ବାଘ ରେଳ ଷ୍ଟେସନ ଦାବି, ଭୁବନେଶ୍ବରରେ ଜିଏମଙ୍କୁ ଭେଟି ଦାବିପତ୍ର ପ୍ରଦାନ

ବୌଦ୍ଧ : (ପୂର୍ଣ୍ଣ ଚରଣ ସାହୁ )ବାଉଁଶୁଣି ନିର୍ମାଣଧିନ ଖୋର୍ଦ୍ଧା-ବଲାଙ୍ଗିର ରେଳ ଲାଇନ ଅର୍ନ୍ତଗତ ବୌଦ୍ଧ ବ୍ଲକ ମନୁପାଲି ପଞ୍ଚାୟତ କନ୍ଧରିଆପଡା ନିକଟରେ “ବାଘ” ଷ୍ଟେସନ ପାଇଁ ଡିପିଆର ପ୍ରସ୍ତୁତ ହୋଇଥିଲା। ଏଥିପାଇଁ ରେଳବାଇ ପକ୍ଷରୁ ସେଠାରେ ପ୍ରାୟ ୭୨.୦୦ ଏକର ଜମି ଅଧିଗ୍ରହଣ କରାଯାଇଛି। ଏବଂ ଗୋଟିଏ ଗାଁର ଲୋକେ ବିସ୍ଥାପିତ ମଧ୍ୟ ହୋଇଛନ୍ତି। ଏସବୁ ସତ୍ତ୍ୱେ ଏଠାରେ ଷ୍ଟେସନ ସ୍ଥାପନ ହୋଇନଥିବାରୁ ମନୁପାଲି, ବାଉଁଶୁଣୀ, ଅଁଳାପାଲି, ଗୋଛାପଡା, ଗୁନ୍ଦୁଳିଆ, ଶଗଡା, ଖଲିଆପାଲି, ରକ୍ସା ଏବଂ ବରଗୋଛା ଆଦି ପଞ୍ଚାୟତ ସହିତ ସୁବର୍ଣ୍ଣପୁର ଜିଲ୍ଲାର ବୀରମହାରାଜପୁର ଉପଖଣ୍ଡର ଲୋକମାନେ ଏକାଠି ହୋଇ ବାଘ ରେଳ ଷ୍ଟେସନ ସଂଗ୍ରାମ ସମିତି ନାମରେ ଏକ କମିଟି ଗଠନ କରି ଦୁଇ ଦୁଇ ଥର ବୈଠକ କରିବା ସହିତ ବୌଦ୍ଧ ଜିଲ୍ଲାପାଳ ବିଭୁତି ଭୁଷଣ ନାୟକ, କଣ୍ଟାମାଳ ବିଧାୟକ କହ୍ନେଇ ଚରଣ ଡାଙ୍ଗ, ବୌଦ୍ଧ ବିଧାୟକ ତଥା ସରକାରୀ ଦଳ ମୁଖ୍ୟ ସଚେତକ ସରୋଜ ପ୍ରଧାନ, ବିରାମହାରାଜପୁର ବିଧାୟକ ଇଂ ରଘୁନାଥ ଜଗଦଲା, କନ୍ଧମାଳ ସାଂସଦ ସୁକାନ୍ତ ପାଣଗ୍ରାହୀଙ୍କୁ ଦାବିପତ୍ର ପ୍ରଦାନ କରାଯାଇଛି। ଏହି ପରିପ୍ରେକ୍ଷୀରେ ସମିତିର ଏକ ପ୍ରତିନିଧି ମଣ୍ଡଳୀ ଇଷ୍ଟ କୋଷ୍ଟ ରେଲୱେ ସମ୍ବଲପୁରର ମୁଖ୍ୟ ଏଡିଏମ ଆନନ୍ଦ ସିଂହଙ୍କୁ ପୂର୍ବରୁ ଭେଟି ଦାବି ଉପସ୍ଥାପନ କରିବା ସହିତ ଆଜି (ଗୁରୁବାର) ଭୁବନେଶ୍ୱରସ୍ଥିତ ରେଳ ସଦନ ଠାରେ ଇଷ୍ଟ କୋଷ୍ଟ ରେଲୱେର ମହାପ୍ରବନ୍ଧକ ପରମେଶ୍ବର ଫୁଙ୍କ୍ୱାଲଙ୍କୁ ଭେଟି ଦାବିପତ୍ର ପ୍ରଦାନ କରିଛନ୍ତି। ସମିତିର ସଭାପତି କରୁଣାକର ଘଣ୍ଟୁଆଳଙ୍କ ନେତୃତ୍ବରେ ସମ୍ପାଦକ ଇନ୍ଦୁଭୂଷଣ ମହାକୁଳ,  ବିଜେପି ଯୁବନେତା ଓମପ୍ରକାଶ ମିଶ୍ର, ସମିତିର ବରିଷ୍ଠ ସଦସ୍ୟ ନକୁଳ ପ୍ରଧାନ, ଦେବରାଜ ଭୋଇ, ଆହାଲ୍ଲାଦ ଖମାରୀ, ରଞ୍ଜନ ମହାକୁଳ, ରଞ୍ଜିତ କର୍ଣ୍ଣ, ଲୋକନାଥ ସାହୁ ପ୍ରମୁଖ ସାମିଲ ହୋଇ ଏହି ଦାବିପତ୍ର ଦିଆଯାଇଛି ବୋଲି ସମିତି ପକ୍ଷରୁ ଏକ ପ୍ରେସ ବାର୍ତ୍ତାରେ କୁହାଯାଇଛି।