ରାଜ୍ୟର ପ୍ରତ୍ୟେକ ବ୍ଲକରେ ପହଞ୍ଚିବ ଓମ୍ଫେଡ ।

ଭୁବନେଶ୍ୱର : ଜେଏମଜେ ନ୍ୟୁଜ : ଖୁବଶୀଘ୍ର ରାଜ୍ୟର ପ୍ରତ୍ୟେକ ବ୍ଲକରେ ପହଞ୍ଚିବ ଓମ୍ଫେଡ । ଏନେଇ ପ୍ରସ୍ତୁତ ହୋଇଛି ସ୍ୱତନ୍ତ୍ର ବ୍ଲୁପ୍ରିଣ୍ଟ । ରାଜ୍ୟର ସମସ୍ତ ୩୧୪ଟି ବ୍ଲକରେ ଓମ୍ଫେଡର ସମସ୍ତ ଉତ୍ପାଦ ପହଞ୍ଚାଇବାକୁ ଲକ୍ଷ୍ୟ ରଖିଛି ଏହି ସରକାରୀ ସଂସ୍ଥା । କେବଳ ବ୍ଲକ ନୁହେଁ, ରାଜ୍ୟର ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର, ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଓ ଜିଲ୍ଲା ମୁଖ୍ୟ ଚିକିତ୍ସାଳୟରେ ମଧ୍ୟ ଓମ୍ଫେଡର ସ୍ୱତନ୍ତ୍ର ବୁଥ୍ ଖୋଲିବାକୁ ଯୋଜନା ହୋଇଛି ।ଏନେଇ ସ୍ୱାସ୍ଥ୍ୟ ବିଭାଗ ସହ ଆଲୋଚନା ହୋଇଥିବା ସୂଚନା ମିଳିଛି ।
ଏହି ଯୋଜନା ଦ୍ୱାରା ରାଜ୍ୟର ଦୂରଦୂରାନ୍ତ ଅଞ୍ଚଳରେ ମଧ୍ୟ ଓମ୍ଫେଡର ଉତ୍ପାଦ ସହଜରେ ଉପଲବ୍ଧ ହୋଇପାରିବ । ଅନ୍ତର୍ଜାତୀୟ ବଜାରରେ ତୈଳ ସଙ୍କଟର ପ୍ରଭାବ ଦୁଗ୍ଧ ଚାଷୀଙ୍କ ଉପରେ ମଧ୍ୟ ପଡ଼ିଛି । ଦୁଗ୍ଧଜାତ ସାମଗ୍ରୀ ଉତ୍ପାଦନ ପାଇଁ ଆବଶ୍ୟକ ସାମଗ୍ରୀର ଦର ପ୍ରାୟ ୨୫ ପ୍ରତିଶତ ବଢ଼ିଛି । ଫଳରେ ଖର୍ଚ୍ଚ ବଢ଼ିବାକୁ ନେଇ ଚିନ୍ତାରେ ଥିଲେ ଦୁଗ୍ଧ ଚାଷୀ ।

ଚାଷୀଙ୍କ ସ୍ୱାର୍ଥକୁ ନଜରରେ ରଖି ଏବେ ଦୁଗ୍ଧ ଚାଷୀଙ୍କଠାରୁ କ୍ଷୀର କିଣିବା ଦରରେ ଆଉ ୨ ଟଙ୍କା ବୃଦ୍ଧି କରିବାକୁ ଓମ୍ଫେଡ ଯୋଜନା କରିଛି । ତେବେ ଅନ୍ୟ ରାଜ୍ୟଗୁଡ଼ିକରେ କ୍ଷୀର କିଣା ଦର ଅଧିକ ବଢ଼ାଯାଇଥିବା ବେଳେ ଓଡ଼ିଶାରେ ୨ ଟଙ୍କା ବଦଳରେ ସର୍ବନିମ୍ନ ୫ ଟଙ୍କା ବୃଦ୍ଧି କରାଯାଇଥିଲେ ଦୁଗ୍ଧ ଚାଷୀମାନେ ଅଧିକ ଉପକୃତ ହୋଇଥାନ୍ତେ ବୋଲି ମତ ରଖିଛନ୍ତି ଓଡ଼ିଶା ଦୁଗ୍ଧ ଚାଷୀ ମହାସଂଘର ଅଧ୍ୟକ୍ଷ । ଗୋଟିଏ ପଟେ ରାଜ୍ୟର ପ୍ରତ୍ୟେକ ବ୍ଲକରେ ଓମ୍ଫେଡ ପହଞ୍ଚାଇବାର ଯୋଜନା, ଅନ୍ୟପଟେ ଦୁଗ୍ଧ ଚାଷୀଙ୍କୁ ଅଧିକ ଦର ଦେବା ନେଇ ନିଷ୍ପତ୍ତି । ଏବେ ଏହି ଯୋଜନା କେତେଦୂର ସଫଳ ହେଉଛି, ତାହା ଉପରେ ରହିଛି ନଜର ।