ରାମ ମନ୍ଦିର ଟ୍ରଷ୍ଟରେ ନୂଆ ଦାୟିତ୍ୱ! CEO ହେଲେ ଅବସରପ୍ରାପ୍ତ ଏୟାର ମାର୍ଶାଲ୍

ଜେଏମଜେ ବ୍ୟୁରୋ : ରାମ ମନ୍ଦିର ଟ୍ରଷ୍ଟର ପ୍ରଥମ CEO ହେଲେ ଅବସରପ୍ରାପ୍ତ ଏୟାର ମାର୍ଶାଲ୍ ଜିତେନ୍ଦ୍ର ମିଶ୍ରା । ଅଯୋଧ୍ୟା ରାମ ମନ୍ଦିରର ପରିଚାଳନାକୁ ଆହୁରି ସୁସଂଗଠିତ ଓ ପାରଦର୍ଶୀ କରିବା ଦିଗରେ ଏହାକୁ ଏକ ବଡ଼ ପଦକ୍ଷେପ ବୋଲି କୁହାଯାଉଛି । ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟର ପ୍ରଥମ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ବା CEO ଭାବେ ଅବସରପ୍ରାପ୍ତ ଏୟାର ମାର୍ଶାଲ୍ ଜିତେନ୍ଦ୍ର ମିଶ୍ରାଙ୍କୁ ଦାୟିତ୍ୱ ଦିଆଯାଇଛି ।ଏହା ସହ ଟ୍ରଷ୍ଟର ପରିଚାଳନା ବ୍ୟବସ୍ଥାରେ ମଧ୍ୟ ବଡ଼ ପରିବର୍ତ୍ତନ ଆସିବାକୁ ଯାଉଛି ।

ଟ୍ରଷ୍ଟର ଗୁରୁତ୍ୱପୂର୍ଣ୍ଣ ବୈଠକରେ CEOଙ୍କ ଦାୟିତ୍ୱ ଓ ଅଧିକାରକୁ ନେଇ ନୂଆ ନିୟମ ଉପରେ ଆଲୋଚନା ହୋଇଛି । CEO ମନ୍ଦିର ଟ୍ରଷ୍ଟର ପ୍ରଶାସନିକ, ଆର୍ଥିକ ଓ ଆଇନଗତ କାର୍ଯ୍ୟର ତଦାରଖ କରିବେ । ଏଥିସହ ଦୀର୍ଘମିଆଦୀ ଯୋଜନା ପ୍ରସ୍ତୁତ କରିବା, ପରିଚାଳନାରେ ନୂଆ ବ୍ୟବସ୍ଥା ଲାଗୁ କରିବା ଏବଂ ଟ୍ରଷ୍ଟର ନିୟମାବଳୀ ପାଳନ ସୁନିଶ୍ଚିତ କରିବା ମଧ୍ୟ ତାଙ୍କ ଦାୟିତ୍ୱ ରହିବ ।ଏହାସହ ରାମ ମନ୍ଦିରର ସୁରକ୍ଷା ବ୍ୟବସ୍ଥା ପାଇଁ ଏକ ସ୍ଥାୟୀ Local Security Coordination Committee ଗଠନ କରାଯିବା ନେଇ ମଧ୍ୟ ଆଲୋଚନା ହୋଇଛି । ଟ୍ରଷ୍ଟ ପାଇଁ ଜଣେ ଅଧିକାରିକ ପ୍ରେସ୍ ପ୍ରବକ୍ତା ନିଯୁକ୍ତି ନେଇ ମଧ୍ୟ ପଦକ୍ଷେପ ନିଆଯିବ । ଅନ୍ୟପଟେ, ମନ୍ଦିରକୁ ଆସୁଥିବା ଦାନ ଓ ଅର୍ପଣକୁ ନେଇ ଉଠିଥିବା ଅଭିଯୋଗର SIT ତଦନ୍ତ ଏବଂ ସୁପ୍ରିମକୋର୍ଟରେ ଚାଲିଥିବା ପ୍ରକ୍ରିୟାର ସ୍ଥିତି ମଧ୍ୟ ସମୀକ୍ଷା କରାଯିବ ।