jmjnewso
ଆସିକା: ଜେଏମଜେ ନ୍ୟୁଜ ( ହରିହର ପାଢ଼ୀ ): ଆସିକା ବ୍ଲକ ଅନ୍ତର୍ଗତ ନିମିନା ପଞ୍ଚାୟତରେ ପାରମ୍ପରିକ ନଳ ଯାତ୍ରା ଧାର୍ମିକ ରୀତିନୀତି ଓ ଭକ୍ତିମୟ ପରିବେଶରେ ସମାପ୍ତ ହୋଇଛି। କୃଷି କ୍ଷେତ୍ରରେ ଭଲ ଫସଲ, ରୋଗପୋକ ନିୟନ୍ତ୍ରଣ, ପର୍ଯ୍ୟାପ୍ତ ବର୍ଷା ଓ ପଶୁସମ୍ପଦର ସୁରକ୍ଷା କାମନା କରି ଗ୍ରାମବାସୀଙ୍କ ପକ୍ଷରୁ ପ୍ରତିବର୍ଷ ଏହି ପାରମ୍ପରିକ ପୂଜା ଅନୁଷ୍ଠିତ ହୋଇଆସୁଛି।
ଏହି ଅବସରରେ ରଙ୍ଗଚିଟିଆ ପାହାଡ଼ର ଅଗ୍ରଭାଗରେ ଥିବା ବନଦୁର୍ଗା, ପାହାଡ଼ ପାଦଦେଶର କନ୍ଧୁଣି ଦେବୀ ଏବଂ ଗ୍ରାମ ମଧ୍ୟରେ ଅବସ୍ଥିତ ମା’ ରତନେଇଙ୍କ ନିକଟରେ ବିଧିବିଧାନ ଅନୁଯାୟୀ ପୂଜାର୍ଚ୍ଚନା କରାଯାଇଥିଲା। ତିନୋଟି ନୂତନ ନଳକୁ ଚନ୍ଦନ, ସିନ୍ଦୂର, ଫୁଲମାଳ, ଧୂପ, ଦୀପ ଓ ନୈବେଦ୍ୟ ଅର୍ପଣ କରି ଶ୍ରଦ୍ଧାର ସହ ପୂଜା କରାଯାଇଥିଲା।
ଚାଷ ପାଇଁ ଇନ୍ଦ୍ରଦେବଙ୍କ କୃପାରେ ସମୟୋପଯୋଗୀ ବର୍ଷା, ଚାଷଜମିରେ ରୋଗପୋକର ପ୍ରାଦୁର୍ଭାବ ନ ହେବା ଏବଂ ଗ୍ରାମବାସୀଙ୍କ ପଶୁସମ୍ପଦର ସୁରକ୍ଷା ପାଇଁ ଏହି ପୂଜାର ବିଶେଷ ମହତ୍ତ୍ୱ ରହିଥିବା ଗ୍ରାମବାସୀ କହିଛନ୍ତି।
ନଳ ଯାତ୍ରାର ସଫଳ ଆୟୋଜନରେ ଭଗବାନ ଚର୍ଚ୍ଚି, ଟୁକୁନା ପ୍ରଧାନ, ସିଲୁ ଜେନା, ଶିବ ନାହାକ, ବିଟୁ ଚର୍ଚ୍ଚି, କଙ୍ଗାରୁ ଚର୍ଚ୍ଚି, ନରସିଂହ ନାହାକ, ଧୋବା ପ୍ରଧାନ, ବିପିନ ନାୟକ, ଶଙ୍କର ସାହୁ, ମଦନ ସାହୁ, ସିମାଞ୍ଚଳ ନାହାକଙ୍କ ସମେତ ବହୁ ଗ୍ରାମବାସୀ ସହଯୋଗ କରିଥିଲେ।
