jmjnewso
ଗୋପାଳପୁର : ଜେଏମଜେ ନ୍ୟୁଜ (ବିଭୁତି ଶତପଥୀ ): ପଶ୍ଚିମ କେନ୍ଦ୍ରୀୟ ଏବଂ ସଲଗ୍ନ ଉତ୍ତର ପଶ୍ଚିମ ବଙ୍ଗୋପସାଗରରେ ସୃଷ୍ଟି ହୋଇଥିବା ଗଭୀର ଅବପାତ ଫଳରେ ଆଜି ଗଞ୍ଜାମ ଜିଲ୍ଲାକୁ ଆଜି ଓ ଗୁରୁବାର ସକାଳ ସାଢେ ୮ ଟା ପର୍ଯ୍ୟନ୍ତ ଅରେଞ୍ଜ ୱାର୍ଣ୍ଣିଙ୍ଗ ଜାରି ହୋଇଛି l ଏହାର ପ୍ରଭାବରେ ଗୋପାଳପୁର ଉପକୂଳବର୍ତ୍ତୀ ଓ ଆଖ ପାଖ ଅଞ୍ଚଳରେ ଆଜି ଦିନ ତମାମ ବର୍ଷା ସହ ପବନ ରହିଛି l ଯଦ୍ୱାରା ରାସ୍ତା ଘାଟରେ ପାଣି ସୁଅ କାଟୁଥିବା ବେଳେ ଲୋକେ ଯାତାୟତରେ ଅସୁବିଧାର ସମ୍ମୁଖୀନ ହୋଇଥିବା ଦେଖିବାକୁ ମିଳିଛି l ଏହି ଅବପାତ ଗୋପାଳପୁରରୁ ୧୫୦ କିମି ଦୁରରେ ରହିଥିବା ବେଳେ ଏହା ଘଣ୍ଟା ପ୍ରତି ୫ କିମି ବେଗରେ ଗତି କରୁଛି l ଆଜି ରାତ୍ର ଉତ୍ତର ଆନ୍ଧ୍ର ପ୍ରଦେଶ ବିଶାଖାପାଟଣା ଉପକୂଳ ଓ ଦକ୍ଷିଣ ଓଡ଼ିଶା ଗୋପାଳପୁର ମଧ୍ୟରେ କଳିଙ୍ଗପାଟନମ ଆଖପାଖ ଦେଇ ସ୍ଥଳ ଭାଗ ଅତିକ୍ରମ କରିବା ସମ୍ଭାବନା ରହିଛି l ଏହାର ପ୍ରଭାବରେ ଗୋପାଳପୁର ବନ୍ଦରକୁ ୩ ନମ୍ବର ସଂକେତ ଜାରି ହୋଇଛି l ଶୁକ୍ରବାର ପର୍ଯ୍ୟନ୍ତ ମତ୍ସ୍ୟଜିବୀ ମାନଙ୍କୁ ସମୁଦ୍ର ମାଛ ମାରିବାକୁ ବାରଣ ହୋଇଛି l ମଙ୍ଗଳବାର ଅପରାହ୍ନ ସାଢେ ୫ ଟା ଠାରୁ ବୁଧୁବାର ସକାଳ ସାଢେ ୮ ଟା ପର୍ଯ୍ୟନ୍ତ ୯୬ ମିମି ବର୍ଷା ହୋଇଥିବା ବେଳେ ଆଜି ଅପରାହ୍ନ ସାଢେ ୫ ଟା ପର୍ଯ୍ୟନ୍ତ ୪୦ ମିମି ବର୍ଷା ହୋଇଥିବା ପାଣିପାଗ କେନ୍ଦ୍ର ପକ୍ଷରୁ ସୂଚନା ମିଳିଛି l ଜିଲ୍ଳା ପ୍ରଶାସନ ପକ୍ଷରୁ ଆଜି ମଧ୍ୟ୍ୟ ପର୍ଯ୍ୟଟକଙ୍କୁ ବାରଣ ହୋଇଥିବା ବେଳେ ବାତ୍ୟା ଆଶ୍ରୟ ସ୍ଥଳି ଗୁଡ଼ିକୁ ସୁବ୍ୟବସ୍ଥା ହୋଇଛି l ବର୍ଷା ପ୍ରଭାବରେ ସମୁଦ୍ରରେ ଉଚ୍ଚ ଜୁଆର ରହିଵା ସହ ବେଳାଭୂମି ଖାଁ ଖାଁ ରହିଥିବା ବେଳେ ପୁଲିସ ମୁତୟନ ହୋଇଥିବା ଦେଖିବାକୁ ମିଳିଛି l ଆଜି ବେଳାଭୂମିର ସମସ୍ତ ଉଠା ଦୋକାନୀ ଓ ଫାଷ୍ଟଫୁଡ ଦୋକାନ ବନ୍ଦ ରହିଥିବା ଦେଖିବାକୁ ମିଳିଛି l
