jmjnewso
ଭୁବନେଶ୍ୱର : ଜେଏମଜେ ବ୍ୟୁରୋ : ବିଧାନସଭାରେ ପୁଣି ଉଠିଲା ପାଣ୍ଡିଆନଙ୍କ ନାଁ । ମୁଲତବୀ ଆଲୋଚନା ବେଳେ ପୁଣି ଉଠିଲା ପାଣ୍ଡିଆନଙ୍କ ନାଁ । ପାଣ୍ଡିଆନଙ୍କ ସମୟରେ ବିଜେଡି ବିଧାୟକ ମାନେ ‘କାଗଜ ବାଘ’ (Paper Tiger) ଥିଲେ ବୋଲି କଟାକ୍ଷ କଲେ ବିଜେପି ବିଧାୟକ ପ୍ରତାପ ଚନ୍ଦ୍ର ନାୟକ । ସେ କହିଛନ୍ତି, “ରାଜା ଭାଇଙ୍କୁ ଆହ୍ୱାନ..ନବୀନ ବାବୁଙ୍କୁ ନେଇ ଗୋଟିଏ ବହି ଲେଖା ଯାଉ। ଆଉ ସେହି ବହି ନାଁ ହେଉ, ‘ବିଜେଡି କାନ୍ଦୁଛି କାହାରି ପାଇଁ’ । ସେହି ବହିର ମୁଖ୍ୟ ସ୍ରୋତରେ ପାଣ୍ଡିଆନଙ୍କୁ ରଖିବେ ।”
ସେହିପରି ସେ ଆହୁରି କହିଛନ୍ତି “ବିଜେଡି ବିଧାୟକଙ୍କୁ ଆହ୍ୱାନ କରୁଛି, ଆସନ୍ତୁ ଆପଣଙ୍କ ନିର୍ବାଚନ ମଣ୍ଡଳୀରେ ମୁଁ ଯାଇ ଲୋକଙ୍କ ରାସନ କାର୍ଡ କରାଇବି । ୨୦୧୫ରୁ ୨୦୨୪ ଭିତରେ ଆପଣ ୧୦ ଲକ୍ଷ ଲୋକଙ୍କ ରାସନ କାର୍ଡ କାଟିଛନ୍ତି । ଯେଉଁମାନେ ଭୋଟ ଦେଇ ନ ଥିଲେ ତାଙ୍କ ନାଁ କଟା ଯାଇଥିଲା । ବର୍ଷ ସାରା ରାସନ କାର୍ଡ ପୋର୍ଟାଲ ବନ୍ଦ କରୁଥିଲେ । ଆଗରୁ ପାଣ୍ଡିଆନ ସର୍ବେସର୍ବା ଥିଲେ । ଏବେ ଆପଣ ବାଘ ହୋଇ କଥା କହୁଛନ୍ତି । ସେତେବେଳେ କାଗଜ ବାଘ ଥିଲେ । ୬ ଲକ୍ଷ ଭୂତ ହିତାଧିକାରୀ ବାହାରିଛନ୍ତି । ସେ ରାସନ କିଏ ଖାଉଥିଲା ? ୨୦୨୪ରେ ଲୋକେ ତଡ଼ିପାର କଲେ । ଏବେ ନୂଆପଡ଼ାରେ ପ୍ରମାଣିତ ହେଲା ବିଜେଡି ଆଉ କିଛି ନାହିଁ ।”
ସେପଟେ ଶୁକ୍ରବାର ବିଧାନସଭାରେ ବର୍ଷିଥିଲେ ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ । ବିଜେଡି ନେତାଙ୍କୁ କରିଥିଲେ କଡ଼ା ପ୍ରଶ୍ନ । ପୃଥ୍ୱୀରାଜ ସିଧା ସିଧା ବିଜେଡି ହୃତ୍ପିଣ୍ଡକୁ କରିଥିଲେ ଟାର୍ଗେଟ୍ । ଯାହାଫଳରେ ଅଣନିଃଶ୍ୱାସୀ ହୋଇପଡ଼ିଲେ ଗୃହରେ ବସିଥିବା ବିଜେଡି ସଦସ୍ୟ ।
ଭିକେ ପାଣ୍ଡିଆନଙ୍କ ନାଁ ନନେଇ ପୃଥ୍ୱୀରାଜ ପ୍ରଶ୍ନ କରିଥିଲେ, ‘ବିଜେଡି ସରକାର ବେଳେ କାହିଁକି ଜଣେ ବ୍ୟକ୍ତିଙ୍କ ପାଇଁ ରହିଥିଲେ ୭୨ ସୁରକ୍ଷା କର୍ମୀ । ସିଏ ଯୁଆଡ଼େ ଯାଉଥିଲେ ତାଙ୍କ ଆଗରେ ପଛରେ କାହିଁକି ବୁଲୁଥିଲେ ପୋଲିସ । ସେ କୌଣସି ଜିଲ୍ଲାକୁ ଗଲେ ବି, ଜିଲ୍ଲା ପୋଲିସକୁ ତାଙ୍କ ସୁରକ୍ଷାରେ ଲଗାଉଥିଲେ ସରକାର । କାହିଁକି ଏମିତି କରୁଥିଲେ ସେତେବେଳର ସରକାର ? କ’ଣ ପାଇଁ ଦିଆଯାଉଥିଲା ତାଙ୍କୁ ଏତେ ସୁରକ୍ଷା । ଏହାର ଜବାବ ଦିଅନ୍ତୁ ବିଜେଡି ସଦସ୍ୟ । ଏବେ ମୁଖ୍ୟମନ୍ତ୍ରୀଙ୍କୁ ବି ଏତେ ସୁରକ୍ଷା ଦେବାକୁ ପଡ଼ୁନାହିଁ ।
ଶୁକ୍ରବାର ଗୃହରେ ମୁଲତବୀ ପ୍ରସ୍ତାବ ଆଲୋଚନା ସମୟରେ ବିଜେଡି ସଦସ୍ୟଙ୍କୁ ଏଭଳି ପ୍ରଶ୍ନ କରିଥିଲେ ପୃଥ୍ୱୀରାଜ । ମୁଖ୍ୟମନ୍ତ୍ରୀଙ୍କ ଅନୁପସ୍ଥିତିରେ ସେ ବିରୋଧୀଙ୍କ ଉତ୍ତର ରଖିବାକୁ ଯାଇ ପୂର୍ବତନ ବିଜେଡି ନେତା ତଥା ପୂର୍ବତନ 5T ଅଧ୍ୟକ୍ଷ ଭୈରବ କାର୍ତ୍ତିକେୟନ ପାଣ୍ଡିଆନଙ୍କୁ କରିଥିଲେ ଟାର୍ଗେଟ ।
