jmjnewso
ଜେଏମଜେ ବ୍ୟୁରୋ : ଆମ ଖାଦ୍ୟ ଥାଳିରେ ପୁଷ୍ଟିକର ଖାଦ୍ୟ ଯେତିକି, ତା’ଠାରୁ ଅଧିକ ରହିଛି କି ଅପମିଶ୍ରଣର ଭୟ? ତେଲଠାରୁ କ୍ଷୀର, ପନିରଠାରୁ ମସଲା ଏବଂ ଗୁଡ଼, ଘିଅ, ଅଟା ଅନେକ ଖାଦ୍ୟରେ ଅପମିଶ୍ରଣର ଅଭିଯୋଗ। ଭେଜାଲ୍ ଧରାପଡ଼ୁଛି, ନମୁନା ଅପମିଶ୍ରିତ ବୋଲି ପ୍ରମାଣିତ ବି ହେଉଛି, ହେଲେ ଫୌଜଦାରୀ ମାମଲାରେ ଦଣ୍ଡାଦେଶ ଶୂନ। ସଂସଦରେ ଉପସ୍ଥାପିତ FSSAIର ତଥ୍ୟ ଓ ରାଜ୍ୟର ଖାଦ୍ୟ ନମୁନା ପରୀକ୍ଷା ରିପୋର୍ଟ ଖୋଲିଛି ଓଡ଼ିଶାର ଅପମିଶ୍ରଣ ଖାଦ୍ୟର ଚିନ୍ତାଜନକ ଚିତ୍ର।
ଆପଣଙ୍କ ଥାଳିରେ ପହଞ୍ଚୁଥିବା ଖାଦ୍ୟ କେତେ ଶୁଦ୍ଧ? ଦେଖିଲେ ହୁଏତ ଜଣାପଡ଼ିବନି। ପରୀକ୍ଷା ହେଲେ ହିଁ ସ୍ପଷ୍ଟ ହେବ ଖାଦ୍ୟ ଶୁଦ୍ଧ ନା ଅପମିଶ୍ରିତ? କ୍ଷୀରଠାରୁ ପନିର, ମସଲାଠାରୁ ଗୁଡ଼, ଘିଅଠାରୁ ଅଟା, ଅନେକ ଖାଦ୍ୟରେ ଅପମିଶ୍ରଣର ଚିତ୍ର ସାମ୍ନାକୁ ଆସୁଛି। ଘରର ରୋଷେଇଘରଠାରୁ ହୋଟେଲ୍, ଦୋକାନ ସବୁଠି ଅପମିଶ୍ରିତ ଖାଦ୍ୟ। ତାଲିକା ବି ଲମ୍ବିଚାଲିଛି।
୨୦୨୪-୨୫ରେ ଓଡ଼ିଶାରେ ପରୀକ୍ଷା ହୋଇଥିଲା ୨୨୮୨ଟି ଖାଦ୍ୟ ନମୁନା। ସେଥିରୁ ୨୭୩ଟି ନମୁନା ଅପମିଶ୍ରିତ ବୋଲି ଚିହ୍ନଟ ହୋଇଛି। ଅର୍ଥାତ୍ ପ୍ରାୟ ପ୍ରତି ୧୨ଟି ନମୁନାରୁ ଗୋଟିଏରେ ଅପମିଶ୍ରଣ। ଖୋର୍ଦ୍ଧାରେ ଅପମିଶ୍ରିତ ନମୁନା ସଂଖ୍ୟା ସର୍ବାଧିକ। ଏହା ସହ ମୟୂରଭଞ୍ଜ, ରାୟଗଡ଼ା, ଭଦ୍ରକ, କଟକ ଓ ଗଞ୍ଜାମରୁ ମଧ୍ୟ ଚିହ୍ନଟ ହୋଇଛି ଅପମିଶ୍ରିତ ଖାଦ୍ୟ ନମୁନା। ଅଭିଯୋଗ ଆସିଲେ ଚଢ଼ାଉ କରୁଛନ୍ତି ଖାଦ୍ୟ ସୁରକ୍ଷା ଅଧିକାରୀ। ନମୁନା ସଂଗ୍ରହ ହେଉଛି। ଅପମିଶ୍ରିତ ଖାଦ୍ୟ ନଷ୍ଟ କରାଯାଉଛି। ଜରିମାନା ବି ଆଦାୟ ହେଉଛି। କିନ୍ତୁ ଦଣ୍ଡାଦେଶ ଶୂନ।
