jmjnewso
ଭୁବନେଶ୍ୱର: ଜେଏମଜେ ନ୍ୟୁଜ : ଡେପୁଟି କମିଶନର ଅଫ ପୋଲିସ(ଡିସିପି) ଜଗମୋହନ ମୀନାଙ୍କ ଇସ୍ତଫା ଗୃହୀତ ହୋଇଛି। କେନ୍ଦ୍ର ସରକାର ଏହି ଇସ୍ତଫାପତ୍ରକୁ ଆନୁଷ୍ଠାନିକ ଭାବେ ଗ୍ରହଣ କରିଛନ୍ତି। ଚାକିରିରୁ ଅବସର ନେବା ପାଇଁ ସେ ପୂର୍ବରୁ ଦେଇଥିବା ଇସ୍ତଫାପତ୍ରକୁ ରାଜ୍ୟ ସରକାର ଗୃହ ମନ୍ତ୍ରଣାଳୟକୁ ସୁପାରିସ କରିଥିଲେ। କେନ୍ଦ୍ରର ମଞ୍ଜୁରୀ ପରେ ଏବେ ତାଙ୍କର ଇସ୍ତଫା ପ୍ରକ୍ରିୟା ଶେଷ ହୋଇଛି, ଯାହାକୁ ନେଇ ରାଜ୍ୟ ପ୍ରଶାସନିକ ଓ ପୋଲିସ ମହଲରେ ବ୍ୟାପକ ଚର୍ଚ୍ଚା ଆରମ୍ଭ ହୋଇଛି।ସୂଚନା ଥାଉକି, କିଛି ଦିନ ପୂର୍ବରୁ ଆଇପିଏସ ଅଫିସର ଜଗମୋହନ ମୀନା ବ୍ୟକ୍ତିଗତ କାରଣ ଦର୍ଶାଇ ନିଜ ପଦବୀରୁ ଇସ୍ତଫା ଦେବା ପାଇଁ ଆବେଦନ କରିଥିଲେ। ରାଜ୍ୟ ଗୃହ ବିଭାଗ ଏହି ଆବେଦନକୁ ସମୀକ୍ଷା କରିବା ପରେ ଆବଶ୍ୟକୀୟ କାଗଜପତ୍ର ସହ କେନ୍ଦ୍ର ଗୃହ ମନ୍ତ୍ରଣାଳୟ ନିକଟକୁ ଅନୁମୋଦନ ପାଇଁ ପଠାଇଥିଲେ। କେନ୍ଦ୍ର ଗୃହ ମନ୍ତ୍ରଣାଳୟ ଏହି ଇସ୍ତଫାକୁ ଗ୍ରହଣ କରିବା ପରେ ତାଙ୍କ ଭାରତୀୟ ପୋଲିସ ସେବା (IPS) କ୍ୟାଡରରୁ ଅବସର ନିଶ୍ଚିତ ହୋଇଛି
୨୦୧୩ ବ୍ୟାଚ୍ର ଏହି ଆଇପିଏସ ଅଫିସର ଓଡ଼ିଶାର ବିଭିନ୍ନ ଗୁରୁତ୍ୱପୂର୍ଣ୍ଣ ଜିଲାରେ ଏସ୍ପି ଭାବେ ସଫଳତାର ସହ କାର୍ଯ୍ୟ କରିଛନ୍ତି। କଟକ, ଗଞ୍ଜାମ, ମାଲକାନଗିରି ଭଳି ଜିଲାରେ ଆଇନ ଶୃଙ୍ଖଳା ରକ୍ଷା, ନକ୍ସଲ ଦମନ ଓ ଅପରାଧ ନିୟନ୍ତ୍ରଣ କ୍ଷେତ୍ରରେ ତାଙ୍କର ଅବଦାନ ବେଶ ପ୍ରଶଂସନୀୟ ଥିଲା। ଭୁବନେଶ୍ୱର ଡିସିପି ଭାବେ ଦାୟିତ୍ୱ ଗ୍ରହଣ କରିବା ପରେ ସେ ରାଜଧାନୀରେ ସାଇବର ଅପରାଧ ଓ ନିଶା କାରବାର ବିରୋଧରେ କଠୋର ପଦକ୍ଷେପ ନେଇଥିଲେ।
