admin
ଜେଏମଜେ ବ୍ୟୁରୋ : ରାଜ୍ୟ ରାଜନୀତିରେ ବଡ ହଲଚଲ । ବିଜେଡି ବିଧାୟକ ବିଜେପିକୁ ଯିବେ ନା ବିଜେପି ସାଂସଦ ବିଜେଡିକୁ ଆସିବେ? ଜୋରଦାର ଚର୍ଚ୍ଚା ଆରମ୍ଭ ହୋଇଗଲାଣି । କିଛି ଦିନ ମଧ୍ୟରେ ରାଜ୍ୟ ରାଜନୀତିରେ ବଡ ଧରଣର ଅଦଳବଦଳ ହେବାକୁ ଯାଉଛି । ଖୋଦ୍ ବିଜେପି ସାଂସଦଙ୍କ ବିସ୍ଫୋରକ ବୟାନ ପରେ ଆରମ୍ଭ ହୋଇଯାଇଛି ଚର୍ଚ୍ଚା । ନିର୍ବାଚନକୁ ମାତ୍ର ୩ ମାସ ବିତିଥିବା ବେଳେ ଦଳବଦଳ ଚର୍ଚ୍ଚା ଏବେ ରାଜ୍ୟ ରାଜନୀତିକୁ ଉଷ୍ମ କରିଦେଇଛି ।
ବିଜେପି ସାଂସଦ ତଥା କନ୍ଧମାଳର ଟାଣୁଆ ନେତା ସୁକାନ୍ତ ପାଣିଗ୍ରାହୀଙ୍କ ବିସ୍ଫୋରକ ବୟାନକୁ ନେଇ ଏବେ ରାଜ୍ୟରେ ଜୋରଦାର ଚର୍ଚ୍ଚା । ସାଂସଦ କହିଛନ୍ତି, ‘ବହୁ ବିଜେଡି ବିଧାୟକ, ପୂର୍ବତନ ବିଧାୟକ ଏବଂ ଟାଣୁଆ ନେତା ଦଳ ଛାଡି ବିଜେପିକୁ ଆସିବେ । ୩ ମାସ ଭିତରେ ଅନେକ ବିଜେଡି ନେତା ପଦ୍ମ ଧରିବାକୁ ଯାଉଛନ୍ତି । ଅନେକ ଯୋଗାଯୋଗରେ ଅଛନ୍ତି । ବିକାଶ ଧାରାରେ ସାମିଲ ହେବାକୁ ସମସ୍ତେ ଆସିବେ। ରାଜ୍ୟସଭା ଛାଡ଼ି ବିଜେଡ଼ି ସାଂସଦ ଆମ ଦଳକୁ ଆସିଲେ । କେବଳ ସେମାନେ ନୁହେଁ ଅନ୍ୟ ନେତା ବି ସମ୍ପର୍କରେ ଅଛନ୍ତି । ୩ ମାସ ଭିତରେ ସମସ୍ତେ ଆସି ଭାରତୀୟ ଜନତା ପାର୍ଟିରେ ସାମିଲ ହେବେ । କଳା ଦାଗ ନଥିବା ନେତାଙ୍କୁ ଦଳରେ ସାମିଲ କରାଯିବ।’
କନ୍ଧମାଳ ସାଂସଦଙ୍କ ଏଭଳି ବୟାନ ପରେ ରାଜ୍ୟ ରାଜନୀତିରେ ଚହଳ ସୃଷ୍ଟି ହୋଇଛି । ବିଜୁ ଜନତା ଦଳରେ ଏକପ୍ରକାର ଛନକା ପଶିଥିବା ଭଳି ଲାଗୁଛି । କାରଣ ପୂର୍ବରୁ ମଧ୍ୟ ୨ ଜଣ ରାଜ୍ୟସଭା ସାଂସଦ ପଦବୀ ଆଉ ଦଳ ଛାଡି ଆସି ପଦ୍ମ କ୍ୟାମ୍ପରେ ମିଶିସାରିଛନ୍ତି । ଆଉ ତାହାକୁ ବେଶି ଦିନ ବି ହୋଇନି । ତେଣୁ ଦଳ ଏବେ ଚିନ୍ତାରେ ପଡିଯାଇଛି । ସେପଟେ କିନ୍ତୁ ବିଜୁ ଜନତା ଦଳର ପୂର୍ବତନ ମନ୍ତ୍ରୀ ତଥା ବରିଷ୍ଠ ନେତା ଦେବୀ ମିଶ୍ର ଓଲଟା ପ୍ରତିକ୍ରିୟା ରଖିଛନ୍ତି ।
ଦେବୀ ମିଶ୍ରଙ୍କ କହିବା କଥା, ବିଜେପି ସାଂସଦ ବିଜେଡି ଯୋଗାଯୋଗରେ ଅଛନ୍ତି । ଆଉ ସେମାନେ ଆସି ବିଜୁ ଜନତା ଦଳରେ ମିଶିବେ । ଦେବୀ ମିଶ୍ର କହିଛନ୍ତି, ବିଜେଡି ନବୀନ ବାବୁଙ୍କ ନେତୃତ୍ୱରେ ଆଗକୁ ବଢୁଛି। ବିଜେଡି ସବୁଠୁ ବଡ ଦଳ। ନିର୍ବାଚନ ପରେ ଲୋକ ମାନେ ଏବେ ଅନୁଭବ କରୁଛନ୍ତି । ଭବିଷ୍ୟତରେ କଣ ହେବ ତାହା କହିବା ମୁସ୍କିଲ? ରାଜନୀତିରେ ସବୁ ସମ୍ଭବ। ଆଞ୍ଚଳିକ ଦଳ ଓ ଜାତୀୟ ଦଳ ସେମାନଙ୍କ ସ୍ଥିତିକୁ ଦେଖି କହୁଛନ୍ତି। ଜାତୀୟ ସ୍ତରରେ ବିଜେପି ଓ କଂଗ୍ରେସ ଶାସନ ଗାଦି ଦଖଲ ପାଇଁ ଅକ୍ଷମ। ଗଠବନ୍ଧନ ଉପରେ ନିର୍ଭର କରୁଛନ୍ତି। କଂଗ୍ରେସ ବି ଆଗକୁ ବଢ଼ିବାକୁ ଚେଷ୍ଟା କରୁଛି। ଆଗକୁ ବଡ ହଲଚଲ ହେବ। ବିଜେଡ଼ିର ଫୋକସ ବିକାଶ। ବିକାଶକୁ ପାଥେୟ କରି ହଲ ଚଲ ହେବ।’
jmjnewso
