jmjnewso
ଭୁବନେଶ୍ବର: ଜେଏମଜେ ନ୍ୟୁଜ : କେବେ ହେବ ପଞ୍ଚାୟତ ଏବଂ ପୌର ନିର୍ବାଚନ ? ତିନି ଥର ତାରିଖ ଘୁଞ୍ଚିବା ପରେ ଉଠିଲା ପ୍ରଶ୍ନ । ସରକାର ଠିକ୍ ସମୟରେ ଇଲେକ୍ସନ କରାନ୍ତୁ । ପଞ୍ଚାୟତ ନିର୍ବାଚନ ପାଇଁ ବିଜେଡି ସବୁବେଳେ ପ୍ରସ୍ତୁତ । କଂଗ୍ରେସ କହିଲା ପଞ୍ଚାୟତ ପ୍ରତିନିଧିଙ୍କୁ ସେବା କରିବାକୁ ସୁଯୋଗ ଦିଆଯାଉ ।ତିନି ଥର ପଞ୍ଚାୟତ ନିର୍ବାଚନ ତାରିଖ ଘୁଞ୍ଚିବା ପରେ ସରକାରଙ୍କୁ ଏଭଳି ଟାର୍ଗେଟ୍ କରିଛନ୍ତି ବିଜେଡି ଏବଂ କଂଗ୍ରେସ ।
ବିଜୁ ଜନତା ଦଳର ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ଯଥାଶୀଘ୍ର ପଞ୍ଚାୟତ ନିର୍ବଚନ ପାଇଁ ଦାବି କହିଛନ୍ତି । ସେ କହିଛନ୍ତି, ବିଜେଡି ପଂଚାୟତ ନିର୍ବାଚନ ପାଇଁ ସବୁବେଳେ ପ୍ରସ୍ତୁତ। ସରକାର ଠିକ୍ ସମୟରେ ନିର୍ବାଚନ କରନ୍ତୁ। ଗାଁ ଗଣ୍ଡାର ସମସ୍ୟାକୁ ନେଇ ଆମେ ଲଢେଇ କରିବୁ । ଗାଁ ଗୁଡ଼ିକ ବର୍ତ୍ତମାନ ସମସ୍ୟା ଘେରରେ ରହିଛି । ସେମାନଙ୍କ ସମସ୍ୟା ସମାଧାନ କରିବାରେ ସରକାର ବିଫଳ ହୋଇଛନ୍ତି । ପଞ୍ଚାୟତ ପ୍ରତିନିଧିମାନଙ୍କୁ ସେବା କରିବାକୁ ଦିଆଯାଉନାହିଁ । ଲୋକେ ହଇରାଣ ହେଉଛନ୍ତି, ସେମାନଙ୍କ ଦୁଃଖ ବୁଝିବାକୁ କେହି ନାହାନ୍ତି । ଖାଲି ଗ୍ରାମବାସୀ ନୁହନ୍ତି, ଗାଁରେ ରହୁଥିବା ସରକାରୀ ଚାକିରିଆମାନେ ଅସନ୍ତୁଷ୍ଟ ଅଛନ୍ତି । ମଧୁବାବୁ ପେନସନ ଯୋଜନାରେ ବୃଦ୍ଧବୃଦ୍ଧାମାନେ ଭତ୍ତା ପାଇପାରୁନାହାନ୍ତି । ସରକାର ଯୋଜନା କେବଳ ଘୋଷଣାରେ ସୀମିତ ରହୁଛି ବୋଲି ଅଭିଯୋଗ କରିଛନ୍ତି ପ୍ରସନ୍ନ ଆଚାର୍ଯ୍ୟ ।
ସେପଟେ ପଞ୍ଚାୟତ ନିର୍ବାଚନକୁ ନେଇ କଂଗ୍ରେସ ମଧ୍ୟ ଟାର୍ଗେଟ୍ କରିଛି । ବରିଷ୍ଠ ନେତା ସୁରେଶ ରାଉତରାୟ କହିଛନ୍ତି, ସରକାର ଯଦି ଠିକ୍ ସମୟରେ ନିର୍ବାଚନ କରୁଛନ୍ତି, ତେବେ ତାହା ସ୍ବାଗତ ଯୋଗ୍ୟ । ମାତ୍ର ବର୍ତ୍ତମାନ ସ୍ଥିତିକୁ ଦେଖିଲେ ପଞ୍ଚାୟତ ନିର୍ବାଚନ ତାରିଖ ତିନି ଥର ଘୁଞ୍ଚି ସାରିଲାଣି । ସେ ଆହୁରି ମଧ୍ୟ କହିଛନ୍ତି, ପଞ୍ଚାୟତ ଏବଂ ମୁନିସିପାଲିଟି ନିର୍ବାଚନ ସଠିକ୍ ସମୟରେ ହେବା ଦରକାର । ପଞ୍ଚାୟତ ପ୍ରତିନିଧିମାନଙ୍କୁ ସେବା କରିବାକୁ ସୁଯୋଗ ଦିଆଯାଉ । ସେମାନଙ୍କ ସ୍ବାଧୀନତା ଫେରାଇ ଦିଆଯାଉ । ମାର୍ଚ୍ଚରେ ପଞ୍ଚାୟତ ଓ ଏପ୍ରିଲରେ ପୌର ନିର୍ବାଚନ ହେଉ । କଂଗ୍ରେସ ନିର୍ବାଚନ ପାଇଁ ସବୁବେଳେ ପ୍ରସ୍ତୁତ ରହିଛି ବୋଲି ସୁରେଶ ରାଉତରାୟ କହିଛନ୍ତି ।
