jmjnewso
ବୁଗୁଡ଼ା,୦୩/୦୯ ଜେଏମଜେ ନ୍ୟୁଜ(ସୋରେନ କୁମାର ପ୍ରଧାନ): ଗଞ୍ଜାମ ଜିଲ୍ଲା ବୁଗୁଡ଼ା ବ୍ଲକ ଅନ୍ତର୍ଗତ ମାଣିତରା ପଞ୍ଚାୟତ ତାମ୍ବିରି ଗ୍ରାମରେ ଟ୍ରାନ୍ସଫର୍ମରରେ ଲାଗି ଜଣେ ମହିଳା ଗୁରୁତର ଆହତ ହୋଇଥିବା ଜଣାପଡ଼ିଛି।
ଆହତ ମହିଳା ଜଣକ ହେଲେ ସୁଦେଷ୍ଣା ନାଇକ (୪୯)।ସୂଚନା ଅନୁଯାୟୀ, ଆଜି ଭୋର ପ୍ରାୟ ୫ଟା ସମୟରେ ସୁଦେଷ୍ଣା ଗାଧୋଇବା ପାଇଁ ଯାଉଥିବା ବେଳେ ଗ୍ରାମ ମଝିରେ ଅଙ୍ଗନୱାଡି କେନ୍ଦ୍ର ଓ ପୋଖରୀ ନିକଟରେ ଥିବା ଟ୍ରାନ୍ସଫର୍ମର ସଂସ୍ପର୍ଶରେ ଆସି ଗୁରୁତର ଆହତ ହୋଇଥିଲେ। ଘଟଣା ଜାଣିବା ପରେ ସ୍ଥାନୀୟ ଲୋକେ ତୁରନ୍ତ ତାଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ଚିକିତ୍ସା ପାଇଁ ମେଡିକାଲକୁ ପଠାଇଥିଲେ।ତେବେ ଘଟଣାସ୍ଥଳ ନିକଟରେ ଏକ ଅଙ୍ଗନୱାଡି କେନ୍ଦ୍ର ରହିଥିବା ବେଳେ ସେଠାରେ ଅନେକ ଛୋଟ ଛୋଟ ଶିଶୁ ପାଠ ପଢ଼ୁଛନ୍ତି। ଗ୍ରାମ ମଧ୍ୟରେ ଟ୍ରାନ୍ସଫର୍ମର ରହିଥିଲେ ମଧ୍ୟ ଏହାର ଚାରିପାଖରେ କୌଣସି ସୁରକ୍ଷା ପାଚେରୀ ନଥିବାରୁ ସାଧାରଣ ଲୋକଙ୍କ ସମେତ ଅଙ୍ଗନୱାଡି କେନ୍ଦ୍ରର ଶିଶୁମାନଙ୍କ ସୁରକ୍ଷା ନେଇ ପ୍ରଶ୍ନ ଉଠିଛି।ଏଭଳି ଘଟଣା ପୁନରାବୃତ୍ତି ନହେବା ପାଇଁ ଗ୍ରାମବାସୀ ତୁରନ୍ତ ଟ୍ରାନ୍ସଫର୍ମର ଚାରିପାଖରେ ସୁରକ୍ଷା ପାଚେରୀ ନିର୍ମାଣ କରିବାକୁ ବିଦ୍ୟୁତ ବିଭାଗ ନିକଟରେ ଦାବି କରିଛନ୍ତି।
