jmjnewso
ଜେଏମଜେ ବ୍ୟୁରୋ : ରାତି ପାହିଲେ ଉତ୍ସବ ମୁଖର ହୋଇଉଠିବ ପଶ୍ଚିମ ଓଡ଼ିଶା । ଘରେ ଘରେ ପାଳନ ହେବ କୃଷିଭିତ୍ତିକ ଗଣପର୍ବ ନୂଆଁଖାଇ । ଚାଲିବ ପୂଜାର୍ଚ୍ଚନା, ସପରିବାର ଏକାଠି ବସି ନବାନ୍ନ ଭକ୍ଷଣ କରିବେ । ତା ସହ ଜମିବ ଲୋକସଂଗୀତ ଓ ନୃତ୍ୟର ଆସର । ଏଥିପାଇଁ ସମ୍ୱଲପୁରରୁ ସୁନ୍ଦରଗଡ଼; ବଲାଙ୍ଗିରରୁ ବରଗଡ଼, ବୌଦ୍ଧରୁ କଳାହାଣ୍ଡି । ସବୁଠି ଚଳଚଞ୍ଚଳ ପରିବେଶ ।ଅଥୟ ହେଲାଣି ମନ… ଅଧୀର ହେଲାଣି ପାଦ। ଢୋଲ୍-ନିଶାନ୍ର ତାଲେ ତାଲେ କାଲି ଦୁଲୁକିବ ପଶ୍ଚିମ ଓଡ଼ିଶା । ଡାଲଖାଇ-ରସରକେଲି ନାଚରେ ଝୁମି ଉଠିବ ପୂରପଲ୍ଲୀ । ରାତି ପାହିଲେ ପଶ୍ଚିମ ଓଡ଼ିଶାର ଗଣପର୍ବ ନୂଆଁଖାଇ । ସେଥିଲାଗି ସଜେଇ ହେଲାଣି ଘର, ସଜେଇ ହେଲାଣି ମନ୍ଦିର । ଜମିଲାଣି ପିଠା ପଣାର ଆସର ।
ବାହାରେ ରହୁଥିବା ଲୋକେ ଘରକୁ ବାହୁଡ଼ିଲେଣି, ବଜାର, ଲୁଗାଦୋକାନରେ ଭିଡ଼ ଜମିଲାଣି । ନୂଆ ଲୁଗା ପିନ୍ଧି ଦେବଦେବୀ ଓ ଗୁରୁଜନଙ୍କ ଆଶୀର୍ବାଦ ନେଇ, ଏକାଠି ନବାନ୍ନ ଖାଇବେ ସପରିବାର । ରାଗରୁଷା ଭୁଲି ଭାଇଚାରାର ରଙ୍ଗରେ ରଙ୍ଗେଇ ହେବେ ସମସ୍ତେ । ଏଇ ଯେମିତି ବଲାଙ୍ଗୀର ଜିଲ୍ଲା ବେଲପଡ଼ା ଡାହିମାଲ ଓ ଜଳିଆ ଗାଁର ଲୋକେ । ବର୍ଷ ବର୍ଷ ଧରି ଏକାଠି ନୂଆଖାଇ ଆସୁଛନ୍ତି ପ୍ରାୟ ୧ ହଜାର ପରିବାରର ୫ ହଜାର ଲୋକ ।
ବଲାଙ୍ଗୀର ଜିଲ୍ଲାରେ ନୂଆଖାଇ ପୂର୍ବ ସଂଧ୍ୟା ଅର୍ଥାତ ଆଜି ଗ୍ରାମଦେବା ଦେବୀ ନିକଟକୁ ଶୋଭାଯାତ୍ରାରେ ଯାଇଛି ନୂଆଧାନ, ପନିପରିବା,ଲୁଗାପଟା । ବିଭିନ୍ନ ସାଂସ୍କୃତିକ ଅନୁଷ୍ଠାନ ପାଳନ କରିଛନ୍ତି ପାହୁର ଯାତ୍ରା। ସେପଟେ ନୂଆଁଖାଇ ପାଇଁ କଳାହାଣ୍ଡିରେ ଅଛି ନିଆରା ପରମ୍ପରା । ଜିଲ୍ଲା ଗୋଟିଏ, କିନ୍ତୁ ୪ ଥର ପାଳନ ହୁଏ ନୂଆଁଖାଇ । କେଉଁଠି ରାଖୀ ପୂର୍ଣ୍ଣିମାରେ, କେଉଁଠି ପଞ୍ଚମୀରେ ତ ଆଉ କେଉଁଠି ଦଶମୀରେ । ପରମ୍ପରା ଭିନ୍ନ ହେଲେ ବି ଭାବନା ସେଇ ଗୋଟିଏ । ନିଜ ମାଟି ସହ ଯୋଡ଼ି ହେବାର ପର୍ବ ନୂଆଖାଇ । ଦୁଃଖ ଥାଉ କି ସମସ୍ୟା… ଅଭାବ ଥାଉ କି ଅସୁବିଧା… ନୂଆଖାଇ ଆସିଲେ ସବୁକିଛି ଭୁଲି ଏକାଠି ହୋଇଯାଆନ୍ତି ପରିବାର ।
ନୂଆଁଖାଇରେ ଜଙ୍ଗଲୀ ପତ୍ରରେ ତିଆରି ଖଲିଦନାର ରହିଛି ବିଶେଷ ମହତ୍ତ୍ୱ । ଏବେ ରାସ୍ତାକଡ଼ରେ ଦେଖିବାକୁ ମିଳୁଛି ଶାଳ, ସର୍ଗି, କୁରେଇ ଓ ଭେଲୁଆଁ ପତ୍ରର ଏହାର ପସରା । ତେଣୁ ଆଦିବାସୀ ମହିଳାମାନେ ଜଙ୍ଗଲରୁ ଏହି ପତ୍ର ପ୍ରସ୍ତୁତ କରି ପରମ୍ପରାକୁ ଜୀବିତ ରଖିବା ସହ, କିଛି ରୋଜଗାର ମଧ୍ୟ କରିଥାନ୍ତି ନୂଆଁଖାଇ ଅବସରରେ । ଏ ହେଉଛି ସୁନ୍ଦରଗଡ଼ ଜିଲ୍ଲା ବିଶ୍ରା ଅଞ୍ଚଳର ଦୃଶ୍ୟ ।ଜିଇଁଛୁ ବେଲକେ ଆସି ଭାଏ ବନ୍ଧୁ, ହେମା ନୂଆଖାଇ ଭେଟ୍ । ସଂସାର ଡୋର୍ ଥି ବନ୍ଧା ହୋଇଥିମା ଗାଁ ଯାକର ହେଇ ମେଟ୍ ।
