jmjnewso
ଜେଏମଜେ ବ୍ୟୁରୋ : ବଜାରରେ ମିଳୁଛି ପ୍ଲାଷ୍ଟିକ୍ ଜାତୀୟ ପତାକା । ପ୍ଲାଷ୍ଟିକ୍ରେ ତିଆରି ଜାତୀୟ ପତାକା ତିଆରି, ବିକ୍ରି ଓ ବ୍ୟବହାର ଉପରେ ସମ୍ପୂର୍ଣ୍ଣ କଟକଣା ଲଗାଯିବାକୁ ନିର୍ଦ୍ଦେଶନାମା ରହିଛି । ମାତ୍ର ବାସ୍ତବ ଚିତ୍ର ଏକଦମ୍ ଓଲଟା । ଏବେ ବଜାର ଖୋଲାଖୋଲି ଭାବେ ପ୍ଲାଷ୍ଟିକ ପତାକା ବିକ୍ରି ହେଉଛି । କଟକଣା ଏବଂ ଜରିମାନାକୁ କାହାରି ଖାତିର ନାହିଁ ।ଭାରତୀୟ ଜାତୀୟ ପତାକା ପାଇଁ ପ୍ଲାଷ୍ଟିକ୍ ବ୍ୟବହାର ଉପରେ କଟକଣା ଏବଂ କଡା ନିର୍ଦ୍ଦେଶାବଳୀ ମୁଖ୍ୟତଃ ‘ଫ୍ଲାଗ୍ କୋଡ୍ ଅଫ୍ ଇଣ୍ଡିଆ ୨୦୦୨’ ଏବଂ ‘ଜାତୀୟ ସମ୍ମାନ ଅବମାନନା ନିବାରଣ ଆଇନ, ୧୯୭୧’ ଅନ୍ତର୍ଗତ କାର୍ଯ୍ୟକାରୀ ହୋଇଆସୁଛି । ନିୟମ ଅନୁଯାୟୀ ଜାତୀୟ ପତାକା କେବଳ ହାତବୁଣା ଖଦି, କଟନ, ସିଲ୍କ କପଡ଼ାରେ ତିଆରି ହେବାର ନିୟମ ରହିଛି । ଏଥିରେ କୌଣସି ପ୍ରକାର ପ୍ଲାଷ୍ଟିକ୍ ବ୍ୟବହାର ପାଇଁ ଅନୁମତି ନାହିଁ ।ଯାହା କୁହାଯାଉଛି ପ୍ଲାଷ୍ଟିକ୍ ପରିବେଶ ଅନୁକୂଳ ନୁହେଁ । ସ୍ୱାଧୀନତା ଦିବସ କିମ୍ବା ଗଣତନ୍ତ୍ର ଦିବସ ପରେ ପ୍ଲାଷ୍ଟିକ ପତାକା ରାସ୍ତାକଡ଼ରେ, ନାଳରେ, ଆବର୍ଜନା କୁଣ୍ଡରେ ଏଣେ ତେଣେ ପଡ଼ିଥିବା ଦେଖିବାକୁ ମିଳେ । ତ୍ରିରଙ୍ଗାକୁ ଏଣେତେଣେ ପକାଯିବା ଏବଂ ଏହାକୁ କେହି ପାଦରେ ମାଡ଼ିବା ଏବଂ ଏହା ଉପରେ ଗାଡ଼ି ଚଢ଼ାଇବା ଏକ ବଡ଼ଧରଣ ଅବମାନନା ଅଟେ ।
ତେଣୁ ପ୍ଲାଷ୍ଟିକ୍ ପତାକା ଉପରେ କଟକଣା କରାଯାଇଥିଲା ।ଯେତେବେଳେ ଏହାକୁ ସମ୍ପୂର୍ଣ୍ଣ ବାରଣ କରାଯାଇଛି, ତଥାପି ଉତ୍ପାଦନ ବନ୍ଦ ହେଉନାହିଁ । ଏହାର ମୂଳ ଉତ୍ସକୁ ଖୋଜି ଉତ୍ପାଦନକାରୀଙ୍କ ଉପରେ କାର୍ଯ୍ୟନୁଷ୍ଠାନ କରାଗଲେ ଏହା ବନ୍ଦ ହେବ । ଉଲ୍ଲଘଂନକାରୀଙ୍କ ବିରୋଧରେ ଫୌଜଦାରୀ ଆଇନ୍ ଅନୁଯାୟୀ ପଦକ୍ଷେପ ନିଆଗଲେ ଏହି କାରବାରରେ ବ୍ରେକ୍ ଲାଗିପାରିବ ବୋଲି ମତ ପ୍ରକାଶ ପାଉଛି।
