jmjnewso
ଭୁବନେଶ୍ୱର : ଜେଏମଜେ ନ୍ୟୁଜ : ପଞ୍ଚାୟତ ନିର୍ବାଚନ ପାଇଁ ଭଣ୍ଡାର ଖୋଲିଛନ୍ତି ସରକାର । ଗାଁରେ ମିଳିବ ସହରର ସବୁ ସୁବିଧା । ପ୍ରତି ଗାଁରେ ନିର୍ମାଣ ହେବ ଆଦର୍ଶ କଲ୍ୟାଣ ମଣ୍ଡପ, ଆଦର୍ଶ ଖେଳ ପଡ଼ିଆ ଆଉ ଆଦର୍ଶ ପାଠାଗାର । ପଞ୍ଚାୟତିରାଜ ବିଭାଗ ପ୍ରତି ପଞ୍ଚାୟତରେ ବିକାଶମୂଳକ ପ୍ରକଳ୍ପରେ ଖର୍ଚ୍ଚ କରିବ ଦେଢ କୋଟିରୁ ୩ କୋଟି ଟଙ୍କା ।ଯେଉଁ ପଞ୍ଚାୟତରେ ଜନସଂଖ୍ୟା ଅଧିକ ସେଠି ଖର୍ଚ୍ଚ ହେବ ଅଧିକ ପାଣ୍ଠି । ଏଥିପାଇଁ ରୋଡମ୍ୟାପ୍ ପ୍ରସ୍ତୁତ କରିଛି ପଞ୍ଚାୟତିରାଜ ବିଭାଗ । ୨୦୨୭ ପଞ୍ଚାୟତ ନିର୍ବାଚନ ପୂର୍ବରୁ ସରକାର ଏହି ପ୍ରକଳ୍ପର ଶ୍ରୀଗଣେଶ କରି ଲୋକଙ୍କ ମନ ଜିଣିବେ । ନିଜ ସପକ୍ଷରେ ଭିଡିବେ ଭୋଟ୍ ।
ସରକାର ଆରମ୍ଭ କରିବେ ଗ୍ରାମ ସମ୍ପଦ କାର୍ଯ୍ୟକ୍ରମ । ଗାଁର ବିକାଶ ପାଇଁ ସବୁ ଯୋଜନାକୁ ଦେବେ ବାସ୍ତବ ରୂପ । ପଞ୍ଚାୟତିରାଜ ମନ୍ତ୍ରୀ ରବି ନାରାୟଣ ନାୟକ ଗଣମାଧ୍ୟମକୁ ସୂଚନା ଦେଇ କହିଛନ୍ତି, ଲୋକଙ୍କ ସରକାର ଗାଁର ବିକାଶ ପାଇଁ ସଂକଳ୍ପବଦ୍ଧ। ସହରର ସମସ୍ତ ସୁବିଧା କିଭଳି ଗାଁରେ ବି ମିଳିବ ତାର ମାର୍ଗଦର୍ଶିକା ବିଭାଗ ପ୍ରସ୍ତୁତ କରିଛି । ଗ୍ରାମସଭା ବସିବ, ପ୍ରକଳ୍ପକ ଅନୁମୋଦନ ମିଳିବା ପରେ ଆରମ୍ଭ ହେବ କାମ । ସରକାର ଗ୍ରାମାଞ୍ଚଳରେ ଭିତ୍ତିଭୂମିକୁ ଅଧିକ ସୁଦୃଢ କରିବେ । ଲୋକଙ୍କ ପାଖରେ ପହଞ୍ଚାଇବେ ସମସ୍ତ ମୌଳିକ ସେବା । ମନ୍ତ୍ରୀଙ୍କ ଏହି ସୂଚନା ପରେ ସରକାର ଯେ, ମିଶନ ମୋଡରେ ପଞ୍ଚାୟତ ଭୋଟ୍ କୁ ଓହ୍ଲାଇବେ ତାର ସୂଚନା ମିଳିଛି ।
ପଞ୍ଚାୟତରେ ମିଳିବ ଏହି ସବୁ ସହରୀ ସୁବିଧା
-ପଞ୍ଚାୟତରେ ହେବ ଆଦର୍ଶ ଖେଳ ପଡିଆ, ଆଦର୍ଶ କଲ୍ୟାଣ ମଣ୍ଡପ, ଆଦର୍ଶ ଗ୍ରାମୀଣ ହାଟ, ଆଦର୍ଶ ପୋଖରୀ, ଆଦର୍ଶ ମଣ୍ଡପ, ସ୍ମଶାନ, ଆଦର୍ଶ ହାଟ, ଗ୍ରାମୀଣ ପାର୍କ
-ଆଦର୍ଶ ଖେଳ ପଡିଆ ପାଇଁ ୭୫ ଲକ୍ଷ ଟଙ୍କା ଖର୍ଚ୍ଚ କରିବେ ସରକାର, ଗ୍ରାମସଭା ଆଧାରରେ ହେବ କାମ
-ଗାଁ ଯୁବକଙ୍କ ପାଇଁ ତିଆରି ହେବ ଜିମ୍
-ଆଦର୍ଶ କଲ୍ୟାଣ ମଣ୍ଡପ ପାଇଁ ୪୯ ଲକ୍ଷ ଦେବେ ସରକାର
-70*32 ଫୁଟରେ ଦୁଇ ଗ୍ରୀନ ରୁମ ସହ ଏକ ପେଣ୍ଡାଲ ରହିବ
-ନାଚ, ଗୀତ, ଡ୍ରାମାର ସୁବିଧା ରହିବ, ଭୋଜିଭାତ ସହ ପଞ୍ଚାୟତ ତରଫରୁ ପାଣି ଯୋଗାଇ ଦିଆଯିବ
-ଆଦର୍ଶ ପୋଖରୀ ପାଇଁ ୩୪ ଲକ୍ଷ ପଥର ବନ୍ଧେଇ ସହ ଚାରିପଟେ ଫେବର ବ୍ଲକ ପଡିବ
-ଶ୍ମଶାନ ପାଇଁ ୨୨ ଲକ୍ଷ ଏବଂ ଗ୍ରାମୀଣ ପାର୍କ ପାଇଁ ୨୦ ଲକ୍ଷ ଦେବେ ସରକାର
-ଆଦର୍ଶ ହାଟ ପାନୀୟ ଜଳ ସହ ପ୍ରବେଶ ପାଇଁ ହେବ ଗେଟ୍
-ବୃକ୍ଷ ରୋପଣ କାର୍ଯ୍ୟକ୍ରମରେ ପ୍ରତି ଗ୍ରାମପଞ୍ଚାୟତରେ ଲାଗିବ ୭୦୦ଗଛ
-ଆଦର୍ଶ ପାଠାଗାର ପାଇଁ ୧୦ ଲକ୍ଷ ଦେବେ ସରକାର
-ଗୋଟିଏ ଗାଁରେ ଗୋଟେ କଲ୍ୟାଣ ମଣ୍ଡପ କରିବେ ସରକାର
