jmjnewso
ଜେଏମଜେ ବ୍ୟୁରୋ : ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ତଦନ୍ତ କମିସନ ଫାଇଲ୍ ଗାଏବ ହେବା ଘଟଣାରେ ରାଜ୍ୟ ବିଜେପି ପକ୍ଷରୁ କଡ଼ା ପ୍ରତିକ୍ରିୟା ପ୍ରକାଶ ପାଇଛି । ଏହି ସମ୍ବେଦନଶୀଳ ମାମଲାରେ ଯେଉଁମାନେ ଦୋଷୀ ସେମାନେ ଜେଲ୍ ଯିବେ ଏବଂ ଏତଲାରେ ନାମ ଥିବା ସମସ୍ତ ବ୍ୟକ୍ତି ତଦନ୍ତ ପରିସରଭୁକ୍ତ ହେବେ ବୋଲି ରାଜ୍ୟ ବିଜେପି ସାଧାରଣ ସମ୍ପାଦକ ବିରଞ୍ଚି ତ୍ରିପାଠୀ କହିଛନ୍ତି ।
ସାମ୍ବାଦିକ ସମ୍ମିଳନୀରେ ସେ କହିଛନ୍ତି, ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ହତ୍ୟାକାଣ୍ଡ ମାମଲାରେ ଜଷ୍ଟିସ ଏ.ଏସ. ନାଇଡୁ କମିସନ ୨୦୧୬ରେ ରିପୋର୍ଟ ଦେଇଥିଲେ । ହେଲେ ତତ୍କାଳୀନ ବିଜେଡି ସରକାର ୮ ବର୍ଷ ଧରି ଏହି ରିପୋର୍ଟକୁ ଚାପି ରଖିଥିଲେ । ନା ଏହାକୁ ସାର୍ବଜନୀନ କରାଗଲା, ନା କୌଣସି କାର୍ଯ୍ୟାନୁଷ୍ଠାନ ନିଆଗଲା । ସରକାର ବଦଳିବା ପରେ ସବୁ ରିପୋର୍ଟ ଫେରିଥିଲେ ମଧ୍ୟ ସ୍ୱାମୀଜୀଙ୍କ ହତ୍ୟାକାଣ୍ଡ ସମ୍ପର୍କିତ ରିପୋର୍ଟ ଗାଏବ ହେବା ଏକ ବଡ଼ ଷଡ଼ଯନ୍ତ୍ର ଆଡ଼କୁ ଇସାରା କରୁଛି । ଏବେ କ୍ରାଇମବ୍ରାଞ୍ଚ ଏହାର ସଠିକ୍ ତଦନ୍ତ କରି ସଫଳ ହେବ ବୋଲି ବିଜେପି ଆଶା ପ୍ରକାଶ କରିଛି ।
ସେ ଆହୁରି କହିଛନ୍ତି କନ୍ଧମାଳ ଜିଲ୍ଲା ମେଡିକାଲ କଲେଜକୁ ସ୍ୱାମୀ ଲକ୍ଷ୍ମଣାନନ୍ଦ ସରସ୍ୱତୀଙ୍କ ନାମରେ ନାମିତ କରିବାକୁ ରାଜ୍ୟ ସରକାର ନେଇଥିବା ନିଷ୍ପତ୍ତିକୁ ବିଜେପି ଧନ୍ୟବାଦ ଜଣାଇଛି । ସ୍ୱାମୀଜୀ ଦୀର୍ଘ ୪୦ ବର୍ଷ ଧରି ଉପାନ୍ତ ଅଞ୍ଚଳରେ ଦଳିତଙ୍କ ବିକାଶ, ଶିକ୍ଷା ପ୍ରସାର ଏବଂ ନିଶା ନିବାରଣ ପାଇଁ କାର୍ଯ୍ୟ କରିଥିଲେ । ଧର୍ମାନ୍ତରୀକରଣକୁ ବିରୋଧ କରି ସେ ସଂଘବଦ୍ଧ ଆକ୍ରମଣର ଶିକାର ହୋଇଥିଲେ । ଶେଷରେ ୨୦୦୮ ଜନ୍ମାଷ୍ଟମୀ ଦିନ ତାଙ୍କୁ ଓ ତାଙ୍କର ୪ ସହଯୋଗୀଙ୍କୁ ନିର୍ମମ ଭାବେ ହତ୍ୟା କରାଯାଇଥିଲା । ସରକାରଙ୍କ ଏହି ନାମକରଣ ନିଷ୍ପତ୍ତି ସ୍ୱାମୀଜୀଙ୍କ ସେବା କାର୍ଯ୍ୟକୁ ପ୍ରକୃତ ସ୍ୱୀକୃତି ବୋଲି ବିରଞ୍ଚି ତ୍ରିପାଠୀ କହିଛନ୍ତି ।କେବଳ ସେତିକି ନୁହେଁ, ଯେଉଁଠାରେ ସ୍ୱାମୀଜୀଙ୍କୁ ହତ୍ୟା କରାଯାଇଥିଲା, ସେହି ଫୁଲବାଣୀର ଜଲେଶପଟ୍ଟା କନ୍ୟାଶ୍ରମର ଉନ୍ନତିକରଣ ପାଇଁ ମୁଖ୍ୟମନ୍ତ୍ରୀ ମୋହନ ମାଝୀ ୧୩ କୋଟି ଟଙ୍କାର ଅନୁଦାନ ଘୋଷଣା କରିଛନ୍ତି । ଏହି ଅର୍ଥରେ ୩୦୦ ଛାତ୍ରୀଙ୍କ ରହିବା ପାଇଁ ଅତ୍ୟାଧୁନିକ ବ୍ୟବସ୍ଥା କରାଯିବ । ସରକାରଙ୍କ ଏହି ସମସ୍ତ ପଦକ୍ଷେପ ପାଇଁ ରାଜ୍ୟ ବିଜେପି ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛି ବୋଲି ସେ କହିଛନ୍ତି ।
