jmjnewso
ଆସିକା: ଜେଏମଜେ ନ୍ୟୁଜ (ହରିହର ପାଢ଼ୀ ): : ନିରକ୍ଷରଙ୍କୁ ସାକ୍ଷର କରି ସମାଜର ମୁଖ୍ୟସ୍ରୋତରେ ସାମିଲ କରିବା ଲକ୍ଷ୍ୟରେ ଚାଲିଥିବା ନବ ଭାରତ ସାକ୍ଷରତା କାର୍ଯ୍ୟକ୍ରମ ‘ଉଲ୍ଲାସ’ (ULLAS) ଅଧୀନରେ ଆଜି ଆସିକା ବ୍ଲକର ବିଭିନ୍ନ କେନ୍ଦ୍ରରେ ପରୀକ୍ଷା ଅନୁଷ୍ଠିତ ହୋଇଛି।
ଆସିକା ବ୍ଲକର ପିଏମ୍ ଶ୍ରୀ ଗ୍ରାମପଞ୍ଚାୟତ ନୋଡାଲ ଉଚ୍ଚ ବିଦ୍ୟାଳୟ, ଦେବଭୂମି ସମେତ ମୋଟ ୧୫୨ଟି କେନ୍ଦ୍ରରେ ୬,୮୫୫ ଜଣ ନବସାକ୍ଷର ପରୀକ୍ଷାର୍ଥୀ ନାମ ଲେଖାଇ ପରୀକ୍ଷା ଦେଇଥିଲେ। ଏଥିରେ ୧୫ ବର୍ଷରୁ ୭୫ ବର୍ଷ ବୟସ ପର୍ଯ୍ୟନ୍ତ ବ୍ୟକ୍ତିମାନେ ଉତ୍ସାହର ସହh ଅଂଶଗ୍ରହଣ କରିଥିଲେ। ବିଦ୍ୟାଳୟ ର ପ୍ରଧାନ ଶିକ୍ଷକ ସୁଶାନ୍ତ କୁମାର ପଣ୍ଡା ଙ୍କ ସମେତ ଅନେକ ଶିକ୍ଷକ ଶିକ୍ଷୟତ୍ରୀ ସହଯୋଗ କରିଥିଲେ l
ରାଷ୍ଟ୍ରୀୟ ଶିକ୍ଷା ନୀତି-୨୦୨୦ ଅନୁଯାୟୀ ଚାଲିଥିବା ଏହି କାର୍ଯ୍ୟକ୍ରମରେ କେବଳ ପଢ଼ିବା, ଲେଖିବା ଓ ମୌଳିକ ଗଣିତ ଜ୍ଞାନ ନୁହେଁ, ବରଂ ଡିଜିଟାଲ୍ ଓ ଆର୍ଥିକ ସାକ୍ଷରତା, ଆଇନଗତ ସଚେତନତା, ସ୍ୱାସ୍ଥ୍ୟ ଓ ପରିବାର କଲ୍ୟାଣ, ଶିଶୁ ସୁରକ୍ଷା ସହ ବିଭିନ୍ନ ଜୀବନ କୌଶଳ ଉପରେ ମଧ୍ୟ ଶିକ୍ଷା ପ୍ରଦାନ କରାଯାଉଛି।
ସ୍ୱେଚ୍ଛାସେବୀ, ଶିକ୍ଷକ ଓ ଛାତ୍ରଛାତ୍ରୀଙ୍କ ସହଯୋଗରେ ଚାଲିଥିବା ଏହି ଅଭିଯାନ ମାଧ୍ୟମରେ ବୟସ୍କ ନିରକ୍ଷରମାନଙ୍କ ମଧ୍ୟରେ ଶିକ୍ଷା ପ୍ରତି ଆଗ୍ରହ ବଢ଼ିବା ସହ ସ୍ୱାବଲମ୍ବନ ଓ ସଚେତନତା ବୃଦ୍ଧି ପାଇବ ବୋଲି ଆଶା କରାଯାଉଛି।
