jmjnewso
ବ୍ରହ୍ମପୁର : ଜେଏମଜେ ନ୍ୟୁଜ : ପୁଲିସ ଇନ୍ସପେକ୍ଟରଙ୍କୁ ଗାଳିଗୁଲଜ ସହ ଧମକ ଦେବା ଅଭିଯୋଗରେ ଗୋପାଳପୁର ପୁଲିସ ବିଜେପିର ଗଞ୍ଜାମ ଜିଲ୍ଲା ଯୁବ ମୋର୍ଚ୍ଚା ସଭାପତି ସୋମନାଥ ପାତ୍ରଙ୍କୁ ଗିରଫ କରି କୋର୍ଟ ଚାଲାଣ କରିଛି । ଜାମିନ୍ ନାମଞ୍ଜୁର ହେବାରୁ ତାଙ୍କୁ ବିଚାରବିଭାଗୀୟ ହାଜତକୁ ପଠାଇଦିଆଯାଇଥିବା ଗୋପାଳପୁର ଥାନା ଆଇଆଇସି ସତ୍ୟରଞ୍ଜନ ଲେଙ୍କା ପ୍ରକାଶ କରିଛନ୍ତି ।ଆଇଆଇସିଙ୍କ ସୂଚନା ପ୍ରକାରେ ବ୍ରହ୍ମପୁର ଏସ୍ପିଙ୍କ ନିର୍ଦ୍ଦେଶ କ୍ରମେ ଆଇଏଏଚ୍ଡିୟୁ (ଆଇତୁ) ଅଧିକାରୀଙ୍କ ସହ ଏକ ଟିମ୍ ଗତକାଲି ରଙ୍ଗେଇଲୁଣ୍ଡାରେ ଏକ ହୋଟେଲରେ ଚଢ଼ଉ କରିଥିଲେ । ସେଠାରୁ ଦୁଇ ଜଣ ଶିଶୁ ଶ୍ରମିକଙ୍କୁ ଉଦ୍ଧାର କରିବା ସମୟରେ ଗଞ୍ଜାମ ଜିଲ୍ଲା ଯୁବ ମୋର୍ଚ୍ଚା ସଭାପତି ସୋମନାଥ ପାତ୍ର ପହଞ୍ଚିଥିଳେ । ଆଇଏଏଚଟିୟୁ ଇନ୍ସପେକ୍ଟର ସୌଭାଗ୍ୟ ସ୍ୱାଇଁଙ୍କ ସହ ତାଙ୍କର କୌଣସି କାରଣକୁ ନେଇ କଥା କଟାକଟି ହୋଇଥିଲା । ପରେ ସୋମନାଥ ଅସଭ୍ୟ ଭାଷାରେ ଗାଳିଗୁଲଜ କରି ଧମକ ଦେବା ସହ ନାବାଳକମାନଙ୍କୁ ଛଡାଇ ନେବା ପାଇଁ ଉଦ୍ୟମ କରିଥିଲେ । ଏନେଇ ଇନ୍ସପେକ୍ଟର ସୌଭାଗ୍ୟ ସ୍ୱାଇଁ ଗୋପାଳପୁର ଥାନାରେ ଅଭିଯୋଗ କରିଥିଲେ । ଅଭିଯୋଗ ପ୍ରକାରେ ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଆଜି ପୁଲିସ ସୋମନାଥଙ୍କୁ କୋର୍ଟ ଚାଲାଣ କରିଥିବା ଗୋପାଳପୁର ଥାନା ଆଇଆଇସି ସୂଚନା ଦେଇଛନ୍ତି ।
