jmjnewso
କନ୍ଧମାଳ ଜିଲ୍ଲା କଳିଙ୍ଗା ଘାଟିରେ ସାଂଘାତିକ ସ୍ଥିତି। ଭୂସ୍ଖଳନ ପରେ ଧସିଲା ବଡ଼ ବଡ଼ ପଥର ଓ ମାଟି ଅତଡ଼ା। ରାସ୍ତାରେ ମାଟି ଓ ପଥର ଗଦେଇ ହୋଇଥିବାରୁ ରାସ୍ତା ଅବରୋଧ ହୋଇଛି। ଫଳରେ କନ୍ଧମାଳ ଓ ଗଞ୍ଜାମ ଜିଲ୍ଲାକୁ ବିଚ୍ଛିନ୍ନ ହୋଇଛି ଯୋଗାଯୋଗ। କଳିଙ୍ଗା ଘାଟିର ଉଭୟ ପାର୍ଶ୍ବରେ ଶହ ଶହ ଗାଡ଼ିମୋଟର ଅଟକି ରହିଛି। ଘଟଣାସ୍ଥଳରେ ପୋଲିସ, ଅଗ୍ନିଶମ ବାହିନୀ ପହଞ୍ଚି ଲୋକଙ୍କୁ ଏହି ରାସ୍ତାରେ ନଯିବାକୁ ବାରଣ କରିଛନ୍ତି।
ଯାହା ସୂଚନା ମିଳିଛି, ପାହାଡ଼ରୁ ମାଡ଼ି ଆସିଲା ପାଣି। ଖସିଲା ମାଟି ଅତଡା, ଖସିଲା ବଡ଼ ବଡ଼ ପଥର। ଅବିଶ୍ରାନ୍ତ ବର୍ଷା ପରେ କଳିଙ୍ଗା ଘାଟିରେ ଭୂସ୍ଖଳନ। କନ୍ଧମାଳ ଜିଲ୍ଲାରେ ପ୍ରବଳ ବର୍ଷା ପରେ ଘାଟି ରାସ୍ତାରେ ଏମିତି ବିଭୀଷିକା ଦେଖିବାକୁ ମିଳିଛି। ପାହାଡ଼ି ଇଲାକାର ଅଣଓସାରିଆ ରାସ୍ତାରେ ଚାରିଆଡ଼େ ଗଦେଇ ହୋଇ ପଡ଼ିଛି ମାଟି ଅତଡା। ମୂଷଳଧାରାରେ ବର୍ଷା ପରେ ବହୁ ଛୋଟ ବଡ଼ ପଥର ସାଙ୍ଗକୁ କାଦୁଅର ଆସ୍ତରଣ ଓ ପାହାଡ଼ରୁ ଝରୁଛି ପାଣିର ପ୍ରଖର ସୁଅ।
ଭୂସ୍ଖଳନ ପରେ କଳିଙ୍ଗା ଘାଟି ରାସ୍ତା ଅବରୋଧ ହୋଇଛି। ବାଧାପ୍ରାପ୍ତ ହୋଇଛି ଯାତାୟତ। କନ୍ଧମାଳରୁ ଗଞ୍ଜାମ ଜିଲ୍ଲାକୁ ଯୋଗାଯୋଗ ସମ୍ପୂର୍ଣ୍ଣ ଠପ୍ ହୋଇଛି। ରାସ୍ତାର ଉଭୟ ପାର୍ଶ୍ବରେ ବହୁ ଗାଡ଼ିମୋଟର ଅଟକି ରହିଛି। ଦୂରଦୂରାନ୍ତକୁ ଯିବାକୁ ଥିବା ଯାତ୍ରୀ ହୀନସ୍ତା ଭୋଗୁଛନ୍ତି।
