jmjnewso
ଭୁବନେଶ୍ୱର : ଜେଏମଜେ ନ୍ୟୁଜ : ପୁଣି ବିଜେଡିର ଆଭିମୁଖ୍ୟ ନେଇ ବଢିଲା ଚର୍ଚ୍ଚାସଂସଦରେ ବିଜେଡିର ଆଭିମୁଖ୍ୟ ନେଇ ଏବେ ରାଜନୈତିକ ମହଲରେ ଜୋରଦାର ଚର୍ଚ୍ଚା । ଯେଉଁ ବିଜେଡି ଦିନେ କଂଗ୍ରେସ ଓ ବିଜେପିଠାରୁ ସମଦୂରତା ରକ୍ଷା କରିବା କଥା କହୁଥିଲା, ଏବେ ସେହି ବିଜେଡିକୁ ଇଣ୍ଡି ମେଣ୍ଟର ବୈଠକରେ ଦେଖିବାକୁ ମିଳିଛି । ଇଣ୍ଡି ମେଣ୍ଟର ରଣନୀତି ବୈଠକରେ ବିଜେଡି ସଂସଦୀୟ ଦଳ ନେତା ମାନସ ମଙ୍ଗରାଜଙ୍କ ଉପସ୍ଥିତି ଏବେ ନୂଆ ସମୀକରଣର ସଙ୍କେତ ଦେଉଛି । ଉଭୟ ଦଳ ଏହାକୁ ପ୍ରସଙ୍ଗ ଭିତ୍ତିକ ଲଢ଼େଇ ବୋଲି କହୁଥିବା ବେଳେ ବିଜେପି କିନ୍ତୁ ଏହାକୁ ‘ଚୋରା ପୀରତି’ କହି ତୀବ୍ର କଟାକ୍ଷ କରିଛି ।
ରାଜ୍ୟସଭା ନିର୍ବାଚନ ପରେ ଏବେ ସଂସଦରେ ବିଜେଡିର ଭୂମିକାକୁ ନେଇ ଚର୍ଚ୍ଚା । ସଂସଦରେ ବିଲ୍ ଆଲୋଚନା ଭିତରେ ଇଣ୍ଡି ମେଣ୍ଟ ବୈଠକରେ ଯୋଗ ଦେଇଛନ୍ତି ବିଜେଡି ସଂସଦୀୟ ଦଳ ନେତା ମାନସ ମଙ୍ଗରାଜ । ଆଉ ଏହାର ଫୋଟୋ ସାମ୍ନାକୁ ଆସିବା ପରେ ରାଜ୍ୟଠୁ ନେଇ ଜାତୀୟ ରାଜନୀତିରେ ଚର୍ଚ୍ଚା ଜୋର ଧରିଛି । ଯେଉଁ ବୈଠକରେ କଂଗ୍ରେସ ଅଧ୍ୟକ୍ଷ ମଲ୍ଲିକର୍ଜୁନ ଖଡ଼ଗେ, ଜୟରାମ ରମେଶଙ୍କ ସହ ଅନ୍ୟ ନେତାମାନେ ଉପସ୍ଥିତ ଅଛନ୍ତି । ବଡ଼ କଥା ହେଉଛି ଉଭୟ ବିଜେଡି ଓ କଂଗ୍ରେସ ମେଣ୍ଟକୁ ଖୋଲା ଖୋଲି ଅସ୍ବୀକାର କରୁନଥିଲେ ମଧ୍ୟ କହିଛନ୍ତି ପ୍ରସଙ୍ଗ ଭିତ୍ତିକ ଲଢେଇ ରେ ଆମେ ଏକାଠି ଅଛୁ ।
୨୦୨୪ ନିର୍ବାଚନ ପରଠୁ ବଦଳି ଯାଇଛି ବିଜେଡିର ସମଦୂରତା ଆଭିମୁଖ୍ୟ । ରାଜ୍ୟସଭା ନିର୍ବାଚନ ବେଳେ ଉଭୟ ଦଳ ଏକଠି ପ୍ରାର୍ଥୀ ଦେଇଥିବା ବେଳେ ବିଧାନସଭା ଭିତରେ ଓ ବାହାରେ ଉଭୟଙ୍କୁ ଏକାଠି ଦେଖିବାକୁ ମିଳିଥିଲା । ତେବେ ବିଜେପି କହିଛି ଉଭୟ ଦଳର ଚୋରା ପୀରତି ଧରାପଡ଼ିଥିବା ବେଳେ ବିଜେଡିର ଅଣ କଂଗ୍ରେସ ଚରିତ୍ର ଏବେ ଲୋକଙ୍କ ସାମ୍ନାରେ ।
ଅଣ କଂଗ୍ରେସ ରାଜନୀତିରୁ ସୃଷ୍ଟି ହୋଇଥିଲା ବିଜେଡି । ବିଭିନ୍ନ ସମୟରେ ସଂସଦରେ ବିଜେଡି ଆପଣାଉଥିଲା ସମଦୂରତା ଆଭିମୁଖ୍ୟ । ଏବେ ଇଣ୍ଡି ମେଣ୍ଟରେ ବିଜେଡି ସାଂସଦଙ୍କ ଉପସ୍ଥିତି ରାଜନୀତିରେ ନୂଆ ସମୀକରଣ ଆଡ଼କୁ ଇଙ୍ଗିତ କରୁଛି ।
