jmjnewso
ଜେଏମଜେ ବ୍ୟୁରୋ : ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ କ୍ଷେତ୍ର ଧୀରେ ଧୀରେ ସଂଗଠିତ ହେଉଛି। ପୂର୍ବ ଓ ମଧ୍ୟ ବଙ୍ଗୋପସାଗର ସହ ନିକଟସ୍ଥ ଆଣ୍ଡାମାନ ସାଗର ଅଞ୍ଚଳରେ ଘନ ମେଘପୁଞ୍ଜ ଦେଖାଯାଉଥିବା ବେଳେ, ଉପଗ୍ରହ ଚିତ୍ରରେ ପ୍ରଣାଳୀର ମଧ୍ୟଭାଗରେ ଘନ ମେଘ ଓ ବକ୍ରାକାର ମେଘପଟି ଦେଖାଯାଇଛି। ଏଥିରୁ ପାଣିପାଗ ପ୍ରଣାଳୀଟି ଅଧିକ ସଂଗଠିତ ହେଉଥିବା ସଙ୍କେତ ମିଳୁଛି।ଭାରତୀୟ ପାଣିପାଗ ବିଭାଗର ଅପଡେଟ୍ ଅନୁସାରେ, ଉତ୍ତର ଆଣ୍ଡାମାନ ସାଗର ଓ ଏହାର ଆଖପାଖରେ ଗଠିତ ଲଘୁଚାପଟି ପଶ୍ଚିମ-ଉତ୍ତରପଶ୍ଚିମ ଦିଗକୁ ଗତି କରିବ। ୨୧ ସେପ୍ଟେମ୍ବର ସୁଦ୍ଧା ଏହା ଡିପ୍ରେସନ୍ ଏବଂ ୨୨ ସେପ୍ଟେମ୍ବରରେ ପଶ୍ଚିମ-ମଧ୍ୟ ବଙ୍ଗୋପସାଗର ଉପରେ ଡିପ୍ ଡିପ୍ରେସନ୍ରେ ପରିଣତ ହୋଇପାରେ।
ପରେ ଏହା ଦକ୍ଷିଣ ଓଡ଼ିଶା-ଉତ୍ତର ଆନ୍ଧ୍ର ଉପକୂଳ ଆଡ଼କୁ ଗତି କରିବାର ସମ୍ଭାବନା ରହିଛି। ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକଙ୍କ ଆକଳନ ଅନୁସାରେ, ପ୍ରଣାଳୀଟି ଡିପ୍ ଡିପ୍ରେସନ୍ ଭାବେ ସର୍ବାଧିକ ଶକ୍ତି ପାଇବାର ସମ୍ଭାବନା ଅଧିକ। ତେବେ ଯଦି ଏହା ଆଶାଠାରୁ ଅଧିକ ସମୟ ସମୁଦ୍ର ଉପରେ ରହିଥାଏ, ତେବେ ଅଳ୍ପ ସମୟ ପାଇଁ ସାଇକ୍ଲୋନିକ୍ ଷ୍ଟର୍ମର ରୂପ ନେଇପାରେ। ଏହାଠାରୁ ଅଧିକ ଶକ୍ତିଶାଳୀ ହେବାର ସମ୍ଭାବନା ବର୍ତ୍ତମାନ କମ୍ ବୋଲି ସେ କହିଛନ୍ତି । ଡିପ୍ ଡିପ୍ରେସନ୍ ସମୟରେ ପବନର ବେଗ ଘଣ୍ଟାପିଛା ୫୦ରୁ ୬୦ କିମି ଏବଂ ଝଟକାରେ ୬୫ରୁ ୭୫ କିମି ପର୍ଯ୍ୟନ୍ତ ରହିପାରେ। ଯଦି ଅଳ୍ପ ସମୟ ପାଇଁ ସାଇକ୍ଲୋନିକ୍ ଷ୍ଟର୍ମ ହୁଏ, ତେବେ ପବନର ବେଗ ୬୦ରୁ ୭୦ କିମି ଏବଂ ଝଟକାରେ ୮୦ରୁ ୯୦ କିମି ପର୍ଯ୍ୟନ୍ତ ପହଞ୍ଚିପାରେ ।ସ୍ଥଳଭାଗ ନିକଟକୁ ଆସିବା ପରେ ୬ରୁ ୧୨ ଘଣ୍ଟା ମଧ୍ୟରେ ପବନର ବେଗରେ ପ୍ରାୟ ୧୦ରୁ ୨୦ କିମି ପର୍ଯ୍ୟନ୍ତ ହ୍ରାସ ହୋଇପାରେ। ତଥାପି ଉପକୂଳବର୍ତ୍ତୀ ଅଞ୍ଚଳରେ ଜୋରଦାର ପବନ ଓ ଝଟକା ଅନୁଭୂତ ହୋଇପାରେ। ଏହି ପର୍ଯ୍ୟାୟରେ ଜିଲ୍ଲା ଅନୁସାରେ ନିର୍ଦ୍ଦିଷ୍ଟ ପବନର ବେଗ କହିବା ସମ୍ଭବ ନୁହେଁ ବୋଲି ପ୍ରଫେସର ପଶୁପାଳକ କହିଛନ୍ତି। ଏପଟେ ଲଘୁଚାପ ପ୍ରଭାବରେ ଓଡ଼ିଶାରେ ଆସନ୍ତା ୨୨ରୁ ବର୍ଷା ବଢ଼ିବା ସମ୍ଭାବନା ରହିଛି। IMD ପକ୍ଷରୁ ୨୨ ସେପ୍ଟେମ୍ବରରେ ଅତି ପ୍ରବଳ ବର୍ଷା ଏବଂ ୨୩-୨୪ ସେପ୍ଟେମ୍ବରରେ ଅତ୍ୟନ୍ତ ପ୍ରବଳ ବର୍ଷା ପାଇଁ ସତର୍କତା ଜାରି ହୋଇଛି।
