jmjnewso
ଜେଏମଜେ ବ୍ୟୁରୋ : ଭତ୍ତା ପାଇଁ ରାସ୍ତାରେ ବୃଦ୍ଧବୃଦ୍ଧା। ବର୍ଷାରେ ଭିଜିଲେ, ଲୁହ ନିଗାଡ଼ିଲେ। ବିଶ୍ରାମ କରିବା ସମୟରେ ବିକ୍ଷୋଭ କରୁଛନ୍ତି। ଢୁ ଢୁ ବର୍ଷାରେ ଭତ୍ତା କେଇ ଟଙ୍କା ପାଇଁ ଭିଜୁଛନ୍ତି ଶହ ଶହ ବୟସ୍କ। ବୟସର ଅପରାହ୍ଣରେ ଭତ୍ତା ଗଣ୍ଡକ ପାଇଁ ଆଜି ଅସହାୟ ଏ ମଣିଷମାନେ। କାହାକୁ ମାସେ ହେଲାଣି ତ ଆଉ କାହାକୁ ୨ ମାସ ହେଲାଣି ଭତ୍ତା ମିଳିନି।ସେହିପରି ଆଉ କିଏ ଆବେଦନ କରିଛି। କିନ୍ତୁ ଭତ୍ତା ତାଲିକାରେ ଏପର୍ୟ୍ୟନ୍ତ ନାଁ ଉଠିନି।
ବାରମ୍ବାର ସରକାରଙ୍କ ଦ୍ବାରା ପ୍ରତାରଣାର ଶିକାର ହୋଇ ଏହି ବୟସ୍କ ବୃଦ୍ଧବୃଦ୍ଧା ପ୍ରବଳ ବର୍ଷାରେ ଛତା ଧରି ରାସ୍ତାରୋକ କରିଛନ୍ତି।
ମୟୂରଭଞ୍ଜ କପ୍ତିପଦା ଥାନା ଶରତ ଛକରେ ଏହି ଦୃଶ୍ୟ ସମସ୍ତଙ୍କ ମନକୁ ଆନ୍ଦୋଳିତ କରିବ ନିଶ୍ଚୟ। ୯ ପଞ୍ଚାୟତର ହିତାଧିକାରୀ ଏକାଠି ହୋଇ ଏଠାରେ ବିରୋଧ ପ୍ରଦର୍ଶନ କରିଛନ୍ତି। ହିତାଧିକାରୀଙ୍କ ସହିତ ସାମିଲ ହୋଇଛନ୍ତି ସରପଞ୍ଚ।
ଏହି ବିକ୍ଷୋଭ ଯୋଗୁଁ କପ୍ତିପଦା-କେଉଁଝର ଯୋଗାଯୋଗ ବାଧାପ୍ରାପ୍ତ ହୋଇଛି। ବର୍ଦ୍ଧିତ ଭତ୍ତା, ଆବେଦନ ହିତାଧିକାରୀଙ୍କୁ ଭତ୍ତା ପ୍ରଦାନ ଦାବିରେ ରାସ୍ତାରୋକ କରାଯାଇଥିବା ବେଳେ କ୍ଷୋଭ ଝାଡ଼ିଛନ୍ତି ବୃଦ୍ଧବୃଦ୍ଧା।
