ଓଡ଼ିଶା କଂଗ୍ରେସର କାର୍ଯ୍ୟକାରିଣୀ ବୈଠକ : ଏକାଠି ହୋଇ ପଞ୍ଚାୟତ ନିର୍ବାଚନ ଲଢିବାକୁ ଆହ୍ବାନ

ଭୁବନେଶ୍ୱର : ଜେଏମଜେ ନ୍ୟୁଜ : ଓଡ଼ିଶା କଂଗ୍ରେସର ନବଗଠିତ କାର୍ଯ୍ୟକାରୀ କମିଟି ଓ କର୍ମକର୍ତ୍ତାଙ୍କ ପ୍ରଥମ ବୈଠକରେ ଦଳୀୟ ଏକତା ଓ ସଂଗଠନ ସୁଦୃଢ଼ କରିବା ପ୍ରସଙ୍ଗ ଉପରେ ଗୁରୁତ୍ୱ ଦିଆଯାଇଛି। ଏଣିକି ‘ମୁଁ’ ନୁହେଁ, ‘ଆମେ’ ଭାବନାରେ କାର୍ଯ୍ୟ କରିବା ସହ ତୃଣମୂଳ ସ୍ତରରେ ଦଳକୁ ମଜବୁତ କରିବା ନେଇ ବୈଠକରେ ଆଲୋଚନା ହୋଇଛି।୨୦୨୯ ସାଧାରଣ ନିର୍ବାଚନ ପୂର୍ବରୁ କଂଗ୍ରେସକୁ ସାଂଗଠନିକ ଭାବେ ଅଧିକ ସୁଦୃଢ଼ କରିବା ସହ ଆଗାମୀ ପଞ୍ଚାୟତ ଓ ପୌର ନିର୍ବାଚନରେ ଦଳ ଏକଜୁଟ୍ ହୋଇ କାର୍ଯ୍ୟ କରିବା ନେଇ ମାନସମନ୍ଥନ ହୋଇଛି।

ବୈଠକରେ ବରିଷ୍ଠ ନେତା ନିରଞ୍ଜନ ପଟ୍ଟନାୟକ ଦଳରେ ସ୍ନେହ, ଶ୍ରଦ୍ଧା, ତ୍ୟାଗ ଓ ଭାଇଚାରାର ଆବଶ୍ୟକତା ଉପରେ ଜୋର ଦେଇଥିବା ବେଳେ ପୁରୁଣା ନେତାଙ୍କୁ ସାଙ୍ଗରେ ନେଇ ଯୁବବର୍ଗଙ୍କୁ ଆଗକୁ ଆଣିବା ନେଇ ମତ ରଖିଛନ୍ତି। ସେହିପରି ବରିଷ୍ଠ ନେତା ଜୟଦେବ ଜେନା ଦଳର ଆଭ୍ୟନ୍ତରୀଣ କନ୍ଦଳ ପ୍ରସଙ୍ଗ ଉଠାଇଛନ୍ତି। ଦଳ ଭିତରେ ଚାଲିଥିବା ଲଢ଼େଇ ବନ୍ଦ କରି ସଂଗଠିତ ଭାବେ ରାଜନୈତିକ ପ୍ରସଙ୍ଗ ଉଠାଇବା ଆବଶ୍ୟକ ବୋଲି ସେ ମତ ଦେଇଛନ୍ତି।

ବୈଠକରେ କୃଷକ, ମହିଳା ଓ ଯୁବବର୍ଗଙ୍କୁ ଅଧିକ ଗୁରୁତ୍ୱ ଦେବା ସହ Gen Z ଓ Gen Alphaକୁ ସୁଯୋଗ ଦେବା ନେଇ ଆଲୋଚନା ହୋଇଛି। ନୂଆ ମୁହଁଙ୍କୁ ଦଳରେ ଅଧିକ ସୁଯୋଗ ଦେବା ଏବଂ ତୃଣମୂଳ ସ୍ତରରେ ସଂଗଠନକୁ ମଜବୁତ କରିବା ଉପରେ ମଧ୍ୟ ଗୁରୁତ୍ୱ ଦିଆଯାଇଛି।

ବୈଠକରେ ରାଜ୍ୟ ପ୍ରଭାରୀ ଲାଲଜି ଦେଶାଇ, ପିସିସି ସଭାପତି ଭକ୍ତ ଚରଣ ଦାସ, ସହପ୍ରଭାରୀ ଜେଟ୍ଟି କୁସୁମ, କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମଙ୍କ ସମେତ ବହୁ ବରିଷ୍ଠ ନେତା ଓ ବିଧାୟକ ଯୋଗ ଦେଇଥିଲେ। ପୂର୍ବତନ ପିସିସି ସଭାପତି ଜୟଦେବ ଜେନା, ପ୍ରସାଦ ହରିଚନ୍ଦନ, ଶରତ ପଟ୍ଟନାୟକ, ନିରଞ୍ଜନ ପଟ୍ଟନାୟକ ଏବଂ ପୂର୍ବତନ ମୁଖ୍ୟମନ୍ତ୍ରୀ ଗିରିଧାରୀ ଗମାଙ୍ଗ ମଧ୍ୟ ବୈଠକରେ ସାମିଲ ହୋଇଥିଲେ।

ଆଗାମୀ ଦିନରେ ପାଠ୍ୟପୁସ୍ତକରେ ଥିବା ତ୍ରୁଟି, MMDR ସମେତ ବିଭିନ୍ନ ରାଜ୍ୟ ପ୍ରସଙ୍ଗକୁ ନେଇ ଲୋକଙ୍କ ପାଖକୁ ଯିବା ପାଇଁ ଦଳ ପକ୍ଷରୁ ରଣନୀତି ପ୍ରସ୍ତୁତ କରାଯିବ। ସରକାରଙ୍କ ବିଫଳତାକୁ ଲୋକଙ୍କ ନିକଟରେ ପହଞ୍ଚାଇବା ସହ ସଂଗଠନକୁ ତୃଣମୂଳ ସ୍ତରରୁ ମଜବୁତ କରିବା ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ ହେବ ବୋଲି ବୈଠକରେ ଆଲୋଚନା ହୋଇଛି।