jmjnewso
ପୁରୁଷୋତ୍ତମପୁର : ଜେଏମଜେ ନ୍ୟୁଜ : ଗଞ୍ଜାମ ଜିଲା ପୁରୁଷୋତ୍ତମପୁର ଅଞ୍ଚଳରେ ଶୁକ୍ରବାର ଗୁଣିଗାରେଡିକୁ ନେଇ ତୁମୁଳକାଣ୍ଡ ଘଟିଛି। ଗୁଣିଗାରେଡି ସନ୍ଦେହରେ କେଶବ ଗୌଡ(୬୫)ଙ୍କୁ ଆକ୍ରମଣ କରାଯାଇଛି। ତାଙ୍କୁ ଥାନାରେ ପଶି ପୋଲିସ ହାତରୁ ଛଡାଇ ନେବାକୁ ଉଦ୍ୟମ ହୋଇଛି। ଏହି ସମୟରେ ପୋଲିସ ସହ ଗ୍ରାମବାସୀଙ୍କ ଧସ୍ତାଧସ୍ତି ହୋଇଛି।
ପୋଲିସ ସ୍ଥିତିକୁ ନିୟନ୍ତ୍ରଣକୁ ଆଣି ୫ ମହିଳାଙ୍କ ସମେତ ୮ ଜଣଙ୍କୁ ଗିରଫ କରିଛି। ସେମାନେ ହେଲେ କମଳା ବେହେରା, କର୍ପୁର ବେହେରା, ସନ୍ତୋଷୀ ବେହେରା, ରଞ୍ଜୁ ବେହେରା, ଅନି ବେହେରା, ରାମ ବେହେରା, ଭୀମସେନ ଗୌଡ଼ ଓ ଶ୍ୟାମ ବେହେରା । ଗିରଫ ପରେ ସମସ୍ତଙ୍କୁ କୋର୍ଟଚାଲାଣ କରାଯାଇଛି। ଏହାକୁ ନେଇ ରଣଝାଲି ଗ୍ରାମରେ ଉତ୍ତେଜନା ଲାଗିରହିଛି।
ଖବରରୁ ଜଣାପଡିଛି, ରାମ ବେହେରାଙ୍କ ବାପା ପଞ୍ଚୁ ବେହେରାଙ୍କ ଦୁଇମାସ ତଳେ ମୃତ୍ୟୁ ହୋଇଥିଲା। ତାଙ୍କ ସାନଭାଇ ଲକ୍ଷ୍ମଣଙ୍କ ମଧ୍ୟ ସ୍ବାସ୍ଥ୍ୟ ଖରାପ ହୋଇପଡିବାରୁ ସେମାନେ ଗୁଣି ସନ୍ଦେହରେ ଜଣେ ଗୁଣିଆଙ୍କ ପାଖକୁ ଯାଇଥିଲେ। ସେହି ଗୁଣିଆ ରଣଝାଲି ଗ୍ରାମର କେଶବ ଗୁଣି କରିଥିବା କହିଥିଲେ। ଗ୍ରାମକୁ ଫେରି କେତେ ଜଣ ଗ୍ରାମବାସୀ କେଶବଙ୍କୁ ଗୁଣିଗାରେଡି କରିଥିବା ସନ୍ଦେହ କରି ଆକ୍ରମଣ କରି ମାଡ଼ ମାରିଥିଲେ। ଖବର ପାଇ ପୁରୁଷୋତ୍ତମପୁର ଆଇଆଇସି କୁଳମଣି ସେଠୀ ଘଟଣାସ୍ଥଳରେ ପହଞ୍ଚତ୍ କେଶବଙ୍କୁ ଲୋକଙ୍କ କବଳରୁ ଉଦ୍ଧାର କରି ପ୍ରଥମେ ପୁରୁଷୋତ୍ତମପୁର ଡାକ୍ତରଖାନାକୁ ଆଣି ତାଙ୍କୁ ଚିକିତ୍ସା କରାଇ ଥାନାରେ ସୁରକ୍ଷିତ ଅବସ୍ଥାରେ ରଖିଥିଲେ। ତେବେ ଉତ୍ତେଜିତ ଗ୍ରାମବାସୀ ଥାନା ଭିତରେ ଧସେଇ ପଶି କେଶବଙ୍କୁ ପୋଲିସଠାରୁ ଛଡ଼ାଇନେବାକୁ ଉଦ୍ୟମ କରିଥିଲେ। ଏହାକୁ ନେଇ ପୋଲିସ ଓ ଗ୍ରାମବାସୀଙ୍କ ମଧ୍ୟରେ ଦୀର୍ଘ ସମୟ ଧରି ଧସ୍ତାଧସ୍ତି ଓ ଯୁକ୍ତିତର୍କ ହୋଇଥିଲା। ସୂଚନା ପାଇ ପୋଲିସ ଫୋର୍ସ ଆସି ସ୍ଥିତି ନିୟନ୍ତ୍ରଣ କରିଥିଲା। ଏହି ଘଟଣାରେ ନଂ ୬୧୯/୨୬ରେ ମାମଲା ରୁଜୁ କରି ଉପରୋକ୍ତ ୮ଜଣଙ୍କୁ କୋର୍ଟଚାଲାଣ କରିଥିଲା। ସେମାନଙ୍କଠାରୁ ଠେଙ୍ଗାବାଡି ଜବତ ହୋଇଛି। ଏସ୍ଆଇ ଶୁଶାନ୍ତ ମିଶ୍ର ଏହାର ତଦନ୍ତ ଜାରି ରଖିଛନ୍ତି। ରଣଝାଲିରେ ଉତ୍ତେଜନା ଲାଗି ରହିଥିବାରୁ ସେଠାରେ ପୋଲିସ ମୁତୟନ ରହି ନଜର ରଖିଥିବା ପୁରୁଷୋତ୍ତମପୁର ଏସ୍ଡିପିଓ ସୁଜିତ ନାୟକ କହିଛନ୍ତି। ଏହି ଘଟଣାରେ ସମ୍ପୃକ୍ତ ଥିବା ଅନ୍ୟମାନଙ୍କୁ ମଧ୍ୟ ଗିରଫ କରାଯିବ। ତେବେ ଏଭଳି ଉସୁକାଇଥିବା ଗୁଣିଆଙ୍କ ସମ୍ପର୍କରେ ମଧ୍ୟ ତଦନ୍ତ ହେବ ବୋଲି ସେ କହିଛନ୍ତି।
