jmjnewso
ଜେଏମଜେ ବ୍ୟୁରୋ : ପଶ୍ଚିମ ଓଡ଼ିଶାର ମହାନ କୃଷିଭିତ୍ତିକ ଗଣପର୍ବ ନୂଆଖାଇ ପାଇଁ ସାରା ଅଞ୍ଚଳ ଉତ୍ସବମୁଖର । ଗାଁଠୁ ସହର, ସବୁଠି ଦେଖିବାକୁ ମିଳୁଛି ଆନନ୍ଦ ଓ ଉତ୍ସାହର ମାହୋଲ।ସମ୍ବଲପୁରର ଅଧିଷ୍ଠାତ୍ରୀ ଦେବୀ ମା’ ସମଲେଶ୍ୱରୀଙ୍କ ପୀଠରେ ନିର୍ଦ୍ଧାରିତ ଲଗ୍ନ ପୂର୍ବାହ୍ନ ୯ଟା ୪୦ରୁ ୯ଟା ୫୪ ମିନିଟ୍ ମଧ୍ୟରେ ଅନୁସାରେ ନବାନ୍ନ ଲାଗି ହୋଇଛି ।
ବର୍ଷର ପ୍ରଥମ ଅମଳ ଶସ୍ୟରୁ ପ୍ରସ୍ତୁତ ଭୋଗ ମା’ଙ୍କ ନିକଟରେ ଅର୍ପଣ କରାଯାଇଛି । ଏହାପରେ ୧୧୫ ପାର୍ଶ୍ୱ ଦେବାଦେବୀଙ୍କ ନିକଟରେ ମଧ୍ୟ ନବାନ୍ନ ଲାଗି କରାଯାଇଛି ।ଏହି ଅବସରରେ ମା’ ସମଲେଶ୍ୱରୀଙ୍କ ଦର୍ଶନ ପାଇଁ ମନ୍ଦିରରେ ଶ୍ରଦ୍ଧାଳୁଙ୍କ ଭିଡ଼ ମଧ୍ୟ ଦେଖିବାକୁ ମିଳିଛି।ନୂଆ ଧାନର ପ୍ରଥମ ଅର୍ଘ୍ୟ ମା’ଙ୍କୁ ଅର୍ପଣ କରି ସୁଖ, ଶାନ୍ତି ଓ ସମୃଦ୍ଧି କାମନା କରିଛନ୍ତି ଶ୍ରଦ୍ଧାଳୁ।
ଇଷ୍ଟଦେବୀଙ୍କ ନିକଟରେ ନବାନ୍ନ ଅର୍ପଣ ପରେ ପରିବାର ସହ ଏକାଠି ନୂଆ ଖାଇଛନ୍ତି ପଶ୍ଚିମ ଓଡ଼ିଶାବାସୀ । ନୂଆଖାଇ ପାଇଁ ଦୂରଦୂରାନ୍ତରେ ରହୁଥିବା ପରିବାର ସଦସ୍ୟମାନେ ଘରକୁ ଫେରିଥିବାରୁ ସବୁଠି ଦେଖିବାକୁ ମିଳୁଛି ପରିବାରର ମିଳନ ଓ ଖୁସିର ପରିବେଶ। ନୂଆ ଲୁଗା ପିନ୍ଧି ପାରମ୍ପରିକ ରୀତିନୀତିରେ ନୂଆଖାଇ ପାଳନ କରୁଛନ୍ତି ଲୋକେ । ଘରେ ଘରେ ଭଳିକି ଭଳି ପିଠାପଣାର ଆସର ଜମିଥିବା ବେଳେ ସୁସ୍ୱାଦୁ ବ୍ୟଞ୍ଜନର ମହକରେ ମହକି ଉଠୁଛି ପରିବେଶ । ଅନ୍ୟପଟେ ଘଣ୍ଟ, ଘଣ୍ଟା ଓ ପଞ୍ଚବାଦ୍ୟରେ କମ୍ପୁଛି ଗାଁଠୁ ସହର । ବିଭିନ୍ନ ସ୍ଥାନରେ ନାଚଗୀତ ଓ ସାଂସ୍କୃତିକ ଆସର ଜମିଥିବା ବେଳେ ନୂଆଖାଇର ଉତ୍ସବୀୟ ମାହୋଲରେ ଝୁମୁଛି ସାରା ପଶ୍ଚିମ ଓଡ଼ିଶା ।
