jmjnewso
ଧରାକୋଟ: ଜେଏମଜେ ନ୍ୟୁଜ (ହରିହର ପାଢ଼ୀ ): ଧରାକୋଟ ବ୍ଲକ ଚାରିଛକ ନିକଟସ୍ଥ କୁସଗୁମା ଓଡ଼ିଶା ଆଦର୍ଶ ବିଦ୍ୟାଳୟର ନିର୍ମାଣାଧୀନ ପୁରୁଷ ଛାତ୍ରାବାସରୁ ଲକ୍ଷ ଲକ୍ଷ ଟଙ୍କାର ବୈଦ୍ୟୁତିକ ଓ ଜଳଯୋଗାଣ ସାମଗ୍ରୀ ଚୋରି ହୋଇଥିବା ନେଇ ବଡ଼ଗଡ଼ ଥାନାରେ ଲିଖିତ ଅଭିଯୋଗ ହୋଇଛି। ଚୋରି ହୋଇଥିବା ସାମଗ୍ରୀର ଆନୁମାନିକ ମୂଲ୍ୟ ୧୦ରୁ ୧୨ ଲକ୍ଷ ଟଙ୍କା ହେବ ବୋଲି ଜଣାପଡ଼ିଛି।
ସୂଚନା ଅନୁସାରେ, କୁସଗୁମା ଓଡ଼ିଶା ଆଦର୍ଶ ବିଦ୍ୟାଳୟର ପୁରୁଷ ଛାତ୍ରାବାସ ପ୍ରାୟ ୪ କୋଟି ଟଙ୍କା ବ୍ୟୟରେ ନିର୍ମାଣ ହେଉଛି। ଛାତ୍ରାବାସ ନିର୍ମାଣ କାର୍ଯ୍ୟ ପ୍ରାୟ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ କିଛି ବିଦ୍ୟୁତ ଓ ଜଳଯୋଗାଣ କାର୍ଯ୍ୟ ବାକି ରହିଥିଲା। ଆସନ୍ତା ମଙ୍ଗଳବାର ଦିନ ଛାତ୍ରାବାସ ହସ୍ତାନ୍ତର ପାଇଁ ଦିନ ଧାର୍ଯ୍ୟ ହେବା ପରେ ଠିକାଦାର ଟୁଟୁ ପ୍ରଧାନ ଓ ବିଦ୍ୟୁତ ମିସ୍ତ୍ରୀ ସନ୍ତୋଷ କୁମାର ସାହୁ ଛାତ୍ରାବାସରେ ପହଞ୍ଚିଥିଲେ।
ସେମାନେ ଏକ ନିର୍ଦ୍ଦିଷ୍ଟ କୋଠରୀରେ ରଖାଯାଇଥିବା ବିଦ୍ୟୁତ ସାମଗ୍ରୀ ଆଣିବାକୁ ଯାଇଥିବା ବେଳେ କୋଠରୀର ତାଲା ଭଙ୍ଗା ଯାଇଥିବା ଦେଖିବାକୁ ପାଇଥିଲେ। ଭିତରେ ରଖାଯାଇଥିବା ୪ଟି ଇନଭର୍ଟର, ୪ଟି ବ୍ୟାଟେରୀ, ୨ଟି ପାଣି ମୋଟର, ୨୪ଟି ପଙ୍ଖା, ୨୨ ବଣ୍ଡଲ୍ ୱାୟାରିଂ ତାର, ପାଣି ପାଇପ୍ ଫିଟିଂ ସାମଗ୍ରୀ ସମେତ ବିଭିନ୍ନ ବୈଦ୍ୟୁତିକ ସାମଗ୍ରୀ ଚୋରି ହୋଇଥିବା ଜଣାପଡ଼ିଥିଲା।
ଘଟଣା ସମ୍ପର୍କରେ ଡାକିବଜା ଗ୍ରାମର ବିଦ୍ୟୁତ ମିସ୍ତ୍ରୀ ସନ୍ତୋଷ କୁମାର ସାହୁ ବଡ଼ଗଡ଼ ଥାନାରେ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ପାଇବା ପରେ ବଡ଼ଗଡ଼ ଥାନା ଅଧିକାରୀଙ୍କ ନିର୍ଦ୍ଦେଶକ୍ରମେ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଚୋରି ଘଟଣାରେ ସମ୍ପୃକ୍ତ ଦୁର୍ବୃତ୍ତମାନଙ୍କୁ ଚିହ୍ନଟ କରିବା ସହ ଚୋରି ସାମଗ୍ରୀ ଉଦ୍ଧାର ପାଇଁ ପୋଲିସ ଅନୁସନ୍ଧାନ ଜାରି ରଖିଛି।
