jmjnewso
ଜେଏମଜେ ବ୍ୟୁରୋ : ଆଜି ସଂସଦର ମୌସୁମୀ ଅଧିବେଶନ ଆରମ୍ଭ ହେଉଛି । ଏହା ଅଗଷ୍ଟ ୨୧ ପର୍ଯ୍ୟନ୍ତ ଚାଲିବ । ଏହି ଅଧିବେଶନରେ ସରକାର ୮ଟି ବିଲ୍ ଆଗତ କରିବେ । ତେବେ ତାହା ପୂର୍ବରୁ ରବିବାର ସଂସଦ ଭବନରେ ସର୍ବଦଳୀୟ ବୈଠକ ଅନୁଷ୍ଠିତ ହୋଇଯାଇଛି । ସଂସଦୀୟ ବ୍ୟାପାର ମନ୍ତ୍ରୀ କିରେନ୍ ରିଜିଜୁଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ କେନ୍ଦ୍ରମନ୍ତ୍ରୀ ଜେ ପି ନଡ୍ଡା, ଅର୍ଜୁନ ରାମ ମେଘୱାଲ, କଂଗ୍ରେସ ସାଂସଦ କେ ସୁରେଶ, ଗୌରବ ଗୋଗୋଇ ଓ ଜୟରାମ ରମେଶ, ଶିବସେନା ସାଂସଦ ଶ୍ରୀକାନ୍ତ ସିନ୍ଦେ, କେନ୍ଦ୍ରମନ୍ତ୍ରୀ ଅନୁପ୍ରିୟା ପଟେଲ, ଏନ୍ସିପି (ଏସ୍ପି) ସାଂସଦ ସୁପ୍ରିୟା ସୁଲେ, ବିଜେପି ସାଂସଦ ରବି କିଶନ ଏବଂ ଅନ୍ୟମାନେ ଯୋଗଦେଇଥିଲେ ।
ବୈଠକରେ ବିରୋଧୀ ଦଳଗୁଡ଼ିକ ବିଭିନ୍ନ ପ୍ରସଙ୍ଗ ଉଠାଇବା ସହ ସଂସଦରେ ତାହା ଉପରେ ଚର୍ଚ୍ଚା ପାଇଁ ଦାବି କରିଛନ୍ତି । ବିଶେଷକରି ସେମାନେ ପହଲଗାମ୍ ଆତଙ୍କୀ ଆକ୍ରମଣ, ଯୁଦ୍ଧବିରତି ଏବଂ ବିହାର ଭୋଟର ତାଲିକାର ‘ସ୍ୱତନ୍ତ୍ର ବ୍ୟାପକ ସଂଶୋଧନ (ଏସ୍ଆଇଆର୍)’ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କଠାରୁ ଜବାବ ମାଗିଛନ୍ତି । ତେଣୁ ସୋମବାର ମୌସୁମୀ ଅଧିବେଶନ ଆରମ୍ଭ ହେବା ପରେ ସେମାନେ ଏହିସବୁ ପ୍ରସଙ୍ଗକୁ ନେଇ ସରକାରଙ୍କୁ ଘେରିବେ ।
କଂଗ୍ରେସ ସାଂସଦ ଗୌରବ ଗୋଗୋଇ କହିଛନ୍ତି, ପ୍ରଧାନମନ୍ତ୍ରୀ ଗୃହକୁ ଆସି ୩ଟି ପ୍ରମୁଖ ପ୍ରସଙ୍ଗ ଉପରେ ନିଜ ଜବାବ ରଖିବା ଆବଶ୍ୟକ । ପାକିସ୍ତାନ ସହ ହୋଇଥିବା ଯୁଦ୍ଧବିରତିରେ ଆମେରିକାର ଭୂମିକା ଥିବା ନେଇ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ବାରମ୍ବାର ଦାବି କରୁଛନ୍ତି । ତାହା ଉପରେ ମୋଦି ସାମ୍ନାକୁ ଆସି ଜବାବ ଦେବା ଆବଶ୍ୟକ । ସେହିଭଳି ପହଲଗାମ୍ ଆକ୍ରମଣ ଓ ଜମ୍ମୁ-କାଶ୍ମୀର ଉପରାଜ୍ୟପାଳ ମନୋଜ ସିହ୍ନାଙ୍କ ବୟାନ ବାବଦରେ ମଧ୍ୟ ଆମେ ଜବାବ ମାଗୁଛୁ । ବୈଠକ ପରେ ଗଣମାଧ୍ୟମ ସହ କଥା ହୋଇ ଗୋଗୋଇ କହିଛନ୍ତି, ଆମେରିକା ରାଷ୍ଟ୍ରପତି ଟ୍ରମ୍ପ୍ଙ୍କ ବୟାନ ଭାରତର ମର୍ଯ୍ୟାଦା ଓ ସେନାର ପରାକ୍ରମ ଉପରେ ପ୍ରଶ୍ନ ଉଠାଇଛି । ଟ୍ରମ୍ପ୍ ଯେଉଁ ଦାବି କରୁଛନ୍ତି, ତାହାର ଜବାବ କେବଳ ପ୍ରଧାନମନ୍ତ୍ରୀ ମୋଦି ହିଁ ଦେଇପାରିବେ । ଆମେ ଆଶା କରୁଛୁ ନୈତିକତା ଦୃଷ୍ଟିରୁ ମୋଦିଜୀ ଏହିସବୁ ପ୍ରସଙ୍ଗରେ ଦେଶକୁ ସମ୍ବୋଧନ କରିବେ ।
ଉଲ୍ଲେଖଯୋଗ୍ୟ, ଆମେରିକା ରାଷ୍ଟ୍ରପତି ଟ୍ରମ୍ପ୍ ଭାରତ-ପାକ୍ ମଧ୍ୟରେ ଯୁଦ୍ଧବିରତି କରାଇଥିବା ନେଇ ୨୪ ଥର କହିସାରିଲେଣି । ଏମିତି କି ଯୁଦ୍ଧ ବେଳେ ୫ଟି ଜେଟ୍ ଖସିଥିବା ନେଇ ଟ୍ରମ୍ପ୍ ନିଜର ସଦ୍ୟ ବୟାନରେ କହିଥିଲେ । ତାହାକୁ ନେଇ ଭାରତରେ ରାଜନୀତି ତେଜିବାରେ ଲାଗିଛି । ମୌସୁମୀ ଅଧିବେଶନରେ ବିରୋଧୀମାନେ ଏହାକୁ ପ୍ରମୁଖ ଏଜେଣ୍ଡା କରିପାରନ୍ତି ।
ଅନ୍ୟପକ୍ଷରେ ସର୍ବଦଳୀୟ ବୈଠକରେ କେନ୍ଦ୍ରମନ୍ତ୍ରୀ ରିଜିଜୁ କହିଛନ୍ତି, ଗୃହ ଯେମିତି ସୁରୁଖୁରୁରେ ଚାଲିବ, ତାହା ସବୁ ଦଳର ଦାୟିତ୍ୱ । ସରକାର ସବୁ ପ୍ରସଙ୍ଗରେ ଚର୍ଚ୍ଚା ପାଇଁ ପ୍ରସ୍ତୁତ ଅଛନ୍ତି । ଏଥିସହ ଆମେରିକା ରାଷ୍ଟ୍ରପତି ଟ୍ରମ୍ପ୍ଙ୍କ ଦାବିଗୁଡ଼ିକ ଉପରେ ମଧ୍ୟ ଉଚିତ ଜବାବ ଦିଆଯିବ । ଆପ୍ ସାଂସଦ ସଞ୍ଜୟ ସିଂହ ବିହାର ଭୋଟର ତାଲିକାର ଏସ୍ଆଇଆର୍କୁ ନେଇ ଚିନ୍ତାବ୍ୟକ୍ତ କରିବା ସହ ଏହା ବନ୍ଦ ହେବା ଆବଶ୍ୟକ ବୋଲି କହିଛନ୍ତି । ଏହାକୁ ସେ ସ୍କାମ୍ ଅଭିହିତ କରି କହିଛନ୍ତି, ସରକାର ଯଦି ଏ ନେଇ ଜବାବ ନ ରଖନ୍ତି, ତେବେ ଆମେ ଗୃହ ଭିତରେ ଓ ବାହାରେ ଏହି ପ୍ରଶ୍ନ ଉଠାଇବୁ । ସେ ମଧ୍ୟ ଆମେରିକା ରାଷ୍ଟ୍ରପତି ଟ୍ରମ୍ପ୍ଙ୍କ ବୟାନ ଉପରେ କେନ୍ଦ୍ରଠାରୁ ଜବାବ ଚାହିଁଛନ୍ତି ।
ସୂଚନା ଥାଉ କି କେନ୍ଦ୍ର ସରକାର ଏଥର ମୌସୁମୀ ଅଧିବେଶନରେ ୮ଟି ବିଧେୟକ (ବିଲ୍) ଆଗତ କରିବାକୁ ଯାଉଛନ୍ତି । ଏଥିରେ କ୍ରୀଡ଼ା ପ୍ରଶାସନ ବିଲ୍, ଭୂ-ଐତିହ୍ୟସ୍ଥଳ ଏବଂ ଭୂ- ଅବଶେଷ (ସଂରକ୍ଷଣ ତଥା ରକ୍ଷଣାବେକ୍ଷଣ), ଖଣି ଓ ଖଣିଜ (ବିକାଶ ଓ ନିୟମ) ସଂଶୋଧନ ବିଲ୍ ଓ ରାଷ୍ଟ୍ରୀୟ ଆଣ୍ଟି-ଡୋପିଙ୍ଗ୍ (ସଂଶୋଧନ) ବିଲ୍ ଆଦି ଅନ୍ତର୍ଭୁକ୍ତ । ଏହାଛଡ଼ା ଜଷ୍ଟିସ୍ ଯଶୱନ୍ତ ବର୍ମାଙ୍କ ମହାଭିଯୋଗ ପ୍ରସଙ୍ଗରେ ଚର୍ଚ୍ଚା ହେବାର ଅଛି ।
ସଂସଦୀୟ ମନ୍ତ୍ରୀ ରିଜିଜୁ କହିଛନ୍ତି, ଜଷ୍ଟିସ ବର୍ମାଙ୍କ ବିରୋଧରେ ମହାଭିଯୋଗ ଚଳାଇବା ଲାଗି ୧୦୦ରୁ ଅଧିକ ସାଂସଦ ଦସ୍ତଖତ କରିଛନ୍ତି। ବାସଭବନରୁ ବିପୁଳ ମାତ୍ରାର ପୋଡ଼ା ନୋଟ୍ ମିଳିବାକୁ ନେଇ ଜଷ୍ଟିସ ବର୍ମା ବିବାଦରେ ଫସିଛନ୍ତି । ମୌସୁମୀ ଅଧିବେଶନରେ ସରକାର ଏହା ଉପରେ ବିଚାର କରିବେ । ଏ ସଂକ୍ରାନ୍ତରେ ସମସ୍ତ ପ୍ରକ୍ରିୟା ସବୁ ଦଳର ସହମତିରେ ହେବ । ଏହା କେବଳ ସରକାରଙ୍କ କାମ ନୁହେଁ ବୋଲି ରିଜିଜୁ ଦର୍ଶାଇଛନ୍ତି
