ ଅଧିବେଶନ ଡାକୁ ନାହାନ୍ତି ସରକାର । ମୌସୁମୀ ସରିବାକୁ ବସିଲାଣି ହେଲେ ଅଧିବେଶନ ବସିଲା ନାହିଁ । ଏହା କରି ଗଣତନ୍ତ୍ରକୁ ସରକାର ହତ୍ୟା କରୁଛନ୍ତି । ମହିଳା ନିର୍ଯ୍ୟାତନା, ଛାତ୍ରଛାତ୍ରୀ ସମସ୍ୟା, ଚାଷୀ ହନ୍ତସନ୍ତ, ସ୍କୁଲ ଛାତ୍ରୀ ଗର୍ଭବତୀ କଥା ଉଠେଇବୁ ବୋଲି ସରକାର ଡରୁଛନ୍ତି ।”
ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି, “ବିଧାନସଭା କେବେ ଡାକିବେ ସରକାର ଜାଣିପାରୁ ନାହାନ୍ତି । ଜୁଲାଇରେ ଅଧିବେଶନ ଡାକିଲେ ନାହିଁ । ଅଗଷ୍ଟ ମାସ ପ୍ରଶ୍ନବାଚିରେ ଅଛି । ଶୀତ ଦିନେ ସରକାର ବୋଧେ ବର୍ଷା କାଳୀନ ଅଧିବେଶନ ଡାକିବେ । ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି ଭୁଶୁଡି ପଡିଛି । ନାରୀ ନିର୍ଯ୍ୟାତନା ଚରମ ସୀମାରେ ପହଁଚିଛି । ଶିକ୍ଷାନୁଷ୍ଠାନରେ ଛାତ୍ରୀ ଆତ୍ମଦାହ, ରାସ୍ତାରେ ଯାଉଥିବା ଯୁବତୀଙ୍କୁ ନିଆଁ ଲଗା ଯାଉଛି । ବିଧାନସଭା ନବସିଲେ ଏ ସବୁ ପ୍ରସଙ୍ଗ କେଉଁଠି ଆଲୋଚନା ହେବ ? ସରକାର ସବୁ ଦୃଷ୍ଟିରୁ ସଙ୍କୁଚିତ ମନୋଭାବ ପୋଷଣ କରୁଛନ୍ତି । ବିସ୍ତାରିତ ମାନସିକତାରେ ସରକାର ଆସନ୍ତୁ । ବିରୋଧୀ ଦଳଙ୍କୁ ଆଲୋଚନା କରିବାକୁ ସୁଯୋଗ ଦିଅନ୍ତୁ ।”
ରାଜସ୍ୱ ଏବଂ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ କହିଛନ୍ତି, “ବିଜେଡି ସରକାରରେ ଅଗଷ୍ଟ ମାସ ନୁହେଁ, ସେପ୍ଟେମ୍ବର ମାସ ଶେଷରେ ଅଧିବେଶନ ବସିବା ନେଇ ନଜିର ରହିଛି । ପରମ୍ପରା ଅନୁଯାୟୀ ଅଧିବେଶନ ଡାକିବା ନେଇ ସରକାର ପଦକ୍ଷେପ ନେବେ । ସଂସଦୀୟ ବ୍ୟାପାର ବିଭାଗ ଏନେଇ ଅବଗତ ଅଛି । ତାରିଖ ସ୍ଥିର କରିବା ଲାଗି ରାଜ୍ୟପାଳଙ୍କ ଅନୁମୋଦନ ଦରକାର । ସେପ୍ଟେମ୍ବର ମାସରେ ଅଧିବେଶନ ବସିବା ପରମ୍ପରା ରହିଛି । ଆବଶ୍ୟକ ପଡ଼ିଲେ ଆଗରୁ ମଧ୍ୟ ହେବ । ରାଜ୍ୟରେ ବର୍ତ୍ତମାନ ବନ୍ୟା ପରିସ୍ଥିତି ଅଛି । ବନ୍ୟା ପରିସ୍ଥିତି ସରକାରଙ୍କ ପ୍ରାଥମିକତା । ଗତ ବର୍ଷକରେ 3 ଅଧିବେଶନରେ ଶାସକ ଦଳ ବସୁଛନ୍ତି । ବିରୋଧୀ ବୟକଟ କରୁଛନ୍ତି । ବୟକଟ ପାଇଁ ଅଧିବେଶନ ଡାକୁଥିଲେ କାହାର ମଙ୍ଗଳ ହେବନାହିଁ । ସବୁ ପ୍ରସଙ୍ଗରେ ଆଲୋଚନା ଲାଗି ସରକାର ପ୍ରସ୍ତୁତ ଅଛନ୍ତି ।
ସମ୍ବିଧାନ ବିଶେଷଜ୍ଞ ପ୍ରଭୁକଲ୍ୟାଣ ମହାପାତ୍ର କହିଛନ୍ତି, “ସାଧାରଣତଃ ମୌସୁମୀ ଅଧିବେଶନ ଜୁନ କିମ୍ବା ଜୁଲାଇ ମାସରେ ବସେ । ଏଥର ଜୁଲାଇ ସରିବାକୁ ବସିଛି । ବିଧାନସଭା ବସିନାହିଁ । ଅଗଷ୍ଟ ମାସରେ ବସିବ କି ନା ନାହିଁ ଅନିଶ୍ଚିତତା ମଧ୍ୟରେ ରହିଛି । କେବେ ବିଧାନସଭା ବସିବ ତାହା ସରକାର ନିଷ୍ପତ୍ତି ନେବେ । ପୂର୍ବରୁ ବିଧାନସଭା ଅଧିବେଶନ କ୍ୟାଲେଣ୍ଡରକୁ ବିଧାନସଭା ସଚିବାଳୟ ପକ୍ଷରୁ ପ୍ରସ୍ତୁତ ହେଉଥିଲା । ଏହାକୁ ସରକାର ଅନୁମୋଦନ ଦେଉଥିଲେ । କିନ୍ତୁ ବର୍ତ୍ତମାନ ବିଧାନସଭା ବସିବା ନେଇ ସମୟ ନିର୍ଧାରଣ ସଂସଦୀୟ ବ୍ୟାପାର ବିଭାଗ କରୁଛନ୍ତି । ବର୍ତ୍ତମାନର ସରକାର ଏକ ଅସୁବିଧା ପରିସ୍ଥିତି ମଧ୍ୟ ଦେଇ ଗତି କରୁଛନ୍ତି । ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତି, ମହିଳା ନିର୍ଯ୍ୟାତନା ଘଟଣା ସରକାରଙ୍କୁ ବ୍ୟାକଫୁଟକୁ ନେଇଛି ।”
ଅପ୍ରୀତିକର ପରିସ୍ଥିତି ଏଡାଇବାକୁ ଅଧିବେଶନ ବିଳମ୍ବ-
ଫକୀର ମୋହନ ମହାବିଦ୍ୟାଳୟର ଛାତ୍ରୀଙ୍କ ଆତ୍ମଦାହ ଘଟଣା ଓଡିଶାର ଛବି ମଳିନ କରିଛି । ବଳଙ୍ଗା ଘଟଣା ମଧ୍ୟ ଅଲୋଡ଼ନ ସୃଷ୍ଟି କରିଛି । ପାର୍ଲିଆମେଣ୍ଟରେ ଅପରେସନ ସିନ୍ଦୁରକୁ ନେଇ ଜୋରଦାର ଆଲୋଚନା ହେଉଛି । ବିଭିନ୍ନ ତଥ୍ୟ ସାମନାକୁ ଆସୁଛି । ଯଦି ଏବେ ବିଧାନସଭା ବସେ, ତେବେ ସାମ୍ପ୍ରତିକ ପରିସ୍ଥିତିରେ ସୃଷ୍ଟିରେ ହୋଇଥିବା ବିଭିନ୍ନ ଘଟଣାର ରୋଚକ ତଥ୍ୟ ବାହାରକୁ ଆସିବ । ଅନ୍ୟ ସମୟରେ ଯେଉଁ ତଥ୍ୟ ସାଧାରଣକୁ ଆସେନାହିଁ, ଅଧିବେଶନ ଚାଲିଥିବା ସମୟରେ ସେହି ତଥ୍ୟ ଲୋକ ଲୋଚନକୁ ଆସିଯାଏ । ଏସବୁ ତଥ୍ୟ ସର୍ବସାଧାରଣ ହେଲେ ଅପ୍ରୀତିକର ପରିସ୍ଥିତି ସୃଷ୍ଟି ହୁଏ । ତେଣୁ ଶାସକ ଦଳ ଅଧିବେଶନ ସଂକ୍ଷିପ୍ତ କରିବାକୁ ଚେଷ୍ଟା କରନ୍ତି । ବିଧି ଅନୁସାରେ ବିଧାନସଭା ବସିବ । ସରକାର ସତର୍କତା ଅନୁସାରେ ପଦକ୍ଷେପ ନେବେ । ସଂସଦୀୟ ଅଧିବେଶନ ଚାଲିବା ସମୟରେ ଓଡିଶାରେ ମୌସୁମୀ ଅଧିବେଶନ ଚାଲିଥାଏ । ବିରୋଧୀଙ୍କ ପାଖରେ ପର୍ଯ୍ୟାପ୍ତ ପ୍ରସଙ୍ଗ ଥିବାରୁ ଅଧିବେଶନ ଅହେତୁକ ବିଳମ୍ବ ହେବା ସମ୍ଭାବନା । ଆଗକୁ ପଞ୍ଚାୟତ ନିର୍ବାଚନ ଥିବାରୁ ବିରୋଧୀ ସ୍ୱାଭାବିକଠୁ ଅଧିକ ସକ୍ରିୟ ହୋଇଛନ୍ତି ।”
ବ୍ୟୁରୋ ରିପୋର୍ଟ..
