jmjnewso
ଜେଏମଜେ ବ୍ୟୁରୋ : ଦିଲ୍ଲୀରେ କକରୋଚ ଜନତା ପାର୍ଟି(ସିଜେପି)ର ପ୍ରଦର୍ଶନକୁ ମିଳିଛି ସୁପ୍ରିମକୋର୍ଟ ଓକିଲଙ୍କ ସମର୍ଥନ।ଫଳରେ ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କ ବିରୋଧରେ ଜାରି ଆନ୍ଦୋଳନ ଆହୁରି ତୀବ୍ର ହୋଇଛି। ଶନିବାର ଓକିଲମାନେ ସୁପ୍ରିମକୋର୍ଟରୁ ଜନ୍ତର ମନ୍ତରର ଅଭିମୁଖେ ରାଲି ବାହାରଛନ୍ତି। ହେଲେ ଦିଲ୍ଲୀ ପୋଲିସ ରାସ୍ତାରୁ ହିଁ ସେମାନଙ୍କୁ ଉଠାଇ ନେଇଛି।
ଏହାକୁ ନେଇ ତୀବ୍ର ଅସନ୍ତୋଷ ପ୍ରକାଶ କରିଛି ସୁପ୍ରିମକୋର୍ଟ ବାର ଆସୋସିଏସନ।
ବାର ଆସୋସିଏସନ ଭାତର ପ୍ରଧାନ ବିଚାରପତି ସୂର୍ଯ୍ୟକାନ୍ତଙ୍କୁ ଦିଲ୍ଲୀ ପୋଲିସ ଏବଂ କେନ୍ଦ୍ରୀୟ ବଳ ଦ୍ଵାରା ଓକିଲଙ୍କୁ ଅଟକ ରଖିବା ମାମଲାରେ ହସ୍ତକ୍ଷେପ କରିବାକୁ ଅପିଲ୍ କରିଛି। ସୁପ୍ରିମକୋର୍ଟ ଅଞ୍ଚଳରେ ଶାନ୍ତିପୂର୍ଣ୍ଣ ବିରୋଧ ପ୍ରଦର୍ଶନ କରୁଥିବା ବରିଷ୍ଠ ଓ ଯୁବ ଓକିଲ ବିଶେଷ କରି ମହିଳା ଓକିଲଙ୍କ ବିରୋଧରେ ପୋଲିସର ଆବଶ୍ୟକତାଠୁ ଅଧିକ ବଳ ପ୍ରୟୋଗ ଏବଂ ସେମାନଙ୍କୁ ଅଟକ ରଖିବାକୁ ନେଇ କଡ଼ା ଶବ୍ଦରେ ନିନ୍ଦା କରିଛି ସୁପ୍ରିମକୋର୍ଟ ବାର ଆସୋସିଏସନ।
ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ସିଜେପି ଓ ବିଭିନ୍ନ ଛାତ୍ର ସଂଗଠନ ଅକ୍ଟୋବର ୧୦ରେ ଜନ୍ତର ମନ୍ତରରେ ଆନ୍ଦୋଳନର ଆହ୍ଵାନ ଦେଇଥିଲେ। ହେଲେ ଦିଲ୍ଲୀ ପୋଲିସ ଏହି ପ୍ରଦର୍ଶନ ପାଇଁ ଅନୁମତି ଦେବାକୁ ମନା କରି ଦେଇଥିଲା। ଆନ୍ଦୋଳନ ପାଇଁ ବିଳମ୍ବରେ ଆବେଦନ କରିବା ଏବଂ ଆଇନ ଶୃଙ୍ଖଳାକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଥିବା କହିଛି ପୋଲିସ।
ପ୍ରଦର୍ଶନକୁ ଦୃଷ୍ଟିରେ ରଖି ଦିଲ୍ଲୀରେ ୩୦ ହଜାରରୁ ଅଧିକ ସୁରକ୍ଷାକର୍ମୀଙ୍କୁ ମୁତୟନ କରାଯାଇଛି। ରାଜଧାନୀର ଅନେକ ଅଞ୍ଚଳରେ ବ୍ୟାରିକେଡିଂ କରାଯାଇଛି ଏବଂ ଯାତାୟତ ଉପରେ କଟକଣା ଲଗାଯାଇଛି। ମେଟ୍ରୋ ଷ୍ଟେସନ ଓ ରେଳ ସେବା ଉପରେ ମଧ୍ୟ କଟକଣା ଲଗାଯାଇଥିଲା।ଏହା ପୂର୍ବରୁ କକରୋଚ ଜନତା ପାର୍ଟି(ସିଜେପି)ର ପ୍ରମୁଖ ତଥା ରାଷ୍ଟ୍ରୀୟ ସଂଯୋଜକ ଅଭିଜିତ ଦୀପକେଙ୍କୁ ଉଠାଇ ନେଇଛି ଦିଲ୍ଲୀ ପୋଲିସ। ଦୀପକେଙ୍କ ସହ ସିଜେପିର ସହସଂଯୋଜକ ଆଶୁତୋଷ ରାଙ୍କା ଏବଂ ସୌରଭ ଦାସଙ୍କୁ ମଧ୍ୟ ନିଜ ହେପାଜତକୁ ନେବାରେ ସଫଳ ହୋଇଛି ପୋଲିସ। ତିନି ଜଣ ମୁମ୍ବାଇରୁ ବିମାନ ଯୋଗେ ଦିଲ୍ଲୀ ବନ୍ଦରରେ ପହଞ୍ଚିବା ମାତ୍ରେ ଦିଲ୍ଲୀ ପୋଲିସ ବିମାନ ଭିତରେ ପଶି ସମସ୍ତଙ୍କୁ ନିଜ ହେପାଜତକୁ ନେଇ ଯାଇଛି। ଏହି ସମୟରେ ଅଭିଜିତ ଦୀପକେ କହିଛନ୍ତି ଯେ, ସେ ଗିରଫ ହେବା ପାଇଁ ହିଁ ଆସିଛନ୍ତି।
