jmjnewso
ଚିକିଟୀରେ ଯୁଗ୍ମ ଅଭିଯୋଗ ଶୁଣାଣି
*ପ୍ରଚାର ପ୍ରସାର ଅଭାବରୁ ଖାଁ ଖାଁ ଶିବିର
*ପାଣି ଟୋପେ ପାଇଁ ଡହଳବିକଳ ହେଲେ ଅଭିଯୋଗକାରୀ
*ଅବ୍ୟବସ୍ଥା ଖାଦ୍ୟ ଯୋଗାଣ, ନିଅଣ୍ଟିଆ ପ୍ରକ୍ରିୟାରୁ ଭୋକରେ ଫେରିଲେ କର୍ମଚାରୀ
ଜେଏମଜେ ବ୍ୟୁରୋ : ଗଞ୍ଜାମ ଜିଲ୍ଲା ପ୍ରଶାସନର ନିର୍ଦ୍ଦେଶାନୁସାରେ ଆଜି ଚିକିଟୀ ବ୍ଲକ ଅଫିସ ପରିସରର ସମ୍ମିଳନୀ କକ୍ଷରେ ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକଙ୍କ ଯୁଗ୍ମ ଅଭିଯୋଗ ଶୁଣାଣି ଶିବିର ଅନୁଷ୍ଠିତ ହୋଇଥିଲା । ସାଧାରଣ ଜନତାଙ୍କ ହୃଦୟରେ ସଂଚିତ ଅସୁବିଧା ଓ ଅସନ୍ତୋଷକୁ ଅନୁଧ୍ୟାନ କରିବା ପାଇଁ ପ୍ରଶାସନୀୟ ମଞ୍ଚ ତିଆରି ହୋଇଥିଲେ ମଧ୍ୟ ଉଚ୍ଚସ୍ତରୀୟ ଅଧିକାରୀଙ୍କ ଅନୁପସ୍ଥିତି ଶିବିରକୁ କିଛି ପର୍ଯ୍ୟାୟରେ ଅପୂର୍ଣ୍ଣ କରିଦେଇଥିବା ଲକ୍ଷ୍ୟ କରାଯାଇଛି । ଜିଲ୍ଲାପାଳ ଓ ଏସପିଙ୍କ ଅନୁପସ୍ଥିତି ରେ ଉପଜିଲ୍ଲାପାଳ ଶ୍ରୀ ଦେବବ୍ରତ ପଣ୍ଡା, ସହାୟକ ଜିଲ୍ଲାପାଳ ଶ୍ରୀ ପ୍ରଦୀପ କୁମାର ଜେନା, ଏସଡିପିଓ ଶ୍ରୀ ବିଶ୍ୱାମିତ୍ର ହରପାଲ, ଗୋଷ୍ଠୀ ଉନ୍ନୟନ ଅଧିକାରୀ ଶ୍ରୀ ମଧୁସୂଦନ ମିଶ୍ର ତହସିଲଦାର ଶ୍ରୀ ବିଶ୍ୱରଂଜନ କଂହର ଓ ବ୍ଲକ ଅଧ୍ୟକ୍ଷ ଶ୍ରୀ ଆପନ୍ନା ସେଠୀ ମଞ୍ଚାସିନ ହୋଇ ଅଭିଯୋଗ ଶୁଣିଥିଲେ। ଉକ୍ତ ଶିବିରରେ ପୋଲିସ,ସ୍ୱାସ୍ଥ୍ୟ, ଶିକ୍ଷା, ଜଙ୍ଗଲ, ଯୋଗାଣ, ଆବାସ ଓ ଜଳସେଚନ ଆଦି ସମସ୍ତ ଲାଇନ ବିଭାଗର ଅଧିକାରୀମାନେ ଉପସ୍ଥିତ ଥିଲେ। ଶିବିରରେ ଉପସ୍ଥିତ ଅଧିକାରୀଙ୍କ ଯେପରି ଭିଡ଼ ଥିଲା ତା ତୁଳନାରେ ଅଭିଯୋଗକାରୀଙ୍କ ଭିଡ଼ ଅଭାବୀ ଲାଗୁଥିଲା।
ପ୍ରଚାର ପ୍ରସାରର ଅଭାବରେ ଅନେକ ଲୋକ ଶିବିର ସମ୍ପର୍କରେ ଅଜ୍ଞ ଥିବା ଅଭିଯୋଗ କରିଛନ୍ତି । ଶିବିରଟି ଖାଁ ଖାଁ ଅନୁଭବ ହେଉଥିବା ବେଳେ ଅଭିଯୋଗ ଗୁଡିକ ଶୀଘ୍ର ଓ ସୁବିଧାଜନକ ଭାବେ ସମାଧାନ ହୋଇପାରିଥିବା ସୂଚନା ମିଳିଛି । ଅନେକ ବିଭାଗର ଗୋଟିଏ ଵି ଅଭିଯୋଗ ଆସିନଥିବା ବେଳେ, ଯୋଗାଣବିଭାଗର କୁଢ଼ କୁଢ଼ ସମସ୍ୟା ଥିବା ଲକ୍ଷ୍ୟ କରାଯାଇଛି । ଚିକିଟୀ ବ୍ଲକ ରେ ଏହି ବିଭାଗର ସମସ୍ୟା ଦିନକୁଦିନ ବୃଦ୍ଧିପାଇବାକୁ ଲାଗିଛି । ଅନେକ ବୃଦ୍ଧ, ବୃଦ୍ଧା ଓ ବିକଳାଙ୍ଗ ଦୂରଦୂରାନ୍ତ ଗ୍ରାମରୁ ଆସିଥିଲେ ଵି ଖାଦ୍ୟ ଓ ପାନୀୟ ଆୟୋଜନର ଅବ୍ୟବସ୍ଥା ଯୋଗୁଁ ଭୋକଶୋଷରେ ଫେରିଛନ୍ତି
। ଅବଶ୍ୟ କିଛି ଅଭିଯୋଗ ତ୍ୱରିତ ସମାଧାନ ହୋଇଥିଲେ ଵି ଖାଦ୍ୟ-ଦୁର୍ଲଭତା ବଡ଼ କାରଣ ହୋଇ ଠିଆ ହୋଇଥିଲା। ଶିବିରଟିରେ ମୋଟ ୧୨୨ଟି ଅଭିଯୋଗ ହୋଇଥିଲା, ସେଥିରୁ ବ୍ୟକ୍ତିଗତ ୧୧୧ଟି ଓ ସାମୂହିକ ଭାବେ ୧୧ ଟି ଅଭିଯୋଗ ଦାଖଲ ହୋଇଥିଲା। ଉପଜିଲ୍ଲାପାଳ ଆୟୋଜିତ ଶିବିରରେ ଅନେକଗୁଡିଏ ପଟ୍ଟା ବଣ୍ଟନ କରିଥିଲେ।
ଏହି ଶିବିରରେ ହୋଇଥିବା ଅବ୍ୟବସ୍ଥାର ସ୍ଥାୟୀ ସମାଧାନ ନିମନ୍ତେ ଅଞ୍ଚଳ ବାସୀ ଦାବି କରିଛନ୍ତି। ଏଣୁ ସରକାରଙ୍କୁ ଅନୁରୋଧ କରାଯାଉଛି। ଆଗାମୀ ଶିବିରଗୁଡ଼ିକୁ ଅଧିକ ସୁଚିତ୍ର, ସୁସଂଘଟିତ ଓ ଜନସନ୍ତୃପ୍ତିଦାୟୀ କରିବା ପାଇଁ ସ୍ଥାନୀୟ ଲୋକମାନେ ଆଶା ଓ ଅପେକ୍ଷାର ନଜର କରିଥିବା ପ୍ରକାଶ କରିଛନ୍ତି।
