jmjnewso
ଜେଏମଜେ ବ୍ୟୁରୋ : ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଗୁରୁତ୍ୱପୂର୍ଣ୍ଣ ତଦନ୍ତ କମିସନ ଫାଇଲ ହଜିବା ମାମଲାରେ ଏବେ ତଦନ୍ତ ଶେଷ ପର୍ଯ୍ୟାୟରେ ପହଞ୍ଚିଛି । ଏହି ସମ୍ବେଦନଶୀଳ ଘଟଣାରେ ଆଜି ଏକ ବଡ଼ ସୂଚନା ଦେଇଛନ୍ତି ରାଜସ୍ୱ ମନ୍ତ୍ରୀ ସୁରେଶ ପୂଜାରୀ । ସେ ସ୍ପଷ୍ଟ କରିଛନ୍ତି ଯେ, ଯେଉଁ ଅଧିକାରୀ ଦସ୍ତଖତ କରି ଫାଇଲ ନେଇଥିଲେ, ତାଙ୍କୁ ଚିହ୍ନଟ କରାଯାଇଛି ।ସେହି ଅଧିକାରୀ ଜଣକ ଫାଇଲ ନେବା ପରେ କାହାକୁ ଦେଇଛନ୍ତି ଏବଂ କେତେ ପର୍ଯ୍ୟାୟରେ ଏହି ଫାଇଲ ହେରଫେର ହୋଇଛି, ତାର ଗଭୀର ଅନୁସନ୍ଧାନ ଚାଲିଛି । ଖୁବଶୀଘ୍ର ସମ୍ପୃକ୍ତ ଅଧିକାରୀଙ୍କୁ ତଦନ୍ତ ପରିସରଭୁକ୍ତ କରାଯିବ । ସରକାର ଏହି ମାମଲାରେ ‘ରାଜଧର୍ମ’ ପାଳନ କରିବେ ଏବଂ କୌଣସି ବି ଦୋଷୀଙ୍କୁ ଛଡ଼ାଯିବ ନାହିଁ ବୋଲି ସେ ଦୃଢ଼ୋକ୍ତି ପ୍ରକାଶ କରିଛନ୍ତି ।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଏହି ମାମଲାରେ ପୂର୍ବରୁ ସମନ ଜାରି ହୋଇଥିଲେ ମଧ୍ୟ କିଛି ହାଇପ୍ରୋଫାଇଲ୍ ଅଧିକାରୀ ହାଜର ହୋଇନାହାନ୍ତି । ଏ ପ୍ରସଙ୍ଗରେ ମନ୍ତ୍ରୀ କହିଛନ୍ତି ଯେ, ଯେଉଁମାନେ ବର୍ତ୍ତମାନ ହାଜର ହେଉନାହାନ୍ତି, ତାଙ୍କୁ ପରବର୍ତ୍ତୀ ସମୟରେ ପୁଣି ଡକାଯିବ । ଯଦି ସମ୍ପୃକ୍ତ ଅଧିକାରୀମାନେ ବିଦେଶରେ ଥାନ୍ତି ଏବଂ ସମନ ସତ୍ତ୍ୱେ ନଆସନ୍ତି, ତେବେ ଓଡ଼ିଶା ପୁଲିସ ସେମାନଙ୍କୁ ପଚରାଉଚରା କରିବା ପାଇଁ ବିଦେଶ ଯିବାକୁ ମଧ୍ୟ ପଛାଇବ ନାହିଁ ।
ପ୍ରକାଶ ଥାଉ କି, ପୂର୍ବତନ ୫-ଟି ସଚିବ ଭି. କେ. ପାଣ୍ଡିଆନଙ୍କ ସମେତ କିଛି ବରିଷ୍ଠ ଆଇଏଏସ ଅଧିକାରୀ ଏହି ମାମଲାରେ ସ୍କାନରରେ ଅଛନ୍ତି । କ୍ରାଇମବ୍ରାଞ୍ଚ ଆଜି କ୍ୟାପିଟାଲ ଥାନାରେ ପହଞ୍ଚି ତଦନ୍ତ ଭାର ନେଇଥିବା ବେଳେ, ମନ୍ତ୍ରୀଙ୍କ ଏହି ବଡ଼ ବୟାନ ପରେ ଏବେ ହାଇପ୍ରୋଫାଇଲ୍ ଅଧିକାରୀଙ୍କ ଅଡ଼ୁଆ ବଢ଼ିବାରେ ଲାଗିଛି ।
