ବିଶ୍ୱ ଆଦିବାସୀ ଦିବସର ଆହ୍ୱାନ

କବିସୂର୍ଯ୍ୟନଗର : ଜେଏମଜେ ନ୍ୟୁଜ (ଡକ୍ଟର ସୁରେନ୍ଦ୍ର ନାଥ ସାହୁ)

ଆଜିର ପୃଥିବୀ ବିପର୍ଯ୍ୟସ୍ତ । ଯେଉଁଆଡ଼କୁ ଦୃଷ୍ଟି ଫେରାଇବ, ଦେଖିବ କେବଳ ହିଂସା, ଦ୍ୱେଷ, କପଟ, ପ୍ରତାରଣା ଓ ଅଶାନ୍ତିର ପ୍ରାଚୀର । ନାହିଁ ଏଠି ସ୍ନେହ, ନାହିଁ ଏଠି ମମତା, ନାହିଁ ଏଠି କରୁଣା, ନାହିଁ ଏଠି ସାମାଜିକ ସୁଖଶାନ୍ତି । ଆଧୁନିକ ମଣିଷ ପ୍ରତାରଣାର ପାହାଡ଼ ଉପରେ ଠିଆହୋଇ ତା’ର ଭଙ୍ଗାଆଇନାରେ ବିକୃତ ମୁଖକୁ ଦେଖିବାକୁ ସାହାସ କରୁଛି । କିନ୍ତୁ ଏପରି ସଂପ୍ରଦାୟ ସୃଷ୍ଟି ଆରମ୍ଭରୁ ଆଜି ପର୍ଯ୍ୟନ୍ତ ଅଛନ୍ତି, ଯେଉଁମାନେ ଏସବୁର ବହୁଉଦ୍ଧ୍ୱର୍ରେ ।

ଏମାନେ ଆମ ଦେଶ ତଥା ସମଗ୍ର ବିଶ୍ୱର ମୂଳ ନିବାସୀ ଏବଂ ଆଦିବାସୀ ନାମରେ ସର୍ବତ୍ର ପରିଚିତ । ଏହି ନାମହିଁ ଯଥେଷ୍ଟ, ଯାହା ଏମାନଙ୍କର ମୂଳ ନିବାସକୁ ସୂଚାଇଥାଏ । ବିଶ୍ୱର ପ୍ରାୟ ୯୦ଦେଶରେ ପାଖାପାଖି ୪୭୬ ନିୟୁତ ଆଦିବାସୀ ବସବାସ କରନ୍ତି । ଏମାନେ ବିଶ୍ୱ ଜନସଂଖ୍ୟାର ୬.୨ପ୍ରତିଶତ । ଭାରତର ପ୍ରାୟ ୭୦୫ରୁ ଅଧିକ ଆଦିବାସୀ ସମ୍ପ୍ରଦାୟ ମଧ୍ୟରୁ ସର୍ବାଧିକ ୬୪ଟି ସମ୍ପ୍ରଦାୟ ଓଡ଼ିଶାରେ ବସବାସ କରନ୍ତି । ସେହିପରି ଭାରତରେ ମୋଟ ୭୫ଟି ପ୍ରାଚୀନତମ ଆଦିବାସୀ ସମ୍ପ୍ରଦାୟ ବାସକରୁଥିବାବେଳେ ଓଡ଼ିଶାରେ ହିଁ ବାସକରନ୍ତି ସର୍ବାଧିକ ୧୩ଟି ଗୋଷ୍ଠୀର ପ୍ରାଚୀନତମ ଆଦିବାସୀ ସମ୍ପ୍ରଦାୟ ।

ଆଦିବାସୀମାନେ ସୂର୍ଯ୍ୟ, ପୃଥିବୀ, ଜଳ, ଜମି, ଜଙ୍ଗଲ, ପାହାଡ଼ପର୍ବତ, ଅଗ୍ନି, ବାୟୁ, ବୃକ୍ଷ, ପଶୁପକ୍ଷୀ ସମେତ ପ୍ରକୃତିର ପ୍ରତ୍ୟେକ ବସ୍ତୁର ଉପାସନା କରିଥାନ୍ତି । ଯାହା ଭାରତ ସମେତ ପୃଥିବୀର ଅନେକ ଦେଶର ଧର୍ମୀୟ ପରମ୍ପରା ସହିତ ସମାନ । ବିଭିନ୍ନ ପର୍ବପର୍ବାଣିରେ ଏମାନଙ୍କ ପୂଜାପର୍ବ, ନୃତ୍ୟଗୀତ, ସମୁଦାୟ ଏକତା ଓ ସହଯୋଗ ଆଦି ସନାତନ ଧର୍ମର ଭାବନାକୁ ଉଜ୍ଜୀବିତ କରାଏ । ଏମାନଙ୍କର ସଂସ୍କୃତି ଓ ପରମ୍ପରା ସର୍ବ ପୁରାତନ । ଏମାନଙ୍କର ସାହସ, ପରାକ୍ରମ, ସ୍ୱାଭିମାନ ଓ ସଂସ୍କୃତି ଯୋଗୁଁ ଆମର ସଂସ୍କୃତି ଆଜି ସୁରକ୍ଷିତ । ତେଣୁ ଆଦିବାସୀ ସଂସ୍କୃତିର ସୁରକ୍ଷା ଆମର ଦାୟିତ୍ୱ । ଏମାନଙ୍କର ଉନ୍ନତି ଓ ଅଧିକାରର ସୁରକ୍ଷା ପାଇଁ ଏବଂ ବିଶ୍ୱ ପରିବେଶ ସୁରକ୍ଷାରେ ଏମାନଙ୍କର ଅବଦାନକୁ ସ୍ୱୀକାର କରିବା ନିମନ୍ତେ ତଥା ଏମାନଙ୍କର ଗୁରୁତ୍ୱ ଓ ମହାନତାକୁ ମନେପକାଇବା ବିଶ୍ୱ ଆଦିବାସୀ ଦିବସ ପ୍ରତ୍ୟେକ ବର୍ଷ ଅଗଷ୍ଟ ମାସ ୯ତାରିଖ ଦିନ ପାଳିତ ହୋଇଆସୁଛି । ଆଦିବାସୀଙ୍କ ନିମନ୍ତେ ୧୯୮୨ମସିହାରେ ଜେନେଭାଠାରେ ଅନୁଷ୍ଠିତ ହୋଇଥିବା ଜାତିସଂଘ ବୈଠକରେ ଏହି ଦିବସର ପରିକଳ୍ପନା କରାଯାଇଥିଲା ।

ଜାତିସଂଘର ଘୋଷଣା ପରେ ୧୯୯୪ ମସିହାଠାରୁ ଅଗଷ୍ଟ ମାସ ୯ତାରିଖ ଦିନ ସମଗ୍ର ବିଶ୍ୱରେ ବିଶ୍ୱ ଆଦିବାସୀ ଦିବସ ପାଳନ କରାଯାଉଅଛି । ଏହି ଅବସରରେ ଆମେ ଆଜି ପାଳନ କରିବାକୁ ଯାଉଛେ ଆମର ବହୁ ପ୍ରତୀକ୍ଷିତ ୩୩ତମ ବିଶ୍ୱ ଆଦିବାସୀ ଦିବସ, ଆମର ପ୍ରିୟ ଆଦିବାସୀ ଭାଇଭଉଣୀଙ୍କ ପାଇଁ ତଥା ଆମର ମୂଳ ନିବାସୀ ବିଶ୍ୱବାସୀଙ୍କ କଲ୍ୟାଣ ପାଇଁ । ଜୟ ଆଦିବାସୀ, ଜୟ ମୂଳ ନିବାସୀ ।

ପ୍ରଧାନଶିକ୍ଷକ ଓ ଜନଜାତି ଗବେଷକ
କବିସୂର୍ଯ୍ୟନଗର, ଗଂଜାମ
୯୪୩୮୦୬୦୦୩୮