jmjnewso
ଅଟୋ ଚାଳକଙ୍କ ଆନ୍ଦୋଳନ ହିଂସାତ୍ମକ ରୂପ ନେବା ପରେ କଡ଼ା ଆଭିମୁଖ୍ୟ ଆପଣାଇଲେ ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର । ଆନ୍ଦୋଳନ ନାଁରେ ଆଇନକୁ ହାତକୁ ନେଇ ସାଧାରଣ ଲୋକଙ୍କ ଉପରେ ଆକ୍ରମଣ ଓ ସରକାରୀ ସମ୍ପତ୍ତି ଭଙ୍ଗାରୁଜାକୁ ନେଇ ମନ୍ତ୍ରୀ ତୀବ୍ର ପ୍ରତିକ୍ରିୟା ଦେଇଛନ୍ତି।
ମନ୍ତ୍ରୀ କହିଛନ୍ତି, “ସହରରେ ଯେଉଁ କ୍ଷତି ହୋଇଛି, ତାହା ଅଟୋ ଚାଳକମାନେ ଭରଣା କରିବେ।” ଏଥିସହ ହିଂସା ଓ ଗୁଣ୍ଡାଗିରିରେ ସାମିଲ ଥିବା ଚାଳକଙ୍କ ବେଆଇନ ଅଟୋ ଷ୍ଟାଣ୍ଡକୁ ଭଙ୍ଗାଯିବ ବୋଲି ସେ ସ୍ପଷ୍ଟ କରିଛନ୍ତି।ଆନ୍ଦୋଳନକାରୀମାନେ ଆଇନକୁ ହାତକୁ ନେଇଛନ୍ତି ଏବଂ ସାଧାରଣ ଲୋକଙ୍କ ଉପରେ ଆକ୍ରମଣ କରିଛନ୍ତି। ତେଣୁ ଆନ୍ଦୋଳନ ନାଁରେ ହିଂସା ଓ ଭଙ୍ଗାରୁଜାକୁ କୌଣସି ପରିସ୍ଥିତିରେ ବରଦାସ୍ତ କରାଯିବ ନାହିଁ । ସରକାରୀ ଗାଡ଼ି ଭାଙ୍ଗି ଥିବାରୁ ତାଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ। ଭଙ୍ଗାରୁଜା କରିଥିବା ଅଟୋ ଚାଳକଙ୍କ ଲାଇସେନ୍ସ ରଦ୍ଦ କରାଯିବ।ବୁଧବାର ମାଷ୍ଟରକ୍ୟାଣ୍ଟିନ୍ରେ ପାଉଣା ବୃଦ୍ଧି ଦାବିରେ ଆନ୍ଦୋଳନ କରୁଥିବା ଅଟୋ ଓ ଅନ୍ଲାଇନ୍ ଡ୍ରାଇଭରଙ୍କ ଆନ୍ଦୋଳନ ହିଂସାତ୍ମକ ରୂପ ନେଇଥିଲା। ମାଷ୍ଟରକ୍ୟାଣ୍ଟିନ୍ ବସ୍ ଡିପୋରେ ଧସେଇ ପଶି ଭଙ୍ଗାରୁଜା ସହ ‘ଆମ ବସ୍’ ଓ ପୁଲିସ ଗାଡ଼ିକୁ ଟାର୍ଗେଟ୍ କରାଯାଇଥିବା ଅଭିଯୋଗ ହୋଇଛି। ଆନ୍ଦୋଳନକାରୀମାନେ ୧୬ଟି ‘ଆମ ବସ୍’କୁ ଭଙ୍ଗାରୁଜା କରିଥିବା ସୂଚନା ମିଳିଛି। ସେଥିରୁ ୧୨ଟି ଏସି ଓ ୪ଟି ନନ୍-ଏସି ବସ୍। ବସ୍ ଗୁଡ଼ିକର କାଚ, ୱିଣ୍ଡସିଲ୍ଡ ଓ ଅନ୍ୟାନ୍ୟ ଯନ୍ତ୍ରାଂଶ ନଷ୍ଟ ହୋଇଛି। କ୍ରୁଟ୍ର ଆକଳନ ଅନୁସାରେ କ୍ଷୟକ୍ଷତି ପରିମାଣ ୧୦ ଲକ୍ଷ ଟଙ୍କାରୁ ଅଧିକ।
ମାଷ୍ଟରକ୍ୟାଣ୍ଟିନ୍ରୁ ଲୋୟର ପିଏମ୍ଜି ଅଭିମୁଖେ ଶହ ଶହ ଡ୍ରାଇଭର ଶୋଭାଯାତ୍ରା କରିବା ପରେ ଜନପଥରେ ରାସ୍ତାରୋକ କରିଥିଲେ। ପରେ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇ ପୁଲିସ ଉପରକୁ ପଥରମାଡ଼ ହୋଇଥିବା ଅଭିଯୋଗ ରହିଛି। ଏଥିରେ ୧୬ ଜଣ ପୁଲିସ କର୍ମଚାରୀ ଆହତ ହୋଇଥିବା କୁହାଯାଇଛି।
ପରିସ୍ଥିତି ନିୟନ୍ତ୍ରଣ ପାଇଁ ଦିନ ପ୍ରାୟ ୧ଟାରୁ ପୁଲିସ ଲାଠିଚାର୍ଜ କରିଥିଲା। ଘଟଣାରେ ଅନେକ ଡ୍ରାଇଭର ଆହତ ହୋଇଥିବା ବେଳେ ଜଣେ ଅଚେତ ହୋଇ ପଡ଼ିବାରୁ ତାଙ୍କୁ କ୍ୟାପିଟାଲ୍ ହସ୍ପିଟାଲ୍ରେ ଭର୍ତ୍ତି କରାଯାଇଥିଲା।ଅଭିଯୋଗ ଅନୁସାରେ ଆନ୍ଦୋଳନକାରୀମାନେ ୧୧ଟି ପୁଲିସ ଭ୍ୟାନ୍କୁ ମଧ୍ୟ କ୍ଷତିଗ୍ରସ୍ତ କରିଛନ୍ତି। ପରିସ୍ଥିତି ଦୃଷ୍ଟିରେ ମାଷ୍ଟରକ୍ୟାଣ୍ଟିନ୍ ଓ ଗାନ୍ଧିମାର୍ଗରେ ବ୍ୟାପକ ପୁଲିସ ଫୋର୍ସ ମୁତୟନ କରାଯାଇଥିଲା।ଡିସିପି ଜଗମୋହନ ମୀନାଙ୍କ ସୂଚନା ଅନୁସାରେ, ଘଟଣାରେ ଏପର୍ଯ୍ୟନ୍ତ ୧୧୩ ଜଣ ଡ୍ରାଇଭରଙ୍କୁ ଗିରଫ କରାଯାଇଛିଯାଇଛି। ସିସିଟିଭି ଫୁଟେଜ୍ ଯାଞ୍ଚ କରାଯାଉଛି। ହିଂସା, ପୁଲିସ ଉପରେ ଆକ୍ରମଣ ଓ ଭଙ୍ଗାରୁଜାରେ ସାମିଲ ଥିବା ଡ୍ରାଇଭରଙ୍କ ବିରୋଧରେ ଗିରଫଦାରି ସହ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି। ଏଥିସହ ଅଟୋ ଜବତ କରାଯାଇଥିବା ବେଳେ ୪୦୦ଟି ଅଟୋର ପଞ୍ଜୀକରଣ ବାତିଲ୍ କରାଯାଇଥିବା ସୂଚନା ମିଳିଛି।
୧୧୩ ଜଣ ଅନ୍ଲାଇନ୍ ଡ୍ରାଇଭରଙ୍କୁ ଗିରଫ କରାଯାଇଛି । ସେମାନଙ୍କ ନାଁରେ ଭାରତୀୟ ନ୍ୟାୟ ସଂହିତା(ବିଏନ୍ଏସ୍)ର ଅନେକ ସଙ୍ଗୀନ ଦଫା ଯୋଡ଼ା ଯାଇଛି । ବିଏନ୍ଏସ୍ର ୧୦୯(୧), ୧୯୦, ୧୯୫, ୧୮୯(୫), ୩୨୪ (୪), ୧୧୮ (୨), ୩୫୧(୨), ୩୫୧(୩), ୨୯୬, ୩(୫) ଓ ଅନ୍ୟାନ୍ୟ ଦଫା ଲାଗିଛି । ଗିରଫ ସମସ୍ତ ଅଟୋ ଚାଳକଙ୍କୁ କୋର୍ଟ ଚାଲାଣ କରାଯାଇଛି।
