jmjnewso
ଆର, ଉଦୟଗିରି : ଜେଏମଜେ ନ୍ୟୁଜ : (ମନୋଜ ପାଢ଼ୀ)-: ଗଜପତି ଜିଲ୍ଲା ମୋହନା ବ୍ଲକର ନିଜୁମା ଅଙ୍ଗନବାଡ଼ି କେନ୍ଦ୍ରରେ ବ୍ୟବସ୍ଥାକୁ ନେଇ ଆସିଛି ସଙ୍ଗୀନ ଅଭିଯୋଗ। ଅଭିଯୋଗ ଅନୁସାରେ, ଅଙ୍ଗନବାଡ଼ି କର୍ମୀ ଗତ ୧୦ ଦିନ ହେଲା ଉପରିସ୍ଥ ଅଧିକାରୀଙ୍କୁ ନ ଜଣାଇ ବମ୍ବେ ଯାଇଥିବାରୁ କେନ୍ଦ୍ରଟି କେବଳ ସହାୟିକାଙ୍କ ଭରସାରେ ଚାଲୁଛି। କେନ୍ଦ୍ରରେ ଥିବା ୬ ଜଣ ଶିଶୁଙ୍କୁ କେବଳ ରନ୍ଧା ଖାଦ୍ୟ ଦିଆଯାଉଥିବା ବେଳେ ସେମାନଙ୍କୁ ପାଠପଢ଼ା କିମ୍ବା ଖେଳକୁଦ ଭଳି କୌଣସି କାର୍ଯ୍ୟକ୍ରମ କରାଯାଉ ନାହିଁ। ସେହିପରି ସରକାରୀ ନିୟମ ଅନୁଯାୟୀ କିଶୋରୀ ଓ ଗର୍ଭବତୀ ମହିଳାଙ୍କୁ ମିଳିବା କଥା ଥିବା ଅଣ୍ଡା ଓ ଛତୁଆ ମଧ୍ୟ ବଣ୍ଟନ ହେଉନଥିବା ଅଭିଯୋଗ ହୋଇଛି। ତେବେ ଘଟଣାକୁ ନେଇ ସିଡିପିଓ କହିଛନ୍ତି ଯେ ସେ ଏହି ବିଷୟରେ ଅବଗତ ନଥିଲେ। ତଦନ୍ତ କରି ସୁପରଭାଇଜର ଓ ସହାୟିକାଙ୍କୁ କାରଣ ଦର୍ଶାଅ ନୋଟିସ ଜାରି କରାଯିବ ବୋଲି ସେ କହିଛନ୍ତି।
ନିଜୁମା ଅଙ୍ଗନବାଡ଼ି କେନ୍ଦ୍ରରେ ଏଭଳି ଅବ୍ୟବସ୍ଥା ନେଇ ଅଭିଯୋଗ ଉଠିଥିବା ବେଳେ ପ୍ରଶାସନ କେତେ ଶୀଘ୍ର ପଦକ୍ଷେପ ନେଉଛି ଏବଂ ଶିଶୁ ଓ ହିତାଧିକାରୀମାନେ ସେମାନଙ୍କ ପ୍ରାପ୍ୟ ସୁବିଧା କେବେ ପାଉଛନ୍ତି, ତାହା ଉପରେ ସମସ୍ତଙ୍କ ନଜର ରହିଛି।
